ಪತನದ ಅಂಚಲ್ಲಿ ಮಹಾರಾಷ್ಟ್ರ ಸರ್ಕಾರ- ಇ.ಡಿ ವಿರುದ್ಧ ಬೀದಿಯಲ್ಲಿ ಕೈ ನಾಯಕರು: ಮಾಲ್ಡೀವ್ಸ್​ಗೆ ಹಾರಿದ ಪ್ರಿಯಾಂಕಾ!

ಮುಂಬೈ: ಶಿವಸೇನೆಯ ಮುಖಂಡ ಏಕನಾಥ್​ ಶಿಂಧೆ ಕೊಟ್ಟಿರುವ ಭರ್ಜರಿ ಏಟಿಗೆ ಮಹಾರಾಷ್ಟ್ರ ಸರ್ಕಾರ ಅಲ್ಲೋಲ ಕಲ್ಲೋಲವಾಗಿದೆ. ಯಾವುದೇ ಕ್ಷಣದಲ್ಲಿಯೂ ಸರ್ಕಾರ ಪತನವಾಗುವ ಸಾಧ್ಯತೆ ಇದೆ. ಇನ್ನೊಂದೆಡೆ, ರಾಹುಲ್​ ಗಾಂಧಿ ಮತ್ತು ಸೋನಿಯಾ ಗಾಂಧಿ ಅವರನ್ನು ಜಾರಿ ನಿರ್ದೇಶನಾಲಯ ವಿಚಾರಣೆಗೆ ಕರೆದಿರುವುದನ್ನು ಪ್ರಶ್ನಿಸಿ ದೇಶದ ಕಾಂಗ್ರೆಸ್ ಮುಖಂಡರೆಲ್ಲಾ ಭಾರಿ ಪ್ರತಿಭಟನೆ ಮುಂದುವರೆಸಿದ್ದಾರೆ. ಇದರ ನಡುವೆಯೇ ಮಹಾರಾಷ್ಟ್ರದ ಮೈತ್ರಿಕೂಟದ ಭಾಗವಾಗಿರುವ ಪ್ರಿಯಾಂಕಾ ಗಾಂಧಿ ಮಾಲ್ಡೀವ್ಸ್​ನತ್ತ ಪ್ರಯಾಣ ಬೆಳೆಸಿದ್ದು, ಇದೀಗ ಭಾರಿ ಟೀಕೆಗೆ ಗುರಿಯಾಗಿದೆ.

ಮಹಾರಾಷ್ಟ್ರದಲ್ಲಿ ಸದ್ಯ ಇರುವುದು ಉದ್ಧವ್ ಠಾಕ್ರೆ ನೇತೃತ್ವದ ಶಿವಸೇನೆ-ಕಾಂಗ್ರೆಸ್-ಎನ್​ಸಿಪಿ ಸರ್ಕಾರ. ಈ ಹಿನ್ನೆಲೆಯಲ್ಲಿ ಸರ್ಕಾರ ಇಂಥ ಬಿಕ್ಕಟ್ಟಿನ ಸ್ಥಿತಿಯಲ್ಲಿ ಇರುವಾಗ ಈ ರೀತಿ ವಿದೇಶಕ್ಕೆ ಹೊರಟಿರುವುದು ಏಕೆ ಎಂಬ ಬಗ್ಗೆ ಚರ್ಚೆ ಶುರುವಾಗಿದೆ.

ಮುಂಬೈನಲ್ಲಿ ಕೆಲವು ಗಂಟೆ ಇದ್ದರೂ ಯಾವುದೇ ರಾಜಕೀಯ ನಾಯಕರನ್ನು ಭೇಟಿ ಮಾಡದೆಯೇ ಮಾಲ್ಡೀವ್ಸ್​ ವಿಮಾನ ಏರಿದ್ದಾರೆ ಎಂದು ಕೆಲವು ವರದಿಗಳು ಹೇಳಿದ್ದರೆ, ನಾಯಕರನ್ನು ಭೇಟಿ ಮಾಡಿ ಹೋಗಿದ್ದಾರೆ ಎಂದು ಕಾಂಗ್ರೆಸ್ಸಿಗರು ಹೇಳುತ್ತಿದ್ದಾರೆ.

ಅದೇನೇ ಇದ್ದರೂ ಇಷ್ಟು ದಿನ ರಾಹುಲ್​ ಗಾಂಧಿಯವರ ವಿದೇಶ ಪ್ರಯಾಣದ ಬಗ್ಗೆ ಕೇಳಿಬರುತ್ತಿದ್ದ ಟೀಕೆಗಳು ಈಗ ಪ್ರಿಯಾಂಕಾನತ್ತ ತಿರುಗಿದೆ. ಜಾರಿ ನಿರ್ದೇಶನಾಲಯವು ರಾಹುಲ್​ ಗಾಂಧಿ, ಸೋನಿಯಾ ಗಾಂಧಿಯವರಿಗೆ ನೋಟಿಸ್​ ನೀಡಿರುವುದಕ್ಕೆ ಎಲ್ಲಾ ಕಾಂಗ್ರೆಸ್​ ಮುಖಂಡರು ಬೀದಿಗಿಳಿದಿದ್ದರೆ, ಇತ್ತ ಪ್ರಿಯಾಂಕಾ ಮಾತ್ರ ಈ ಹೊತ್ತಿನಲ್ಲಿ ವಿದೇಶಕ್ಕೆ ತೆರಳಿರುವುದು ಹಾಸ್ಯಾಸ್ಪದ ಎಂದು ಬಿಜೆಪಿ ಮುಖಂಡ ಅಮಿತ್​ ಮಾಳ್ವಿಯಾ ಹೇಳಿದ್ದಾರೆ.

ಮಾಲ್ಡೀವ್ಸ್​ನಲ್ಲಿರುವ ತಮ್ಮ ಪುತ್ರಿಯನ್ನು ಪ್ರಿಯಾಂಕಾ ನೋಡಲು ಹೋಗುತ್ತಿದ್ದಾರೆ ಎಂದು ಇನ್ನೊಂದು ಮೂಲಗಳು ಹೇಳಿವೆ. ಪ್ರಿಯಾಂಕಾ ಪುತ್ರಿ 20 ವರ್ಷದವಳಾಗಿದ್ದು, ಮಾಲ್ಡೀವ್ಸ್​ನಲ್ಲಿ ಡೈವಿಂಡ್​ ಸ್ಕೂಲ್​ನಲ್ಲಿ ತರಬೇತಿ ನೀಡುತ್ತಿದ್ದಾಳೆ. ಅವಳನ್ನು ನೋಡಲು ಪ್ರಿಯಾಂಕಾ ಹೋಗಿದ್ದಾರೆ ಎನ್ನಲಾಗಿದೆ. ಅವರು ಜೂನ್​ 30ರಂದು ವಾಪಸ್ ಬರುತ್ತಾರೆ ಎನ್ನಲಾಗಿದೆ.

https://www.vijayavani.net/s-17-shiv-sena-mps-in-touch-with-eknath-shinde/

https://www.vijayavani.net/s-ready-to-resign-cm-thakre-in-fb-live/

https://www.vijayavani.net/s-shinde-camp-releases-pictures-of-nitin-deshmukh/

https://www.vijayavani.net/s-dont-know-of-shiv-sena-mlas-in-guwahati/

https://www.vijayavani.net/s-rahul-in-ed-explaing-about-50-hrs-journey/