ಬೆಂಗಳೂರು: ಇವರೆಲ್ಲ ಒಂದು ರೀತಿಯಲ್ಲಿ ಬ್ರ್ಯಾಂಡೆಡ್ ಕಳ್ಳರು. ಏಕೆಂದರೆ ಇವರು ಕದಿಯುತ್ತಿದ್ದುದೇ ಬ್ರ್ಯಾಂಡೆಡ್ ಚಪ್ಪಲಿ-ಶೂಗಳನ್ನು. ಮಾರಕಾಸ್ತ್ರಗಳನ್ನು ಹಿಡಿದುಕೊಂಡು ರಾತ್ರಿಯಲ್ಲಿ ಅಪಾರ್ಟ್ಮೆಂಟ್ಗಳಿಗೆ ನುಗ್ಗಿ ಕಳವು ಮಾಡುತ್ತಿದ್ದ ಇವರಲ್ಲಿ ಒಬ್ಬನನ್ನು ಹಿಡಿಯುವಲ್ಲಿ ಭದ್ರತಾ ಸಿಬ್ಬಂದಿ ಸಾಹಸ ಮೆರೆದಿದ್ದಾರೆ.
ಜ. 27ರಂದು ಬೆಂಗಳೂರಿನ ವೈಟ್ಫೀಲ್ಡ್ ಪೊಲೀಸ್ ಠಾಣೆ ವ್ಯಾಪ್ತಿಯ ಇಮ್ಮಡಿಹಳ್ಳಿಯ ಸಾನ್ವಿ ಅಪಾರ್ಟ್ಮೆಂಟ್ಗೆ ರಾತ್ರಿಯಲ್ಲಿ ನಾಲ್ವರು ಕಳ್ಳರು ನುಗ್ಗಿ ದುಬಾರಿ ಬೆಲೆಯ ಪಾದರಕ್ಷೆಗಳನ್ನು ಕದ್ದೊಯ್ಯಲು ಯತ್ನಿಸಿದ್ದರು.
ಇವರ ಬಳಿ ಮಾರಕಾಸ್ತ್ರಗಳಿದ್ದರೂ ಹೆದರದ ಸೆಕ್ಯುರಿಟಿ ಗಾರ್ಡ್ಗಳಾದ ಜಗತ್ ಬೋರಾ ಹಾಗೂ ವಿಜಯ್ ಬೋರಾ ಈ ನಾಲ್ವರ ಪೈಕಿ ಒಬ್ಬನನ್ನು ಹಿಡಿದು ಇನ್ನುಳಿದವರು ಹೆದರಿ ಓಡಿಹೋಗುವಂತೆ ಮಾಡಿದ್ದರು. ಒಬ್ಬನನ್ನು ಹಿಡಿದು ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದ್ದರು.
ತಕ್ಷಣ ಸ್ಥಳಕ್ಕೆ ಬಂದ ವೈಟ್ಫೀಲ್ಡ್ ಪೊಲೀಸರು ಸೆಕ್ಯುರಿಟಿ ಗಾರ್ಡ್ಗಳ ಕೈಗೆ ಸಿಕ್ಕಿಬಿದ್ದಿದ್ದ ರಾಜು ಎಂಬಾತನನ್ನು ವಶಕ್ಕೆ ಪಡೆದಿದ್ದರು. ರಾಜು ಮತ್ತು ತಂಡ ಬ್ರ್ಯಾಂಡೆಡ್ ಚಪ್ಪಲಿ-ಶೂ ಕದ್ದು ಅವುಗಳಿಗೆ ಪಾಲಿಷ್ ಮಾಡಿ ರಸ್ತೆಬದಿಯಲ್ಲಿ ಮಾರಾಟ ಮಾಡುತ್ತಿತ್ತು. ಇವರು ಬನ್ನೇರುಘಟ್ಟ ಹಾಗೂ ಮೈಕೋ ಲೇಔಟ್ ಮುಂತಾದ ಕಡೆಯೂ ಕಳ್ಳತನ ನಡೆಸಿರುವುದು ತಿಳಿದುಬಂದಿದೆ. ಈ ಕಳ್ಳರನ್ನು ಹಿಮ್ಮೆಟ್ಟಿಸುವ ಜತೆಗೆ ಒಬ್ಬನನ್ನು ಹಿಡಿದು ಸಾಹಸ ಮೆರೆದ ಸೆಕ್ಯುರಿಟಿ ಗಾರ್ಡ್ಗಳಿಗೆ ಡಿಸಿಪಿ ಎಸ್.ಗಿರೀಶ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಅದರಲ್ಲಿ ಪೊಲೀಸರ ತಪ್ಪಿಲ್ಲ, ಇದರಲ್ಲಿ ತಪ್ಪಿತ್ತು..: ಸಂಚಾರ ಪೊಲೀಸರ ವಿರುದ್ಧದ ಟೀಕೆಗಳಿಗೆ ರವಿಕಾಂತೇಗೌಡ ಲಿಖಿತ ಉತ್ತರ