ನವದೆಹಲಿ: ಟೋಕಿಯೊ ಒಲಿಂಪಿಕ್ಸ್ಗೆ ಅರ್ಹತೆ ಗಿಟ್ಟಿಸಿಕೊಳ್ಳುವ ಕನಸಿನಲ್ಲಿರುವ ಭಾರತೀಯ ಈಜುಪಟುಗಳಾದ ವೀರ್ಧವಳ್ ಖಾಡೆ, ಶ್ರೀಹರಿ ನಟರಾಜ್ ಹಾಗೂ ಕುಶಾಗ್ರ ರಾವತ್ ತಿಂಗಳಾಂತ್ಯದಲ್ಲಿ ದುಬೈನಲ್ಲಿ ಅಭ್ಯಾಸ ಕೈಗೊಳ್ಳಲಿದ್ದಾರೆ ಎಂದು ಭಾರತೀಯ ಕ್ರೀಡಾ ಪ್ರಾಧಿಕಾರ (ಸಾಯ್) ತಿಳಿಸಿದೆ. ಕೋವಿಡ್-19 ರಿಂದಾಗಿ ಕಳೆದ 5 ತಿಂಗಳಿಂದ ಈಜು ಪಟುಗಳು ಅಭ್ಯಾಸ, ತರಬೇತಿಯಿಂದ ಹೊರಗುಳಿದಿದ್ದರು. ಭಾರತದ ಮೂವರು ಈಜುಪಟುಗಳು ದುಬೈನ ಅಕ್ವಾ ನೇಷನ್ ಸ್ವಿಮ್ಮಿಂಗ್ ಅಕಾಡೆಮಿಯಲ್ಲಿ ಕೋಚ್ ಎ.ಸಿ.ಜಯರಾಜನ್ ಮಾರ್ಗದರ್ಶನದಲ್ಲಿ 2 ತಿಂಗಳ ಕಾಲ ತರಬೇತಿ ಪಡೆಯಲಿದ್ದಾರೆ. ತರಬೇತಿಗೆ 35 ಲಕ್ಷ ರೂಪಾಯಿ ವೆಚ್ಚಮಾಡಲಾಗುತ್ತಿದೆ ಎಂದು ಸಾಯ್ ಮೂಲಗಳು ತಿಳಿಸಿವೆ. ಭಾರತೀಯ ಈಜು ಫೆಡರೇಷನ್ (ಎಸ್ಎಫ್ ಐ) ಮೂವರ ವೀಸಾ ಪ್ರಕ್ರಿಯೆಯನ್ನು ಚುರುಕುಗೊಳಿಸಿದ್ದು, ಇದೇ ತಿಂಗಳ ಅಂತ್ಯದಲ್ಲಿ ದುಬೈಗೆ ಕಳುಹಿಸುವ ಯೋಚನೆಯಲ್ಲಿದೆ.
