ಮುಂಬೈ: ಸಾಮಾನ್ಯವಾಗಿ ಅಭಿಮಾನಿಗಳು ತಮ್ಮ ನೆಚ್ಚಿನ ನಟನ ಕುರಿತು ಸಾಕ್ಷ್ಯಚಿತ್ರಗಳನ್ನು ಮಾಡುವುದು, ಅವರು ನಡೆದ ಬಂದ ಹಾದಿಯನ್ನು ದಾಖಲೆ ಮಾಡುವುದು ಸಹಜ. ಆದರೆ, ಶಾರೂಖ್ ಖಾನ್ ತಮ್ಮ ಅಭಿಮಾನಿಗಳು ಮತ್ತು ಅಭಿಮಾನಿ ಸಂಘಗಳು ನಡೆದು ಬಂದ ಹಾದಿಯನ್ನು ದಾಖಲಿಸುವುದಕ್ಕೆ ಹೊರಟಿದ್ದಾರೆ. ಈ ಸಂಬಂಧ ಒಂದು ಸಾಕ್ಷ್ಯಚಿತ್ರವನ್ನು ಮಾಡುವುದಕ್ಕೆ ತಮ್ಮ ತಂಡಕ್ಕೆ ಸೂಚಿಸಿದ್ದಾರಂತೆ.
ಇದನ್ನೂ ಓದಿ: ಸದ್ಯದಲ್ಲೇ 300 ಕೋಟಿ ರೂ. ಕ್ಲಬ್ಗೆ ರಿಷಭ್ ಶೆಟ್ಟಿ ‘ಕಾಂತಾರ’
ಶಾರೂಖ್ ಖಾನ್ಗೆ ಅಭಿಮಾನಿಗಳೆಂದರೆ ಬಹಳ ಗೌರವ. ಕಾರಣ, ತಾನು ಇಷ್ಟು ಎತ್ತರ ಬೆಳೆಯುವುದರಲ್ಲಿ ಅವರ ಪಾತ್ರ ಮಹತ್ವದ್ದು ಎಂಬ ನಂಬಿಕೆ ಅವರದ್ದು. ಈ ನಿಟ್ಟಿನಲ್ಲಿ ಅವರು ಅಭಿಮಾನಿಗಳನ್ನು ಸಂತೋಷಪಡಿಸುವುದಕ್ಕೆ ಸಾಧ್ಯವಾದಷ್ಟು ಪ್ರಯತ್ನಿಸುತ್ತಾರಂತೆ. ದೇಶಾದ್ಯಂತ ಇರುವ ತಮ್ಮ ಅಭಿಮಾನಿಗಳನ್ನು ಆಗಾಗ ಮನೆಗೆ ಕರೆಸಿಕೊಂಡು ಅವರನ್ನು ಸತ್ಕರಿಸಿ ಕಳಿಸುತ್ತಾರಂತೆ. ಅದೇ ಕಾರಣಕ್ಕೆ ಅವರ ಅಭಿಮಾನಿಗಳೆಲ್ಲ ಹೆಮ್ಮೆಯಿಂದ ಎಸ್ಆರ್ಕೆಯನ್ಸ್ ಎಂದು ತಮ್ಮನ್ನು ತಾವು ಕರೆದುಕೊಳ್ಳುತ್ತಾರೆ.
ಈಗ ಶಾರೂಖ್ ತಮ್ಮ 30 ವರ್ಷದ ಪಯಣದಲ್ಲಿ ಜತೆಯಾಗಿ ನಿಂತಿರುವ ಲಕ್ಷಾಂತರ ಅಭಿಮಾನಿಗಳ ಕುರಿತು ಒಂದು ವಿಶೇಷವಾದ ಸಾಕ್ಷ್ಯಚಿತ್ರವನ್ನು ಮಾಡುವುದಕ್ಕೆ ಅವರ ತಂಡದವರಿಗೆ ಸೂಚಿಸಿದ್ದಾರಂತೆ. ಈ ಸಾಕ್ಷ್ಯಚಿತ್ರದಲ್ಲಿ ಅವರ ಕೆಲವು ಅಪರೂಪದ ಅಭಿಮಾನಿಗಳು ಮತ್ತು ಅವರ ಅಭಿಮಾನದ ಕುರಿತು ಹಲವು ಮಾಹಿತಿಗಳಿರುತ್ತವಂತೆ. ಇನ್ನು, ಹೊರದೇಶಗಳಿಂದ ಪ್ರತೀವರ್ಷ ಬಂದು ಅವರನ್ನು ಭೇಟಿ ಮಾಡುವವರ ಕುರಿತೂ ದಾಖಲಿಸಲಾಗುವುದಂತೆ. ಒಟ್ಟಾರೆ, ಈ ಮೂಲಕ ತಮ್ಮ ಅಭಿಮಾನಿಗಳಿಗೆ ಗೌರವ ಸೂಚಿಸುವುದಕ್ಕೆ ಶಾರೂಖ್ ಖಾನ್ ಹೊರಟಿದ್ದಾರೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ: ‘ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ’ ಚಿತ್ರಕ್ಕೆ ಸಾಥ್ ಕೊಟ್ಟ ರಮ್ಯಾ … ಹೇಗೆ ಗೊತ್ತಾ?
ಸಾಮಾನ್ಯವಾಗಿ ಶಾರೂಖ್ ಖಾನ್ ಅವರ ಹುಟ್ಟುಹಬ್ಬದಂದು ಅವರ ಮನೆ ‘ಮನ್ನತ್’ ಎದುರು ಎಷ್ಟು ಜನ ಜಮಾಯಿಸುತ್ತಾರೆ, ತಮ್ಮ ಮೆಚ್ಚಿನ ನಟನನ್ನು ಮೆಚ್ಚಿಸಲು ಏನೆಲ್ಲ ಮಾಡುತ್ತಾರೆ ಎಂಬುದು ಎಲ್ಲರಿಗೂ ಗೊತ್ತಿದೆ. ಇತ್ತೀಚೆಗಷ್ಟೇ ಶಾರೂಖ್ ತಮ್ಮ 57ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದು, ಈ ಸಂದರ್ಭದಲ್ಲಿ ಹಲವು ದೃಶ್ಯಗಳನ್ನು ಸೆರೆಹಿಡಿಯಲಾಗಿದ್ದು, ಸದ್ಯದಲ್ಲೇ ಚಿತ್ರೀಕರಣ ಮುಗಿಸಿ ಬಿಡುಗಡೆ ಮಾಡಲಾಗುತ್ತದಂತೆ. ಈ ಸಾಕ್ಷ್ಯಚಿತ್ರವನ್ನು ಒಂದು ಓಟಿಟಿಗೆ ಕೊಡುವ ಯೋಚನೆ ಶಾರೂಖ್ ಖಾನ್ ಅವರಿಗಿದ್ದು, ಯಾವ ಓಟಿಟಿಯಲ್ಲಿ ಇದು ಪ್ರಸಾರವಾಗುತ್ತದೆ ಎಂಬ ಕುತೂಹಲ ಎಲ್ಲರಿಗೂ ಇದೆ.