ವಿಶ್ವಕಪ್​ ಭರ್ಜರಿ ನಿರ್ವಹಣೆಯಿಂದ ರೋಹಿತ್​ ಶರ್ಮಗೆ ಐಸಿಸಿ ರ‍್ಯಾಂಕಿಂಗ್​ನಲ್ಲಿ ಭಾರಿ ಬಡ್ತಿ

ದುಬೈ: ವಿಶ್ವಕಪ್​ನಲ್ಲಿ ಭಾರತ ತಂಡವನ್ನು ದಿಟ್ಟವಾಗಿ ಮುನ್ನಡೆಸುವ ಜತೆಗೆ ಬ್ಯಾಟಿಂಗ್​ನಲ್ಲೂ ಮಿಂಚುತ್ತಿರುವ ನಾಯಕ ರೋಹಿತ್​ ಶರ್ಮ ಐಸಿಸಿ ಏಕದಿನ ಬ್ಯಾಟಿಂಗ್​ ರ‍್ಯಾಂಕಿಂಗ್‌ನಲ್ಲಿ 5 ಸ್ಥಾನ ಬಡ್ತಿ ಸಂಪಾದಿಸಿದ್ದು, 6ನೇ ಸ್ಥಾನ ಅಲಂಕರಿಸಿದ್ದಾರೆ. ಶುಭಮಾನ್​ ಗಿಲ್​ 2ನೇ ಸ್ಥಾನ ಕಾಯ್ದುಕೊಂಡಿದ್ದಾರೆ. ಇದರಿಂದ ಟೀಮ್​ ಇಂಡಿಯಾದ ಇಬ್ಬರೂ ಆರಂಭಿಕರು ಅಗ್ರ 10ರೊಳಗೆ ಸ್ಥಾನ ಸಂಪಾದಿಸಿದ ವಿಶೇಷ ಸಾಧನೆ ದಾಖಲಾಗಿದೆ.

ವಿಶ್ವಕಪ್​ನಲ್ಲಿ ಸತತ 2 ಶತಕ ಸಿಡಿಸಿದ ದಣ ಆಫ್ರಿಕಾದ ವಿಕೆಟ್​ ಕೀಪರ್​-ಬ್ಯಾಟರ್​ ಕ್ವಿಂಟನ್​ ಡಿಕಾಕ್​ ಕೂಡ 3 ಸ್ಥಾನ ಬಡ್ತಿ ಪಡೆದಿದ್ದು, 3ನೇ ಸ್ಥಾನಕ್ಕೇರಿದ್ದಾರೆ. ಪಾಕ್​ ನಾಯಕ ಬಾಬರ್​ ಅಜಮ್​ ಅಗ್ರಸ್ಥಾನ ಕಾಯ್ದುಕೊಂಡಿದ್ದಾರೆ. ಜತೆಗೆ 2ನೇ ಸ್ಥಾನದಲ್ಲಿರುವ ಗಿಲ್​ಗಿಂತ ಮುನ್ನಡೆಯನ್ನು 18 ಅಂಕಗಳಿಗೆ ವಿಸ್ತರಿಸಿಕೊಂಡಿದ್ದಾರೆ.

ಬೌಲಿಂಗ್​ನಲ್ಲಿ ಅಗ್ರಸ್ಥಾನದಲ್ಲಿರುವ ಜೋಶ್​ ಹ್ಯಾಸಲ್​ವುಡ್​ಗಿಂತ (660) ಕಿವೀಸ್​ ವೇಗಿ ಟ್ರೆಂಟ್​ ಬೌಲ್ಟ್​ (659) ಕೇವಲ 1 ಅಂಕ ಹಿಂದಿದ್ದಾರೆ. 3ನೇ ಸ್ಥಾನದಲ್ಲಿರುವ ಭಾರತದ ವೇಗಿ ಮೊಹಮದ್​ ಸಿರಾಜ್​ (656) ಕೂಡ ಕೇವಲ 3 ಅಂಕಗಳಿಂದ ಹಿಂದಿದ್ದಾರೆ. 4ನೇ ಸ್ಥಾನದಲ್ಲಿರುವ ಆಫ್ಘನ್​ ಸ್ಪಿನ್ನರ್​ ರಶೀದ್​ ಖಾನ್​ (654) ಕೂಡ ಅಲ್ಪ ಹಿನ್ನಡೆಯಲ್ಲಿದ್ದು, ಮುಂದಿನ ವಾರದ ವೇಳೆ ಬೌಲರ್​ಗಳ ರ್ಯಾಂಕಿಂಗ್​ನಲ್ಲಿ ಕೆಲ ಏರುಪೇರುಗಳನ್ನು ನಿರೀಕ್ಷಿಸಬಹುದಾಗಿದೆ.

https://www.vijayavani.net/sania-mirzas-cryptic-post-again-gives-rise-to-the-rumours-of-her-divorce-with-husband-shoaib-malik