ನವದೆಹಲಿ: ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಸೇರಿದಂತೆ ಹಲವಾರು ನಟಿಯರು, ಉದ್ಯಮಿಗಳಿಗೆ ಕೋಟ್ಯಂತರ ರೂಪಾಯಿಗಳ ಗಿಫ್ಟ್ ಕೊಟ್ಟು ಬುಟ್ಟಿಗೆ ಬೀಳಿಸಿಕೊಂಡದ್ದೂ ಅಲ್ಲದೇ ಸುಮಾರು 200 ಕೋಟಿ ರೂಪಾಯಿ ವಂಚನೆ ಮಾಡಿ ಕಂಬಿ ಎಣಿಸುತ್ತಿರುವ ಸುಕೇಶ್ ಚಂದ್ರಶೇಖರ್ ಈಗ ಜೈಲಿನಲ್ಲಿ ಉಪವಾಸ ಕುಳಿತಿದ್ದಾನೆ. ಇದಕ್ಕೆ ಕಾರಣ ತನಗೆ ತನ್ನ ಪತ್ನಿಯ ಬಳಿ ಕರೆದುಕೊಂಡು ಹೋಗುತ್ತಿಲ್ಲ ಎಂದು!
ಸುಕೇಶ್ ಚಂದ್ರಶೇಖರ್ ಜತೆ ಈತನ ಪತ್ನಿ ಲೀನಾ ಮರಿಯಾ ಪೌಲ್ ಕೂಡ ಜೈಲಿನಲ್ಲಿ ಇದ್ದಾಳೆ. ವಂಚನೆ ಮಾಡಲು, ನಟಿಯರನ್ನು ಬುಟ್ಟಿಗೆ ಹಾಕಿಕೊಳ್ಳಲು ಪತಿಗೆ ಎಲ್ಲಾ ರೀತಿಯಿಂದಲೂ ಸಹಾಯ ಮಾಡಿರುವ ಆರೋಪ ಮೇಲೆ ಲೀನಾ ಕೂಡ ಜೈಲಿನಲ್ಲಿದ್ದು, ಆಕೆಯನ್ನು ಬೇರೆ ಕಡೆ ಇಡಲಾಗಿದೆ. ಇದೀಗ ಆಕೆಯನ್ನು ನೋಡಬೇಕು ಎಂಬ ಪಟ್ಟು ಹಿಡಿದಿದ್ದಾನೆ ಸುಕೇಶ್.
ಜೈಲು ಸೇರುತ್ತಿದ್ದಂತೆಯೇ ಅನಾರೋಗ್ಯಪೀಡಿತನಾಗಿರುವ ಸುಕೇಶ್ನಿಗೆ ಸದ್ಯ ಚಿಕಿತ್ಸೆ ನೀಡಲಾಗುತ್ತಿದೆ. ಆದರೆ ಆತ ಉಪವಾಸ ಕುಳಿತಿರುವ ಕಾರಣ, ಚಿಕಿತ್ಸೆ ನೀಡಲು ಕಷ್ಟವಾಗುತ್ತಿದೆ. ವಿಶೇಷ ತಂಡವು ಈತನ ಚಲನವಲನಗಳ ಮೇಲೆ ಕಣ್ಣಿಟ್ಟಿದ್ದು, ಉಪವಾಸ ಕೈಬಿಡುವಂತೆ ಮನವೊಲಿಸುತ್ತಿದೆ. ಆದರೆ ಪತ್ನಿಯ ಬಳಿ ಕರೆದುಕೊಂಡು ಹೋಗುವವರೆಗೂ ಉಪವಾಸ ಕೈಬಿಡುವುದಿಲ್ಲ ಎಂದು ಸುಕೇಶ್ ಪಟ್ಟು ಹಿಡಿದಿದ್ದಾನೆ ಎನ್ನಲಾಗಿದೆ.
ಆದರೆ ಜೈಲಿನ ನಿಯಮಗಳ ಪ್ರಕಾರ ಈ ರೀತಿ ಅನುಮತಿ ನೀಡುವುದು ಕಷ್ಟ. ನಿಯಮದ ಪ್ರಕಾರ, ಒಂದು ತಿಂಗಳಿಗೆ ಎರಡು ಬಾರಿ ಮಾತ್ರ ಒಳ ಜೈಲಿನ ಕೈದಿಗಳ ಭೇಟಿಗೆ ಅನುವು ಮಾಡಿಕೊಡಲಾಗುತ್ತದೆ. ಆದರೆ ಇದಾಗಲೇ ಸುಕೇಶ್ ಪದೇ ಪದೇ ಪತ್ನಿಯನ್ನು ಭೇಟಿಯಾಗುತ್ತಲೇ ಇದ್ದು, ಮತ್ತೆ ಅದೇ ಪಟ್ಟು ಹಿಡಿದು ಕುಳಿತಿದ್ದಾನೆ. ಈ ಹಿಂದೆಯೂ ಇದೇ ನಾಟಕ ಮಾಡಿದ್ದ. ಆಗ ಪತ್ನಿಯನ್ನು ನೋಡಲು ಅವಕಾಶ ಸಿಕ್ಕಿದ್ದರಿಂದ ಈಗ ಮತ್ತೆ ಅದನ್ನೇ ಶುರು ಹಚ್ಚಿಕೊಂಡಿದ್ದಾನೆ. ಉಪವಾಸದಿಂದಾಗಿ ಸುಕೇಶ್ 5 ಕೆ.ಜಿ ತೂಕ ಕಳೆದುಕೊಂಡಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.
ಅಂದಹಾಗೆ ಸುಕೇಶ್ ವಿವಿಧ ಉದ್ಯಮಿಗಳಿಗೆ ಅವರಿಗೆ ತಿಳಿಯದಂತೆ 200 ಕೋಟಿ ರೂಪಾಯಿ ವಂಚನೆ ಮಾಡಿದ್ದಾನೆ. ಈ ವಂಚನೆ ಹಣದಲ್ಲಿ ನಟಿಯರು ಹಾಗೂ ಸೆಲೆಬ್ರಿಟಿಗಳಿಗೆ ದುಬಾರಿ ಗಿಫ್ಟ್ ಕೊಟ್ಟು ಅವರನ್ನು ಬುಟ್ಟಿಗೆ ಹಾಕಿಕೊಳ್ಳುತ್ತಿದ್ದ.
ಈತನ ಅತಿ ಸಮೀಪದ ನಿಕಟವರ್ತಿಯಾಗಿದ್ದ ಹಲವು ಯುವತಿಯರ ತನಿಖೆ ನಡೆಸಿದ್ದಾಗ ಸಿಕ್ಕಿದ್ದು ನಟಿ ಜಾಕ್ವೆಲಿನ್. ತನಿಖೆಯ ಭಾಗವಾಗಿ ಜಾಕ್ವೆಲಿನ್ ಅವರ ಆಸ್ತಿಯನ್ನು ತನಿಖಾಧಿಕಾರಿಗಳು ಇದಾಗಲೇ ಜಪ್ತಿ ಮಾಡಿದ್ದಾರೆ. 7.27 ಕೋಟಿ ರೂಪಾಯಿ ಮೌಲ್ಯದ ವಸ್ತುಗಳು ಹಾಗೂ ಹಲವಾರು ಕೋಟಿ ರೂಪಾಯಿ ಆಸ್ತಿ ಜಪ್ತಿ ಮಾಡಿದ್ದಾರೆ.
ಜಿಮ್ ಉಡುಗೆಗಾಗಿ ಗುಚಿ ಬಟ್ಟೆಗಳು, ಶೂಗಳು, ರೋಲೆಕ್ಸ್ ವಾಚ್, 15 ಜೋಡಿ ಕಿವಿಯೋಲೆಗಳು, 5 ದುಬಾರಿ ಬ್ಯಾಗ್ಗಳು, ಹರ್ಮ್ಸ್ ಬಳೆಗಳು ಮತ್ತು ಎಲ್ವಿ ಬ್ಯಾಗ್ಗಳು ಈ ಐಷಾರಾಮಿ ಪಟ್ಟಿಯಲ್ಲಿ ಸೇರಿವೆ. 52 ಲಕ್ಷ ರೂಪಾಯಿ ಮೌಲ್ಯದ ಕುದುರೆ, 9 ಲಕ್ಷ ಮೌಲ್ಯದ ಪರ್ಷಿಯನ್ ಬೆಕ್ಕು, ರತ್ನಗಳಿಂದ ಕೂಡಿದ ಕಿವಿಯೋಲೆಗಳು ಮತ್ತು ಹರ್ಮ್ಸ್ ಬ್ರೇಸ್ಲೆಟ್ ಸೇರಿದಂತೆ 52 ಲಕ್ಷ ಮೌಲ್ಯದ ಕುದುರೆ ಪಡೆದಿರುವ ಬಗ್ಗೆ ಜಾಕ್ವೆಲಿನ್ ಒಪ್ಪಿಕೊಂಡಿದ್ದಾರೆ.
15 ಮಂದಿ ಅಕೌಂಟ್ಗೆ ಎಸ್ಬಿಐನಿಂದ 1.5 ಕೋಟಿ ರೂ: ಮೋದಿ ಕೊಟ್ಟರೆಂದು ಕುಣಿದಾಡಿದ ಗ್ರಾಹಕರು- ಆಗಿದ್ದೇನು?
ಕಣ್ಣೆದುರೇ ಮಗನ ಕೊಲೆಯಾದರೂ ಸಿಗಲಿಲ್ಲ ನ್ಯಾಯ: ದಯಾಮರಣಕ್ಕೆ ಕೋರಿದ ಮೈಸೂರು ಕುಟುಂಬ
ಬೆಂಗಳೂರಿನ ಬೈಕರ್ ರಾಜಸ್ಥಾನದಲ್ಲಿ ಸಾವು: ಕೇಸ್ ಕ್ಲೋಸ್ ಎನ್ನುವಷ್ಟರಲ್ಲೇ ಪತ್ನಿಯತ್ತ ಬೊಟ್ಟು ಮಾಡಿದ ಹೆಲ್ಮೆಟ್!