ಮನೆಯಲ್ಲಿ ಹಾಗೆಲ್ಲ ಆಡಿದ್ರೆ ಕಪಾಳಕ್ಕೆ ಹೊಡೀತಾರೆ …

ಮುಂಬೈ: ಸಲ್ಮಾನ್​ ಖಾನ್​ ಅಭಿನಯದ ಅತ್ಯಂತ ಜನಪ್ರಿಯ ಪಾತ್ರಗಳಲ್ಲಿ ದಬಾಂಗ್ ಚಿತ್ರದ ಚುಲ್​ಬುಲ್​ ಪಾಂಡೆ ಪಾತ್ರ ಸಹ ಒಂದು. ಸದಾ ಲವಲವಿಕೆಯಿಂದ ಇರುವುದರ ಜತೆಗೆ, ಬಿಲ್ಡಪ್​ ಕೊಡುತ್ತಾ, ಪಂಚಿಂಗ್​ ಡೈಲಾಗ್​ಗಳನ್ನು ಹೊಡೆಯುವ ವಿಭಿನ್ನ ಪಾತ್ರವದು. ಈ ಪಾತ್ರ ಅದೆಷ್ಟು ಜನಪ್ರಿಯವಾಗಿದೆ ಎಂದರೆ ದಬಾಂಗ್​ ಸೀರೀಸ್​ನಲ್ಲಿ ಇದುವರೆಗೂ ಮೂರು ಭಾಗಗಳು ಬಿಡುಗಡೆಯಾಗಿವೆ.

ಇದನ್ನೂ ಓದಿ: ಗಳಿಕೆ ಕಾಣದ ಚಿತ್ರವಿದು ರಾಧೆ; ಸಲ್ಮಾನ್ ಖಾನ್ ಮನದಾಳದ ಮಾತು

ದಬಾಂಗ್​ ಚಿತ್ರದಲ್ಲಿ ಲವಲವಿಕೆಯಿಂದ ಇರುವಂತೆಯೇ, ಸಲ್ಮಾನ್​ ತಮ್ಮ ನಿಜಜೀವನದಲ್ಲೂ ಇರುತ್ತಾರಾ ಎಂಬ ಪ್ರಶ್ನೆ ಬರುವುದು ಸಹಜ. ಇತ್ತೀಚೆಗೆ ನಡೆದ ಒಂದು ಸಂದರ್ಶನದಲ್ಲಿ ಸಲ್ಮಾನ್​ ಎದುರು ಈ ಪ್ರಶ್ನೆಯನ್ನು ಮುಂದಿಟ್ಟರೆ, ಅವರಿಂದ ಬಂದ ಉತ್ತರವೇನು ಗೊತ್ತಾ?

ನಾನು ಇಷ್ಟಪಟ್ಟಿರುವ ಪಾತ್ರಗಳನ್ನೆಲ್ಲ ಮನೆಗೆ ತೆಗೆದುಕೊಂಡು ಹೋಗುವುದು ಕಷ್ಟ. ನಾವು ಕೆಲವು ಪಾತ್ರಗಳನ್ನು ಸಿಕ್ಕಾಪಟ್ಟೆ ಇಷ್ಟಪಟ್ಟಿರುತ್ತೇವೆ. ಆದರೆ, ನಿಜಜೀವನದಲ್ಲಿ ಅದೇ ತರಹ ಇರುವುದಕ್ಕೆ ಆಗುವುದಿಲ್ಲ. ನಾನೇನಾದರೂ ಮನೆಯಲ್ಲಿ ಚುಲ್​ಬುಲ್​ ಪಾಂಡೆ ತರಹ ಇರುವುದಕ್ಕೆ ಹೋದರೆ, ನಮ್ಮಪ್ಪ ಹೊಡೆದೇಬಿಡುತ್ತಾರೆ. ನಮ್ಮಮ್ಮ ಕಪಾಳಕ್ಕೆ ಬಾರಿಸುತ್ತಾರೆ. ಹಾಗಾಗಿ, ತೆರೆಯ ಮೇಲಷ್ಟೇ ಆ ತರಹ ಇರುವುದಕ್ಕೆ ಸಾಧ್ಯ. ಮನೆಯಲ್ಲಿ ಒಬ್ಬ ಮಗ ಹೇಗಿರಬೇಕೋ, ಒಬ್ಬ ಸಹೋದರ ಹೇಗಿರಬೇಕೋ, ಅದೇ ರೀತಿ ಇರುವುದಕ್ಕೆ ನಾನು ಇಷ್ಟಪಡುತ್ತೇನೆ ಎಂದು ಸಲ್ಮಾನ್​ ಹೇಳಿದ್ದಾರೆ.

ಇದನ್ನೂ ಓದಿ: ಇದೀಗ ಪಕ್ಕಾ; ಜೂನಿಯರ್‌ NTR ಗೆ ಪ್ರಶಾಂತ್ ನೀಲ್ ನಿರ್ದೇಶನ

ಅಂದಹಾಗೆ, ಸಲ್ಮಾನ್​ ಖಾನ್​ ಅಭಿನಯದ ರಾಧೆ – ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​ ಚಿತ್ರವು ಇಂದು ಬಿಡುಗಡೆಯಾಗಿದೆ. ಈ ಚಿತ್ರದಲ್ಲಿ ಸಲ್ಮಾನ್​ ಜತೆಗೆ ದಿಶಾ ಪಠಾಣಿ, ಜಾಕಿ ಶ್ರಾಫ್​, ರಣದೀಪ್​ ಹೂಡಾ ಮುಂತಾದವರು ಅಭಿನಯಿಸಿದ್ದು, ಈ ಚಿತ್ರವನ್ನು ಪ್ರಭುದೇವ ನಿರ್ದೇಶಿಸಿದ್ದಾರೆ.

https://www.vijayavani.net/r-when-ex-pakistan-captain-imran-khan-and-bollywood-diva-rekha-almost-got-married/