ಸಿಡ್ನಿ: ಸಂಗಾತಿಯಿಂದ ಮಿಲನ ಬಯಸಿದಾಗ ಇವು ಸಿಳ್ಳೆಯ ಮೂಲಕ ಹಾಡು ಹೇಳುತ್ತವೆ, ಒಂದೇ ರೀತಿಯ ಹಾಡು ಕೇಳಿ ಸಂಗಾತಿಗೆ ಬೇಸರವಾಯಿತು ಎನ್ನಿಸಿದರೆ, ಸಿಳ್ಳೆ ಊದುವ ರೀತಿಯನ್ನು ಬದಲಿಸಿ ಬೇರೆ ಬೇರೆ ರೀತಿ ಹಾಡು ಹೇಳುತ್ತವೆ...
ಇದೇ ನೀಲಿ ತಿಮಿಂಗಲ. 80ಕ್ಕೂ ಅಧಿಕ ಪ್ರಭೇದಗಳು ತಿಮಿಂಗಲಗಳಲ್ಲಿ ಇದ್ದು, ಇವುಗಳ ಪೈಕಿ ಭಾರಿ ತೂಕದ ತಿಮಿಂಗಲ ಎಂದು ಪ್ರಸಿದ್ಧಿ ಪಡೆದಿರುವುದು ನೀಲಿ ತಿಮಿಂಗಲ, ಇವುಗಳ ನಾಲಗೆಯೇ ಆನೆಯಷ್ಟು ತೂಕ ತೂಗುತ್ತದಂತೆ!
ಇಂಥದ್ದೊಂದು ಅಪರೂಪದ ತಿಮಿಂಗಲವೀಗ ಅಳಿವಿನ ಅಂಚಿನಲ್ಲಿದೆ. ಆದರೆ ಕೆಲ ದಿನಗಳ ಹಿಂದೆ ಸಿಡ್ನಿಯ ಕರಾವಳಿಯಲ್ಲಿ ನೀಲಿ ತಿಮಿಂಗಲ ಕಾಣಿಸಿಕೊಂಡು ಅಚ್ಚರಿ ಮೂಡಿಸಿದೆ. ಒಂದು ಲಕ್ಷ ಕೆ.ಜಿಗೂ ಅಧಿಕ ಭಾರದ ತಿಮಿಂಗಲ ಇದು ಎನ್ನಲಾಗಿದೆ. ಕಳೆದ 100 ವರ್ಷಗಳಲ್ಲಿ ಈ ಗಾತ್ರದ ತಿಮಿಂಗಲ ಇದು ಮೂರನೆಯ ಬಾರಿ ಪತ್ತೆಯಾಗಿರುವುದು. ಆದರೆ ಹಿಂದೆ ಎರಡು ಬಾರಿ ಪತ್ತೆಯಾಗಿರುವ ತಿಮಿಂಗಲಗಳಿಗಿಂತಲೂ ಇದು ಅಧಿಕ ತೂಗುತ್ತದೆ ಎಂದಿದ್ದಾರೆ ತಜ್ಞರು.
