ಮುಂಬೈ: ಡ್ರಗ್ಸ್ ಜಾಲದಲ್ಲಿ ಮಗಳು ಸಾರಾ ಅಲಿ ಖಾನ್ ಹೆಸರು ಕೇಳಿ ಬಂದ ಹಿನ್ನೆಲೆಯಲ್ಲಿ ಆಕೆಯನ್ನು ಸೈಫ್ ಅಲಿ ಖಾನ್ ದೂರ ಇಟ್ಟಿದ್ದಾರೆ ಎಂಬ ವಿಷಯ ಕೇಳಿ ಬಂದಿತ್ತು. ಆದರೆ, ಅದು ಅಪ್ಪಟ ಸುಳ್ಳು, ಯಾವುದೇ ಕಾರಣಕ್ಕೂ ಮಗಳನ್ನು ದೂರ ಇಟ್ಟಿಲ್ಲ ಎಂದು ಸೈಫ್ ಅಲಿ ಖಾನ್ ಸ್ಪಷ್ಟಪಡಿಸಿದ್ದಾರೆ.
ಇದನ್ನೂ ಓದಿ: ಊಟಿಯಲ್ಲಿ ಪ್ರೇಮ್ ‘ಏಕ್ ಲವ್ ಯಾ’
ಸುಶಾಂತ್ ಸಿಂಗ್ ರಜಪೂತ್ ಸಾವಿನ ಸಂಬಂಧ ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್ಸಿಬಿ) ಅಧಿಕಾರಿಗಳು, ಗೆಳತಿ ರಿಯಾ ಚಕ್ರವರ್ತಿ ಅವರನ್ನು ವಿಚಾರಣೆ ನಡೆಸಿದ್ದರು. ಈ ಸಂದರ್ಭದಲ್ಲಿ ಸುಶಾಂತ್ ಜತೆಗೆ ಸಾರಾ ಅಲಿ ಖಾನ್ ಸಹ ಡ್ರಗ್ಸ್ ತೆಗೆದುಕೊಳ್ಳುತ್ತಿದ್ದರು ಎಂದು ರಿಚಾ ಬಾಯಿಬಿಟ್ಟಿದ್ದರು.
ಈ ಸಂಬಂಧ ಎನ್ಸಿಬಿ ಅಧಿಕಾರಿಗಳು ಸಾರಾ ಅವರನ್ನು ಕರೆಸಿ ವಿಚಾರಣೆ ಮಾಡಿದ್ದರು. ಯಾವಾಗ ಡ್ರಗ್ಸ್ ಜಾಲದಲ್ಲಿ ಸಾರಾ ಹೆಸರು ಕೇಳಿಬಂದಿತೋ, ಸಹಜವಾಗಿಯೇ ಸೈಫ್ ಸಿಟ್ಟಾಗಿದ್ದಾರಂತೆ. ಹೇಳಿಕೇಳಿ ಸಾರಾ, ಚಿತ್ರರಂಗದಲ್ಲಿ ಈಗಷ್ಟೇ ಬೆಳೆಯುತ್ತಿರುವ ಹುಡುಗಿ. ಈಗಷ್ಟೇ ಎರಡು ಚಿತ್ರಗಳಲ್ಲಿ ನಟಿಸಿದ್ದಾಳೆ. ಇಂಥ ಸಂದರ್ಭದಲ್ಲಿ ಸಾರಾಗೆ ಇವೆಲ್ಲಾ ಬೇಕಾಗಿತ್ತಾ ಎಂದು ಸೈಫ್ ಸಿಟ್ಟಾಗಿದ್ದರು. ಅಷ್ಟೇ ಅಲ್ಲ, ಮುಂಬೈನಲ್ಲಿ ಸಾರಾ ವಿಚಾರಣೆ ವೇಳೆ, ಕರೀನಾ ಮತ್ತು ತೈಮುರ್ ಜತೆಗೆ ದೆಹಲಿಗೆ ಹೋಗಿದ್ದರು.
ಆ ಕಡೆ ಅಪ್ಪ ಸಿಟ್ಟು ಮಾಡಿಕೊಂಡು ದೂರಾದ ಹಿನ್ನೆಲೆಯಲ್ಲಿ ತಬ್ಬಿಬ್ಬಾದ ಸಾರಾ, ಅಜ್ಜಿ ಶರ್ಮಿಳಾ ಠ್ಯಾಗೋರ್ ಅವರ ಮೊರೆ ಹೋಗಿದ್ದರು ಮತ್ತು ಹೇಗಾದರೂ ಈ ಪ್ರಕರಣದಲ್ಲಿ ತಮಗೆ ಸಹಾಯ ಮಾಡುವಂತೆ ದುಂಬಾಲು ಬಿದ್ದಿದ್ದರು ಎಂದು ಸುದ್ದಿಯಾಗಿತ್ತು.
ಇದನ್ನೂ ಓದಿ: ಬಂಧನವಾಗಿ ತಿಂಗಳ ಬಳಿಕ ರಿಯಾ ಚಕ್ರವರ್ತಿಗೆ ಜಾಮೀನು
ಆದರೆ, ತಾನು ಮಗಳನ್ನು ದೂರ ಮಾಡಿಲ್ಲ ಎಂದು ಸೈಫ್ ಅಲಿ ಖಾನ್ ಇದೀಗ ಹೇಳಿಕೊಂಡಿದ್ದಾರೆ. ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಅವರು, ‘ನಾನು ಮೂರೂ ಮಕ್ಕಳನ್ನು ಬಹಳ ಪ್ರೀತಿಸುತ್ತೇನೆ ಮತ್ತು ಅವರಿಗೆ ಯಾವಾಗ ಸಮಸ್ಯೆ ಎದುರಾದರೂ ನಾನು ಜತೆಗಿರುತ್ತೇನೆ. ತೈಮುರ್ ಚಿಕ್ಕವನಾಗಿರುವುದರಿಂದ ನಾನು ಅವನ ಜತೆಗೆ ಹೆಚ್ಚು ಸಮಯ ಕಳೆಯಬಹುದು. ಹಾಗಂತ ಇಬ್ರಾಹಿಂ ಮತ್ತು ಸಾರಾಳನ್ನು ದೂರ ಮಾಡಿಲ್ಲ. ನನ್ನ ಮೂರೂ ಮಕ್ಕಳಿಗೂ ಹೃದಯದಲ್ಲಿ ಜಾಗ ಇದೆ’ ಎಂದು ಅವರು ಹೇಳಿಕೊಂಡಿದ್ದಾರೆ.