ಮುಂಬೈ: ಕರೊನಾ ಕರಿಛಾಯೆ ಷೇರುಪೇಟೆಯನ್ನೂ ಆವರಿಸಿರುವ ಕಾರಣ ಭಾರತೀಯ ಷೇರುಪೇಟೆಯ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ (ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ ಮತ್ತು ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್(ಎನ್ಎಸ್ಇ) ಸೂಚ್ಯಂಕ ನಿಫ್ಟಿ ಭಾರಿ ಕುಸಿತ ಮತ್ತು ಅಲ್ಪ ಏರಿಕೆ ದಾಖಲಿಸುತ್ತಲೇ ಇದೆ. ಬುಧವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್ 700ಕ್ಕೂ ಹೆಚ್ಚು ಅಂಶ ಕುಸಿದರೆ, ನಿಫ್ಟಿ 8,400ರ ಕೆಳಕ್ಕೆ ಕುಸಿದಿದೆ. ರಿಲಯನ್ಸ್ ಇಂಡಸ್ಟ್ರೀಸ್, ಕೊಟಾಕ್ ಬ್ಯಾಂಕ್, ಎಚ್ಡಿಎಫ್ಸಿ ಬ್ಯಾಂಕ್, ಇನ್ಫೋಸಿಸ್ ಷೇರುಗಳು ನಷ್ಟ ಅನುಭವಿಸಿದ್ದೇ ಇದಕ್ಕೆ ಕಾರಣ.
ಹೊಸ ಹಣಕಾಸು ವರ್ಷದ ಮೊದಲ ದಿನವೇ ನೆಗೆಟಿವ್ ಬೆಳವಣಿಗೆ ಕಾಣಿಸಿದ್ದು, 30 ಷೇರುಗಳ ಸೆನ್ಸೆಕ್ಸ್ 714.74 ಅಂಶ (2.43%) ಕುಸಿದು 28,753.75ರಲ್ಲಿ ಬುಧವಾರ ಬೆಳಗ್ಗೆ ವಹಿವಾಟು ಮುಂದುವರಿಸಿದೆ. ಇದೇ ವೇಳೆ, ನಿಫ್ಟಿ 199 ಅಂಶ (2.31%) ಕುಸಿತ ಕಂಡು 8, 398.75ರಲ್ಲಿ ವಹಿವಾಟು ನಡೆಸಿದೆ.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಕೊಟಾಕ್ ಬ್ಯಾಂಕ್ ಷೇರುಗಳು ಗರಿಷ್ಠ ಶೇಕಡ 8 ನಷ್ಟ ಅನುಭವಿಸಿದರೆ, ಎಸ್ಬಿಐ, ಇನ್ಫೋಸಿಸ್, ಎಚ್ಡಿಎಫ್ಸಿ ಬ್ಯಾಂಕ್, ಟೆಕ್ ಮಹೀಂದ್ರಾ, ಅಲ್ಟ್ರಾ ಟೆಕ್ ಸಿಮೆಂಟ್ ಕಂಪನಿ ಷೇರುಗಳು ಕೂಡ ನಷ್ಟ ಅನುಭವಿಸಿವೆ. ಇನ್ನೊಂದೆಡೆ, ಇಂಡಸ್ ಇಂಡ್ ಬ್ಯಾಂಕ್, ಪವರ್ಗ್ರಿಡ್ ಷೇರುಗಳು ಲಾಭಗಳಿಸಿವೆ.
ಈ ಹಿಂದಿನ ಅಂದರೆ ಮಂಗಳವಾರದ ವಹಿವಾಟಿನಲ್ಲಿ ಅಂದರೆ 2019-20ನೇ ಸಾಲಿನ ಹಣಕಾಸು ವರ್ಷದ ಕೊನೆಯ ದಿನ ಸೆನ್ಸೆಕ್ಸ್ 1,028.17 ಅಂಶ(3.62%) ಏರಿಕೆಯೊಂದಿಗೆ 29,468.49ರಲ್ಲೂ, ನಿಫ್ಟಿ 316.65 ಅಂಶ (3.82%) ಏರಿಕೆಯೊಂದಿಗೆ 8,597.75ರಲ್ಲಿ ದಿನದ ವಹಿವಾಟು ಮುಗಿಸಿದ್ದವು. ಆದಾಗ್ಯೂ, ಕಳೆದ ಹಣಕಾಸು ವರ್ಷದಲ್ಲಿ ಸೆನ್ಸೆಕ್ಸ್ ಒಟ್ಟು 9,204.42 ಅಂಶ (23.80%) ಹಾಗೂ ನಿಫ್ಟಿ 3,026.15(26.03%) ಅಂಶ ಕುಸಿತ ಕಂಡು ನಷ್ಟ ಅನುಭವಿಸಿವೆ. (ಏಜೆನ್ಸೀಸ್)
3 ತಿಂಗಳು ಮಾಸಿಕ ಕಂತಿನ ವಿನಾಯ್ತಿ ಪಡೆಯುವ ಮುನ್ನ ಸಾವಿರ ಬಾರಿ ಯೋಚಿಸಿ!?