ಮೂಗು ತೂರಿಸಲು ಬಂದ್ರೆ ಇತಿಹಾಸದಲ್ಲಿ ಕಂಡರಿಯದ ಪರಿಣಾಮ ಎದುರಿಸಬೇಕಾಗತ್ತೆ: ಪುತಿನ್ ಎಚ್ಚರಿಕೆ!

ಮಾಸ್ಕೊ: ಯೂಕ್ರೇನ್​ ವಿರುದ್ಧ ಸಮರ ಸಾರಿರುವ ರಷ್ಯಾದ ವಿರುದ್ಧ ಹಲವು ರಾಷ್ಟ್ರಗಳು ವಿರೋಧ ವ್ಯಕ್ತಪಡಿಸಿವೆ. ಕೆಲವು ರಾಷ್ಟ್ರಗಳು ಯುದ್ಧ ನಿಲ್ಲಿಸುವಂತೆ ರಷ್ಯಾ ಅಧ್ಯಕ್ಷ ವ್ಲಾದಿಮಿರ್​ ಪುತಿನ್​ ಅವರಿಗೆ ಹೇಳುತ್ತಿವೆ. ಅದರಲ್ಲಿಯೂ ಪಶ್ಚಿಮದಲ್ಲಿರುವ ಯೂಕ್ರೇನ್​ನ ಮಿತ್ರರಾಷ್ಟ್ರಗಳು ಯೂಕ್ರೇನ್​ಗೆ ಬೆಂಬಲ ನೀಡುತ್ತಿವೆ. ಇದು ಪುತಿನ್​ ಅವರ ಕೆಂಗಣ್ಣಿಗೆ ಗುರಿಯಾಗಿದೆ.

ಯಾರೇ ಆದರೂ ಹೊರಗಿನಿಂದ ಹಸ್ತಕ್ಷೇಪ ಮಾಡುವ ಕೆಲಸ ಮಾಡಿದರೆ ನೀವು ಇತಿಹಾಸದಲ್ಲಿ ಎಂದಿಗೂ ಕಂಡಿರದ ಹೆಚ್ಚಿನ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ತಮಗೆ ಬುದ್ಧಿ ಹೇಳಲು ಬಂದಿರುವ ಪಶ್ಚಿಮ ರಾಷ್ಟ್ರಗಳಿಗೆ ಅವರು ಎಚ್ಚರಿಸಿದ್ದಾರೆ.

ಟಿವಿ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಪುತಿನ್​, ಈ ಎಚ್ಚರಿಕೆಯನ್ನು ನೀಡಿದ್ದಾರೆ. ಯೂಕ್ರೇನ್​ ವಿರುದ್ಧ ರಷ್ಯಾ ಯುದ್ಧ ಘೋಷಿಸಿದ ಬೆನ್ನಲ್ಲೇ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ತುರ್ತು ಸಭೆಯನ್ನು ಕರೆದಿತ್ತು. ಈ ಸಂದರ್ಭದಲ್ಲಿ ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆ್ಯಂಟೊನಿಯೊ ಗುಟೆರೆಸ್ ಪುತಿನ್​ ಅವರನ್ನು ಉದ್ದೇಶಿಸಿ, "ನಿಮ್ಮ ಪಡೆಗಳು ಯೂಕ್ರೇನ್ ಮೇಲೆ ದಾಳಿ ಮಾಡುವುದನ್ನು ನಿಲ್ಲಿಸಿ, ಶಾಂತಿಗೆ ಅವಕಾಶ ನೀಡಿ. ಈಗಾಗಲೇ ಹಲವಾರು ಜನರು ಮೃತಪಟ್ಟಿದ್ದಾರೆ' ಎಂದಿತ್ತು. ಇದಕ್ಕೆ ಪುತಿನ್​ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

https://www.vijayavani.net/s-ukrain-request-indian-pm-to-stop-war/

https://www.vijayavani.net/s-investors-wealth-slump-over-rs-8-lakh-crore-in-morning-trade/