2022ರ ಮಾರ್ಚ್ನಲ್ಲಿ ನಡೆಯಲಿರುವ ಆಸ್ಕರ್ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಭಾರತದಿಂದ ಪ್ರತಿನಿಧಿಸಲು, ಈ ಬಾರಿ ಒಟ್ಟು 14 ಚಿತ್ರಗಳು ಪೈಪೋಟಿ ನಡೆಸಿದ್ದವು. ಈ ಪೈಕಿ ಶಾಜಿ ಕರುಣ್ ನೇತೃತ್ವದ 15 ಜನರ ಆಯ್ಕೆ ಸಮಿತಿಯು, ಅಂತಿಮವಾಗಿ ‘ಕೂಳಂಗಳ್’ಚಿತ್ರವನ್ನು ಆಯ್ಕೆ ಮಾಡಿದೆ. ‘ಕೂಳಂಗಳ್’ ಆಯ್ಕೆಯಾಗಿರುವ ಬಗ್ಗೆ ಯಾವುದೇ ತಕರಾರುಗಳಿರದಿದ್ದರೂ, ‘ಸರ್ದಾರ್ ಉಧಮ್ ಚಿತ್ರವನ್ನು ಕೈಬಿಟ್ಟಿದ್ದಕ್ಕೆ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಬೇಸರ ವ್ಯಕ್ತವಾಗಿದೆ. ಅದಕ್ಕೆ ಕಾರಣ, ಆಯ್ಕೆ ಸಮಿತಿಯು ಚಿತ್ರವನ್ನು ಕೈಬಿಡುವುದಕ್ಕೆ ನೀಡಿರುವ ಕಾರಣ. ‘ಸರ್ದಾರ್ ಉಧಮ್ ಚಿತ್ರವು ಬ್ರಿಟಿಷರ ವಿರುದ್ಧ ದ್ವೇಷ ಬಿಂಬಿಸುತ್ತದೆ ಎಂಬ ಕಾರಣಕ್ಕೆ ಆಸ್ಕರ್ ಕಣದಿಂದ ಕೈಬಿಡಲಾಗಿದೆ ಎಂದು ಆಯ್ಕೆ ಸಮಿತಿಯು ಹೇಳಿಕೊಂಡಿದೆ. ಈ ಕುರಿತು ಸಾಕಷ್ಟು ನೆಟ್ಟಿಗರು ಆಯ್ಕೆ ಸಮಿತಿಯ ಸದಸ್ಯರನ್ನು ತರಾಟೆ ತೆಗೆದುಕೊಂಡಿದ್ದಾರೆ.
