ಸಂಘದ ಅಧ್ಯಕ್ಷ ಡಿ. ಹನುಮಂತಯ್ಯ ನೇತೃತ್ವದಲ್ಲಿ ಒಕ್ಕಲಿಗ ಸಮಾಜದ ಮುಖಂಡರು, ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ ಅವರನ್ನು ಶನಿವಾರ ಭೇಟಿ ಮಾಡಿ ಮನವಿ ಪತ್ರ ಸಲ್ಲಿಸಿದರು. ವಿದ್ಯಾರ್ಥಿಗಳಿಗೆ ವಸತಿ ಸೌಕರ್ಯಕ್ಕಾಗಿ ಹಾಸ್ಟೆಲ್ ನಿರ್ಮಿಸಲು ರಂಗಮ್ಮಕೃಷ್ಣಪ್ಪ ಎಂಬುವರು 1978ರಲ್ಲಿ 96 ಎಕರೆ ಭೂಮಿಯನ್ನು ಸಂಘಕ್ಕೆ ದಾನ ನೀಡಿದ್ದರು. ಈ ಜಾಗವನ್ನು ಕೆಲವು ಪ್ರಭಾವಿಗಳು ಹಂತಹಂತವಾಗಿ ಒತ್ತುವರಿ ಮಾಡಿಕೊಂಡಿದ್ದಾರೆ. ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರನಿಂದ (ಬಿಡಿಎ) ಬಡಾವಣೆ ನಿರ್ಮಾಣಕ್ಕೆ ಈಗಾಗಲೇ ಅನುಮೋದನೆ ಪಡೆದಿದ್ದಾರೆ. ಕೆಲವರು ಲೇಔಟ್ ಮಾಡುವುದಾಗಿ ಫಲಕ ಹಾಕಿದ್ದಾರೆ. ಈ ಸಂಬಂಧ ನ್ಯಾಯಾಲಯದಲ್ಲಿ ಕೇಸ್ ನಡೆಯುತ್ತಿದ್ದು, ಪ್ರಕರಣ ಬಾಕಿ ಇದೆ. ಸಜ್ಜೆಪಾಳ್ಯದ ಜಮೀನು ಉಳಿಸಲು ನಮ್ಮ ಸಂಘ ನಿರಂತರವಾಗಿ ಹೋರಾಟ ನಡೆಸಿಕೊಂಡು ಬರುತ್ತಿದ್ದು, ಈ ಬಗ್ಗೆ ಅಧಿವೇಶನದಲ್ಲಿ ಧ್ವನಿ ಎತ್ತುವ ಮೂಲಕ ಸರ್ಕಾರದ ಗಮನ ಸೆಳೆಯುವಂತೆ ಮಾಜಿ ಸಿಎಂ ಬೊಮ್ಮಾಯಿಗೆ ಮನವಿ ಮಾಡಿದರು. ಸಂಘದ ನಿರ್ದೇಶಕ ಅಶೋಕ್, ಸಜ್ಜೆಪಾಳ್ಯದ ಜಮೀನು ಹೋರಾಟಗಾರರಾದ ಕೆನಲಿಗೌಡ, ಗಂಗಾಧರ್, ಪ್ರಸನ್ನ, ಮೋಹನ್ಗೌಡ, ಹಲ್ಲೇಗೆರೆ ಕೃಷ್ಣ ಮತ್ತಿತರರಿದ್ದರು.
