ಲಾಕ್‌ಡೌನ್‌ನಿಂದ ಪ್ರಾಣಿಗಳಿಗೂ ಬೊಜ್ಜು: ಆತಂಕದಲ್ಲಿ ಮೃಗಾಲಯ ಸಿಬ್ಬಂದಿ

ಇಂಗ್ಲೆಂಡ್‌: ಕರೊನಾವೈರಸ್‌ ಹಾಗೂ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಮನೆಯಲ್ಲಿಯೇ ಕುಳಿತು, ದೇಹಕ್ಕೆ ವ್ಯಾಯಾಮ ಇಲ್ಲದ ಹಿನ್ನೆಲೆಯಲ್ಲಿ ಹಲವರು ತಮ್ಮ ದೇಹದ ತೂಕವನ್ನು ಹೆಚ್ಚಿಸಿಕೊಂಡಿರುವುದು ಹೊಸ ವಿಷಯವಲ್ಲ.

ಪಾರ್ಕ್‌, ಜಿಮ್‌, ಈಜುಕೊಳ ಎಲ್ಲವೂ ಬಂದ್‌ ಆಗಿದ್ದ ಹಿನ್ನೆಲೆಯಲ್ಲಿ ಅಲ್ಲಿಗೆ ಹೋಗದೇ ಮನೆಯಲ್ಲಿಯೇ ಇದ್ದ ಕಾರಣ, ಬೊಜ್ಜು ಬೆಳೆಸಿಕೊಂಡಿರುವವರು ಹಲವರು. ಇದೀಗ ಲಾಕ್‌ಡೌನ್‌ ಮುಗಿದು ತಿಂಗಳಾದರೂ, ಕರೊನಾವೈರಸ್‌ ಇರುವ ಕಾರಣ, ಹೊರಗಡೆ ಹೋಗಲು ಜನರು ಹೆದರುತ್ತಿದ್ದಾರೆ.

ಆದರೆ ಈ ಸಮಸ್ಯೆ ಮನುಷ್ಯರಿಗೆ ಮಾತ್ರವಲ್ಲದೇ ಪ್ರಾಣಿಗಳಿಗೂ ಉಂಟಾಗಿದೆ. ಅದರಲ್ಲಿಯೂ ಮೃಗಾಲಯದಲ್ಲಿ ಇರುವ ಪ್ರಾಣಿಗಳಿಗೆ ಬೊಜ್ಜಿನ ಸಮಸ್ಯೆ ಉಂಟಾಗಿದ್ದು, ಅದೀಗ ಲಂಡನ್‌ನ ಮೃಗಾಲಯವೊಂದರ ಸಿಬ್ಬಂದಿಯ ತಲೆಕೆಡಿಸಿದೆ.

ಇದಾಗಲೇ ತಪಾಸಣೆ ಮಾಡಿರುವ ಪ್ರಾಣಿಗಳ ಪೈಕಿ ಹೆಚ್ಚಿನವು ದೈಹಿಕ ಚಟುವಟಿಕೆ ಇಲ್ಲದೇ, ಬೊಜ್ಜು ಬೆಳೆಸಿಕೊಂಡಿರುವುದು ಸಿಬ್ಬಂದಿಗೆ ಕಂಡುಬಂದಿದೆ. ಮೂರು ತಿಂಗಳ ಲಾಕ್ ‌ಡೌನ್ ಬಳಿಕ, ಜೂನ್‌ 15ರಿಂದ ಸೀಮಿತ ಮಟ್ಟದಲ್ಲಿ ಮೃಗಾಲಯವನ್ನು ವೀಕ್ಷಕರಿಗೆ ಮತ್ತೆ ಮುಕ್ತವಾಗಿಸಲಾಗಿದೆ. ಆದಾಯದ ಕೊರತೆಯ ಕಾರಣ ಲಂಡನ್ ಮೃಗಾಲಯವು ಗಂಭೀರವಾದ ಆರ್ಥಿಕ ಮುಗ್ಗಟ್ಟಿನಲ್ಲಿದೆ. ಮೃಗಾಲಯದ ಉಳಿವಿಗೆ ಸಾರ್ವಜನಿಕ ದೇಣಿಗೆಯನ್ನು ಪದಾಧಿಕಾರಿಗಳು ಕೋರಿದ್ದಾರೆ.

ಇದನ್ನೂ ಓದಿ: ಬೆಳ್ಳಂಬೆಳಗ್ಗೆಯೇ ಮೂವರು ಉಗ್ರರನ್ನು ಹೊಡೆದುರುಳಿಸಿದ ಯೋಧರು: ಓರ್ವ ಹುತಾತ್ಮ

ಇದು ಒಂದೆಡೆಯಾದರೆ ಕರೊನಾ ವೈರಸ್‌ ಭೀತಿಯಿಂದ ಪ್ರಾಣಿಗಳಿಗೆ ಯಾವುದೇ ದೈಹಿಕ ಚಟುವಟಿಕೆಗಳನ್ನು ಮಾಡಿಸುತ್ತಿರಲಿಲ್ಲ. ಹಲವು ಪ್ರಾಣಿಗಳನ್ನು ಪಂಜರದಿಂದ ಕೂಡ ಹೊರಕ್ಕೆ ಬಿಟ್ಟಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಇದ್ದಲ್ಲಿಯೇ ತಿಂದು, ಪ್ರಾಣಿಗಳು ಕೊಬ್ಬಿ ಹೋಗಿರುವುದಾಗಿ ಮೃಗಾಲಯ ಸಿಬ್ಬಂದಿ ಹೇಳಿದ್ದು. ಈ ನಿಟ್ಟಿನಲ್ಲಿ ಏನು ಕ್ರಮ ತೆಗೆದುಕೊಳ್ಳಬೇಕು ಎಂಬ ಚಿಂತೆಯಲ್ಲಿದ್ದಾರೆ.

https://www.vijayavani.net/s-senior-living-couple-of-the-world/