VIDEO| ಸೂಪರ್​ ಮಾರ್ಕೆಟ್​ಗೆ ನುಗ್ಗಿದ ಮಹಿಳೆಯಿಂದ ಅಸಹ್ಯ ಕೆಲಸ: ವೈರಲ್​ ಆಯ್ತು ಸಿಸಿಟಿವಿ ವಿಡಿಯೋ!

ಮಾಸ್ಕೋ: ಎಂತೆಂಥಾ ಖತರ್ನಾಕ್​ ಖದೀಮರು ಇರುತ್ತಾರೆ ಎಂಬುದಕ್ಕೆ ರಷ್ಯಾದ ಸೂಪರ್​ ಮಾರ್ಕೆಟ್​ ಒಂದರ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿರುವ ದೃಶ್ಯವು ಸಾಕ್ಷಿಯಾಗಿದೆ. ಶಾಪ್​ಗೆ ನುಗ್ಗಿದ ಮಹಿಳೆಯೊಬ್ಬಳು ಅಲ್ಲಿನ ದಿನಸಿಗಳನ್ನು ಕದ್ದು ತನ್ನ ಒಳ ಉಡುಪಿನ ಒಳಗೆ ಬಚ್ಚಿಟ್ಟುಕೊಳ್ಳುತ್ತಿರುವ ದೃಶ್ಯ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ​

ಈ ಘಟನೆ ದಕ್ಷಿಣ ರಷ್ಯಾದ ಕ್ರಾಸ್ನೊಡರ್​ ನಗರದಲ್ಲಿರುವ ಸೂಪರ್​ ಮಾರ್ಕೆಟ್​ನಲ್ಲಿ ನಡೆದಿದ್ದು, ಶಾಪ್​ ಒಳಗಡೆಯಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ರಕ್ಷಣಾ ಸಿಬ್ಬಂದಿ ಸಿಸಿಟಿವಿ ಪರಿಶೀಲಿಸುವಾಗ ಈ ಘಟನೆ ಬೆಳಕಿಗೆ ಬಂದಿದೆ.

ವಿಡಿಯೋದಲ್ಲಿ ಏನಿದೆ?: ವ್ಯಕ್ತಿಯೊಬ್ಬನ ಹಿಂದೆ ಶಾಪ್​ಗೆ ಪ್ರವೇಶಿಸುವ ಮಹಿಳೆ ಫ್ರೀಜರ್​ ಮೇಲಿನ ಕಪಾಟುಗಳಲ್ಲಿರುವ ವಸ್ತುಗಳಲ್ಲಿ ಒಂದೊಂದಾಗಿ ತನಗೆ ಬೇಕಾದುದ್ದನ್ನು ತೆಗೆದುಕೊಂಡು ತಾನುಟ್ಟ ಬಟ್ಟೆಯನ್ನು ಮೇಲೆತ್ತಿ ಒಳ ಉಡುಪಿನ ಒಳಗೆ ತರಾತುರಿಯಲ್ಲಿ ಇಟ್ಟುಕೊಳ್ಳುತ್ತಾಳೆ. ಒಟ್ಟು ಆರು ವಸ್ತುಗಳನ್ನು ಆಕೆ ಕದಿಯುವುದು ವಿಡಿಯೋದಲ್ಲಿ ದಾಖಲಾಗಿದೆ.

ಈ ಘಟನೆ ಅಕ್ಟೋಬರ್​ 5 ರಂದು ಸಂಜೆ 5.20 ಕ್ಕೆ ನಡೆದಿರುವುದಾಗಿ ವರದಿಯಾಗಿದೆ. ಇದಕ್ಕೆ ಸಂಬಂಧಿಸಿದ ವಿಡಿಯೋವನ್ನು ರಕ್ಷಣಾ ಸಿಬ್ಬಂದಿಗಳು ಜಾಲತಾಣಗಳಲ್ಲಿ ಹರಿಬಿಟ್ಟು ಇಂತಹ ವ್ಯಕ್ತಿಗಳ ಬಗ್ಗೆ ಎಚ್ಚರಿಕೆಯಿಂದಿರಿ ಎಂದು ಹೇಳಿದ್ದಾರೆ. ಸದ್ಯ ವಿಡಿಯೋ ವೈರಲ್​ ಆಗಿದ್ದು, ನೆಟ್ಟಿಗರು ಸಹ ತಮ್ಮದೇ ರೀತಿಯಲ್ಲಿ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಅವಳ ಒಳ ಉಡುಪು ಮ್ಯಾಜಿಕ್​ ಬ್ಯಾಗ್​ ರೀತಿ ಇದೆ. ಎಲ್ಲವನ್ನೂ ಅಡಗಿಸಿಡಬಹುದು ಎಂದು ನೆಟ್ಟಿಗರೊಬ್ಬರು ಹಾಸ್ಯ ಚಟಾಕಿ ಹಾರಿಸಿದ್ದಾರೆ.

ಇದೀಗ ಮಹಿಳೆ ವಿರುದ್ಧ ದೂರು ದಾಖಲಾಗಿದ್ದು, ಪೊಲೀಸರು ಆಕೆಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ. (ಏಜೆನ್ಸೀಸ್​) (ವಿಡಿಯೋ ಕೃಪೆ: ಡೈಲಿ ಮೇಲ್​)