ಟಾಕ್ಸಿಕ್ ಕುರಿತು ರೋಚಕ ಸಂಗತಿ ಬಿಚ್ಚಿಟ್ಟ ರಾಯ! ಯಶ್​ ಅವರ ಈ ಪ್ಲಾನ್ ನಿಜಕ್ಕೂ​ ವರ್ಕೌಟ್​ ಆಗುತ್ತಾ? Toxic

Toxic : ಕೆಜಿಎಫ್​ ಸರಣಿ ಮೂಲಕ ಬಾಕ್ಸ್​ ಆಫೀಸ್​ ಕೊಳ್ಳೆ ಹೊಡೆದು ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಕ್ರೇಜ್​ ಸೃಷ್ಟಿಸಿರುವ ರಾಕಿಂಗ್​ ಸ್ಟಾರ್​ ಯಶ್, ತಮ್ಮ ಮುಂದಿನ ಚಿತ್ರ ಟಾಕ್ಸಿಕ್​ ಬಿಡುಗಡೆಗೆ ಎದುರು ನೋಡುತ್ತಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದಿದ್ದರೆ ಟಾಕ್ಸಿಕ್​ ಸಿನಿಮಾ ಮಾರ್ಚ್​ 19ರಂದು ಬಿಡುಗಡೆಯಾಗಬೇಕಿತ್ತು. ಆದರೆ, ಕಾರಣಾಂತರಗಳಿಂದ ಟಾಕ್ಸಿಕ್​ ಸಿನಿಮಾ ಬಿಡುಗಡೆಯನ್ನು ಜೂನ್​ 4ಕ್ಕೆ ಮುಂದೂಡಲಾಗಿದೆ.

ಈಗಾಗಲೇ ಟಾಕ್ಸಿಕ್​ ಸಿನಿಮಾದ ಟೀಸರ್​ ಜಾಲತಾಣದಲ್ಲಿ ಸಖತ್​ ಸದ್ದು ಮಾಡಿದ್ದು, ಸಿನಿಮಾ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ. ಇದರ ನಡುವೆ ಇತ್ತೀಚಿನ ಸಂದರ್ಶನವೊಂದರಲ್ಲಿ ನಟ ಯಶ್, ಟಾಕ್ಸಿಕ್ ಚಿತ್ರದ ಬಗ್ಗೆ ಆಡಿರುವ ಮಾತುಗಳು ಅಭಿಮಾನಿಗಳ ಕುತೂಹಲವನ್ನು ಡಬಲ್​ ಮಾಡಿದೆ. ಕೆಜಿಎಫ್ ಸರಣಿಯೊಂದಿಗೆ ಗ್ಲೋಬಲ್​ ಸ್ಟಾರ್ ಆಗಿರುವ ಯಶ್​, ಟಾಕ್ಸಿಕ್​ ಸಿನಿಮಾಗಾಗಿ ಹೊಸ ಜಗತ್ತನ್ನೇ ಸೃಷ್ಟಿ ಮಾಡಿರುವುದಾಗಿ ಹೇಳಿದರು. ಇದು ಕೇವಲ ಸಾಮಾನ್ಯ ಗ್ಯಾಂಗ್‌ಸ್ಟರ್ ನಾಟಕವಲ್ಲ, ಅದಕ್ಕಿಂತಲೂ ಆಳವಾದ ಕಥಾಹಂದರವನ್ನು ಹೊಂದಿರುತ್ತದೆ ಎಂದು ಯಶ್​ ಸ್ಪಷ್ಟಪಡಿಸಿದರು.

'ಎ ಫೇರಿ ಟೇಲ್ ಫಾರ್ ಗ್ರೋನ್​​-ಅಪ್ಸ್' ಎಂಬ ಟ್ಯಾಗ್‌ಲೈನ್‌ನೊಂದಿಗೆ ಬರುತ್ತಿರುವ ಈ ಚಿತ್ರವು ದೃಶ್ಯಗಳು ಮತ್ತು ಕಥೆಯ ವಿಚಾರದಲ್ಲಿ ಪ್ರೇಕ್ಷಕರಿಗೆ ಹೊಸ ರೀತಿಯ ಅನುಭವವನ್ನು ನೀಡಲಿದೆ ಎಂದು ಯಶ್​ ಹೇಳಿದ್ದಾರೆ.

ಅಂದಹಾಗೆ, ಕೆಜಿಎಫ್ ಚಿತ್ರದಲ್ಲಿ ತಾಯಿಯ ಸೆಂಟಿಮೆಂಟ್​ ದೃಶ್ಯಗಳು ಆ ಸಿನಿಮಾದ ಪ್ರಮುಖ ಶಕ್ತಿಯಾಗಿತ್ತು ಮತ್ತು ಬಾಕ್ಸ್ ಆಫೀಸ್‌ನಲ್ಲಿ ದಾಖಲೆ ಬರೆಯಲು ಇದು ಕೂಡ ಪ್ರಮುಖ ಕಾರಣವಾಯಿತು. ಆದಾಗ್ಯೂ, 'ಟಾಕ್ಸಿಕ್' ಚಿತ್ರದಲ್ಲಿ ತಂದೆಯ ಸೆಂಟಿಮೆಂಟ್​ ಪ್ರಮುಖ ಪಾತ್ರ ವಹಿಸಲಿದೆ ಎಂದು ವರದಿಯಾಗಿದೆ. ತಂದೆ ಮತ್ತು ಮಗನ ನಡುವಿನ ಭಾವನಾತ್ಮಕ ಬಾಂಧವ್ಯದ ಸುತ್ತ ಕಥೆ ಸುತ್ತುತ್ತದೆ ಎಂದು ಯಶ್ ಸುಳಿವು ನೀಡಿದ್ದಾರೆ. ಆ್ಯಕ್ಷನ್ ಪ್ರಿಯರಿಗೆ ಅಗತ್ಯವಿರುವ ಸಾಕಷ್ಟು ಮಾಸ್ ಅಂಶಗಳನ್ನು ಹೊಂದಿರುವ ಈ ಚಿತ್ರವು ಪ್ರತಿಯೊಬ್ಬ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುವ ಒಂದೊಳ್ಳೆಯ ಸೆಂಟಿಮೆಂಟ್​ ದೃಶ್ಯಗಳು ಇರುತ್ತವೆ ಎಂದು ಯಶ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ನಿರ್ದೇಶಕಿ ಗೀತು ಮೋಹನ್ ದಾಸ್ ಅವರು ಈ ಚಿತ್ರವನ್ನು ಅತ್ಯುನ್ನತ ತಾಂತ್ರಿಕ ಕೌಶಲ್ಯದೊಂದಿಗೆ ಚಿತ್ರೀಕರಿಸಿದ್ದಾರೆ. ಈ ಸಿನಿಮಾ ಕೇವಲ ಆಕ್ಷನ್ ಸೀಕ್ವೆನ್ಸ್‌ಗಳಿಗೆ ಸೀಮಿತವಾಗಿರದೆ, ಪಾತ್ರಗಳ ನಡುವಿನ ಕೆಮಿಸ್ಟ್ರಿ ಮತ್ತು ಭಾವನಾತ್ಮಕ ಬಂಧ ಈ ಸಿನಿಮಾವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯುತ್ತದೆ ಎಂದು ಯಶ್ ವಿವರಿಸಿದರು.

ಒಟ್ಟಾರೆ, ಕೆಜಿಎಫ್​ನಲ್ಲಿ ತಾಯಿ ಸೆಂಟಿಮೆಂಟ್​ನೊಂದಿಗೆ ಬಂದಿದ್ದ ಯಶ್​, ಈ ಬಾರಿ ತಂದೆ ಸೆಂಟಿಮೆಂಟ್​ನೊಂದಿಗೆ ಪ್ರೇಕ್ಷಕರ ಮುಂದೆ ಬರಲಿದ್ದಾರೆ ಎನ್ನಲಾಗುತ್ತಿದೆ. ಕೆಜಿಎಫ್​ನಂತೆ ಟಾಕ್ಸಿಕ್​ನಲ್ಲಿ ತಂದೆ ಸೆಂಟಿಮೆಂಟ್​ ವರ್ಕೌಟ್​ ಆಗುತ್ತಾ ಅನ್ನೋದನ್ನು ಕಾದು ನೋಡಬೇಕಾಗಿದೆ, (ಏಜೆನ್ಸೀಸ್​).