ಮುಂಬೈ: ಎಲ್ಲ ಅಂದುಕೊಂಡಂತೆ ಆಗಿದ್ದರೆ ಆ ಕಾಸ್ಟ್ಲಿ ಸೆಟ್ನಲ್ಲಿ ಈಗಾಗಲೇ ಬಾಲಿವುಡ್ ಬಹು ನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾಗಿರುವ ‘ಗಂಗೂಬಾಯಿ ಕಾಥೈವಾಡಿ’ ಸಿನಿಮಾ ಚಿತ್ರದ ಶೂಟಿಂಗ್ ನಡೆಯುತ್ತಿರಬೇಕಿತ್ತು. ಆದರೆ. ಕರೊನಾದಿಂದಾಗಿ ಸಿನಿಮಾರಂಗವೇ ಸ್ಥಗಿತಗೊಂಡಿದೆ. ಹಾಗಾಗಿ ಬರೋಬ್ಬರಿ ಆರು ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿರುವ ಅದ್ದೂರಿ ಸೆಟ್ ಇನ್ನು ಕೆಲವೇ ದಿನಗಳಲ್ಲಿ ನೆಲಕಚ್ಚಲಿದೆ.
ಮುಂಬೈನ ಫಿಲಂ ಸಿಟಿಯಲ್ಲಿ ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ, ಆಲಿಯಾ ಭಟ್ ನಾಯಕಿಯಾಗಿ ನಟಿಸಲಿರುವ ‘ಗಂಗೂಬಾಯಿ..’ ಚಿತ್ರದ ಸೆಟ್ ಹಾಕಲಾಗಿದೆ. ಕರೊನಾ ಇನ್ನೇನು ಮುಗಿಯುತ್ತದೆ. ಮುಗಿದ ಬಳಿಕ ಶೂಟಿಂಗ್ ಶುರುಮಾಡಿದರಾಯಿತು ಎಂದು ಚಿತ್ರತಂಡ ಪ್ಲ್ಯಾನ್ ರೂಪಿಸಿತ್ತು. ಆದರೆ, ಲಾಕ್ಡೌನ್ ಮತ್ತೆ ಮುಂದೂಡಿಕೆ ಆಗಿರುವುದು ಚಿತ್ರತಂಡವನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ. ಮುಂದಿನ ದಿನಗಳಲ್ಲಿ ಮಳೆಗಾಲ ಶುರುವಾಗುವುದರಿಂದ ಚಿತ್ರೀಕರಣಕ್ಕೆ ಅಡ್ಡಿಯುಂಟಾಗಲಿದೆ.
ವಿಪರ್ಯಾಸ ಏನೆಂದರೆ, ಸಂಜಯ್ ಲೀಲಾ ಬನ್ಸಾಲಿ ಇಲ್ಲಿಯವರೆಗೂ ಹತ್ತಾರು ಸಿನಿಮಾಗಳನ್ನು ಮಾಡಿದ್ದಾರೆ. ಅವರ ಪ್ರತಿ ಸಿನಿಮಾಗಳಲ್ಲಿ ಸೆಟ್ಗಳೇ ಒಂದು ಪಾತ್ರವೆಂಬಂತೆ ಗೋಚರವಾಗುತ್ತದೆ. ಬಾಜಿರಾವ್ ಮಸ್ತಾನಿ, ಪದ್ಮಾವತ್ಗಳಲ್ಲಿ ಸೆಟ್ಗಳೇ ಕಣ್ಮನ ಸೆಳೆಯುತ್ತವೆ. ಆ ಎಲ್ಲ ಸಿನಿಮಾಗಳ ಸೆಟ್ಗಿಂತ ಹೆಚ್ಚಿನ ಶ್ರಮವಹಿಸಿ ಗಂಗೂಬಾಯಿ ಚಿತ್ರದ ಸೆಟ್ ನಿರ್ಮಾಣ ಮಾಡಲಾಗಿತ್ತಂತೆ. (ಏಜೆನ್ಸೀಸ್)
