ಪರಸ್ಪರ ಒಪ್ಪಿಗೆ ಮೇರೆಗೆ ಡಿವೋರ್ಸ್​ಗೆ ಅರ್ಜಿ ಸಲ್ಲಿಸಿದರೂ ಆರು ತಿಂಗಳು ಕಾಯಲೇಬೇಕಾ? ಕಾನೂನು ಇಲ್ಲಿದೆ...

ಉತ್ತರ: ಹಿಂದೂ ವಿವಾಹ ಕಾಯ್ದೆಯ ಕಲಂ13(ಬಿ)ರ ಅಡಿಯಲ್ಲಿ ದಂಪತಿಗಳು ಪರಸ್ಪರ ಒಪ್ಪಿಗೆಯಿಂದ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಬಹುದು. ಹಾಗೆ ಸಲ್ಲಿಸಿದಾಗ ನೀವು ಅರ್ಜಿ ಸಲ್ಲಿಸಿದ ದಿನಾಂಕದಿಂದ ಆರುತಿಂಗಳ ನಂತರ ಹದಿನೆಂಟು ತಿಂಗಳ ಒಳಗೆ ವಿಚ್ಛೇದನದ ಆದೇಶವನ್ನು ನ್ಯಾಯಾಲಯ ಕೊಡುತ್ತದೆ.

ಪ್ರಕರಣ ದಾಖಲಿಸಿದ ಆರು ತಿಂಗಳ ಒಳಗೆ ವಿಚ್ಛೇದನ ಕೊಡುವ ಅವಕಾಶ ಸಾಮಾನ್ಯವಾಗಿ ಇರುವುದಿಲ್ಲ. ಈ ಆರು ತಿಂಗಳನ್ನು ಕೂಲಿಂಗ್ ಪೀರಿಯಡ್ ಅಥವಾ ವೈಟಿಂಗ್ ಪೀರಿಯಡ್ ಎಂದು ಕರೆಯಲಾಗುತ್ತದೆ. ವಿಚ್ಛೇದನಕ್ಕೇ ಪ್ರಕರಣ ದಾಖಲಿಸಿದ್ದಾಗಲೂ ಸಹ ಈ ಆರು ತಿಂಗಳ ಕಾಯುವಿಕೆಯ ಸಮಯದಲ್ಲಿ ದಂಪತಿಗಳು ಮನಸ್ಸನ್ನು ಪರಿವರ್ತಿಸಿಕೊಂಡು ಮತ್ತೆ ದಂಪತಿಗಳಾಗಿಯೇ ಮುಂದುವರೆಯಲು ಸಾಧ್ಯವಾಗಬಹುದು, ಪ್ರಕರಣವನ್ನು ಹಿಂದೆ ಪಡೆಯ ಬಹುದು ಎನ್ನುವ ಉದ್ದೇಶದಿಂದ ಈ ಆರು ತಿಂಗಳ ಕಾಯುವಿಕೆಯ ಸಮಯವನ್ನು ಕಾನೂನಿನಲ್ಲಿ ನಮೂದಿಸಲಾಗಿದೆ.

ಆದರೂ ನಮ್ಮ ಸರ್ವೋಚ್ಛ ನ್ಯಾಯಾಲಯದ ಅಮರ್ ದೀಪ್ ಸಿಂಗ್ ವಿರುದ್ಧ ಹರ್ವೀನ್ ಕೌರ್ ಪ್ರಕರಣದಲ್ಲಿ( ಸಿವಿಲ್ ಅಪೀಲು ಸಂಖ್ಯೆ 11158 /2017) ಮಾನ್ಯ ಸರ್ವೋಚ್ಛ ನ್ಯಾಯಾಲಯ ಈ ಕೆಳಗಿನ ಸಂದರ್ಭಗಳಲ್ಲಿ ಆರು ತಿಂಗಳ ಕಾಯುವಿಕೆಯ ಸಮಯವನ್ನು ಮನ್ನಾ ಮಾಡಬಹುದೆಂದು ತಿಳಿಸಿದೆ.

(1) ಪರಸ್ಪರ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸುವ ಮುಂಚೆಯೇ ಕಲಂ 13(ಬಿ)(2) ರಲ್ಲಿ ತಿಳಿಸಿರುವ ಆರು ತಿಂಗಳ ಸಮಯ ಮತ್ತು 13(ಬಿ) (1)ಎಲ್ಲಿ ತಿಳಿಸಿರುವ ಒಂದು ವರ್ಷದ ಸಮಯ ಆಗಿಹೋಗಿರ ಬೇಕು. ಅಂದರೆ ಪ್ರಕರಣ ದಾಖಲಿಸುವುದಕ್ಕಿಂತ ಒಂದೂವರೆ ವರ್ಷಕ್ಕೂ ಮೇಲಾಗಿ ದಂಪತಿಗಳಲ್ಲಿ ವೈವಾಹಿಕ ಸಂಬಂಧ ಇಲ್ಲದೇ ಅವರಿಬ್ಬರೂ ಒಬ್ಬರಿಂದ ಒಬ್ಬರು ಪ್ರತ್ಯೇಕವಾಗಿ ವಾಸಿಸುತ್ತಿರಬೇಕು.

(2) ಕೌಟುಂಬಿಕ ನ್ಯಾಯಾಲಯಗಳ ಕಾಯ್ದೆ ಮತ್ತು , ಸಿವಿಲ್ ಪ್ರೋಸಿಜರ್ ಕೋಡ್ ನ ಕಲಂ 89ರ ಕೆಳಗೆ ಸೂಚಿಸಿರುವಂತೆ ಮಧ್ಯಸ್ಥಿಕೆ/ಸಂಧಾನ ಇವುಗಳ ಪ್ರಯತ್ನದ ನಂತರವೂ ದಂಪತಿಗಳಲ್ಲಿರುವ ಭಿನ್ನಾಭಿಪ್ರಾಯವನ್ನು ದೂರ ಮಾಡಲು ವಿಫಲವಾಗಿರ ಬೇಕು.

(3) ದಂಪತಿ ನಡುವೆ ಆಲಿಮೊನಿ/ಶಾಶ್ವತ ಜೀವನಾಂಶ ಮತ್ತು ಮಕ್ಕಳ ಕಸ್ಟಡಿಯ ವಿಷಯದಲ್ಲಿ ಭಿನ್ನಾಭಿಪ್ರಾಯ ತೀರ್ಮಾನವಾಗಿರಬೇಕು.

(4) ಆರು ತಿಂಗಳ ಕಾಯುವಿಕೆಯ ಸಮಯದಿಂದ ದಂಪತಿ ತಮ್ಮ ಜೀವನವನ್ನು ಪುನರ್ ರೂಪಿಸಿಕೊಳ್ಳಲು ತೊಡಕುಗಳು ಹೆಚ್ಚಾಗುತ್ತದೆ ಎನ್ನುವ ಅಂಶವಿರಬೇಕು.

ಈ ಹಿನ್ನೆಲೆಯಲ್ಲಿ ನೋಡಿದಾಗ ನೀವು ಬೇಕಿದ್ದರೆ ಪರಸ್ಪರ ಒಪ್ಪಿಗೆಯಿಂದ ವಿಚ್ಛೇದನ ಪಡೆಯಲು ಪ್ರಕರಣ ದಾಖಲಿಸಿ ಅದರ ಜೊತೆಗೆ ಆರು ತಿಂಗಳ ಕಾಯುವಿಕೆಯ ಸಮಯವನ್ನು ಮನ್ನಾ ಮಾಡಲು ಅರ್ಜಿ ಸಲ್ಲಿಸಬಹುದು. ನಿಮ್ಮ ಪ್ರಮಾಣ ಪತ್ರದಲ್ಲಿ ಮಾನ್ಯ ಸರ್ವೋಚ್ಛ ನ್ಯಾಯಾಲಯ ಸೂಚಿಸಿರುವ ಎಲ್ಲ ಅಂಶಗಳೂ ಇದ್ದರೆ , ಕೌಟುಂಬಿಕ ನ್ಯಾಯಾಲಯ ಆರು ತಿಂಗಳ ಕಾಯುವಿಕೆಯ ಸಮಯವನ್ನು ಮನ್ನಾ ಮಾಡಬಹುದು. ಏನೇ ಆಗಲಿ ಸಾಮಾನ್ಯವಾಗಿ ಕೌಟುಂಬಿಕ ನ್ಯಾಯಾಲಯ ಒಮ್ಮೆ ನಿಮ್ಮ ಪ್ರಕರಣವನ್ನು ಮಧ್ಯಸ್ಥಿಕೆ ಅಥವಾ ಸಂಧಾನಕ್ಕೆ ನ್ಯಾಯಾಲಯದ ಮೂಲಕವೂ ಕಳಿಸಿಕೊಡುತ್ತದೆ. ಅದರ ನಂತರವೂ ದಂಪತಿ ನಿಲವು ಬದಲಾಗದಿದ್ದರೆ ವಿಚ್ಛೇದನದ ಆದೇಶವನ್ನು ಮಾಡುತ್ತದೆ.

ಸೂಚನೆ: ಕಾನೂನಿಗೆ ಸಂಬಂಧಿಸಿದ ನಿಮ್ಮ ಪ್ರಶ್ನೆಗಳನ್ನು  lalitha.vijayavani@gmail.com ಗೆ ಕಳುಹಿಸಬಹುದು. (ಕೋರ್ಟ್‌ಗಳಲ್ಲಿ ಇತ್ಯರ್ಥಕ್ಕೆ ಬಾಕಿ ಇರುವ ಪ್ರಕರಣಗಳಿಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ದಯವಿಟ್ಟು ಕೇಳಬೇಡಿ)

ಕಾನೂನಿಗೆ ಸಂಬಂಧಿಸಿದ ಇತರ ಪ್ರಶ್ನೋತ್ತರಗಳಿಗಾಗಿ https://www.vijayavani.net/ ಗೆ ಭೇಟಿ ಕೊಟ್ಟು ಅಂಕಣ ವಿಭಾಗದಲ್ಲಿ ನ್ಯಾಯದೇವತೆ ಸೆಕ್ಷನ್​ ಮೇಲೆ ಕ್ಲಿಕ್​ ಮಾಡಿ.

https://www.vijayavani.net/s-nyayadevate-04-11/