'ನೀವು ಒಂದ್ ಸಲ ಹೊಗಳಿದ್ರೆ ...'; ರಜನಿಕಾಂತ್​ ಭೇಟಿ ಮಾಡಿ ಆಶೀರ್ವಾದ ಪಡೆದ ರಿಷಭ್​

ಚೆನ್ನೈ: 'ಕಾಂತಾರ' ಚಿತ್ರವನ್ನು ನೋಡಿದ್ದ ಸೂಪರ್​ ಸ್ಟಾರ್​ ರಜನಿಕಾಂತ್​, ಆ ಚಿತ್ರದ ಬಗ್ಗೆ ಮೆಚ್ಚಿ ಮಾತನಾಡಿದ್ದರು. ಅದಕ್ಕೆ ರಿಷಭ್​ ಧನ್ಯವಾದಗಳನ್ನು ಸಹ ಸಲ್ಲಿಸಿದ್ದರು. ಈಗ ರಿಷಭ್​, ರಜನಿಕಾಂತ್​ ಅವರನ್ನು ಅವರ ಚೆನ್ನೈ ನಿವಾಸದಲ್ಲಿ ಭೇಟಿ ಮಾಡಿದ್ದಾರೆ. ಅವರ ಆಶೀರ್ವಾದವನ್ನು ಪಡೆದುಕೊಂಡು ಬಂದಿದ್ದಾರೆ.

ಇದನ್ನೂ ಓದಿ: ಟಿ.ಎನ್​. ಸೀತಾರಾಂ, ಕಿರುತೆರೆಯ ಡಾ. ರಾಜ್​ ಇದ್ದಂತೆ ಎಂದ ಪಿ. ಶೇಷಾದ್ರಿ

ಇತ್ತೀಚೆಗಷ್ಟೇ 'ಕಾಂತಾರ' ಚಿತ್ರವನ್ನು ರಜನಿಕಾಂತ್​ ವೀಕ್ಷಿಸಿ, ಸೋಷಿಯಲ್​ ಮೀಡಿಯಾದಲ್ಲಿ ಅದರ ಕುರಿತು ಮೆಚ್ಚಿ ಮಾತನಾಡಿದ್ದರು. 'ನಮಗೆ ಗೊತ್ತಿರುವುದಕ್ಕಿಂತ ಗೊತ್ತಿಲ್ಲದಿರುವುದೇ ಹೆಚ್ಚು ಎಂಬುದನ್ನು ರಿಷಭ್​ ಶೆಟ್ಟಿ ನಿರ್ದೇಶನದ 'ಕಾಂತಾರ' ಚಿತ್ರ ತೋರಿಸಿಕೊಟ್ಟಿದೆ. ಚಿತ್ರ ನೋಡಿ ಖುಷಿಯಾಯಿತು. ಇಂಥದ್ದೊಂದು ಚಿತ್ರ ರೂಪಿಸಿದ ರಿಷಭ್​ಗೆ ಹ್ಯಾಟ್ಸ್​ ಆಫ್​. ಈ ಚಿತ್ರವು ಭಾರತೀಯ ಚಿತ್ರರಂಗದಲ್ಲೇ ಒಂದು ಮಾಸ್ಟರ್​ಪೀಸ್​' ಎಂದು ಹೊಗಳಿದ್ದರು.

ಇದಕ್ಕೆ ಪ್ರತಿಕ್ರಿಯಿಸಿದ್ದ ರಿಷಭ್​, 'ಇಡೀ ಭಾರತದಲ್ಲೇ ನೀವು ದೊಡ್ಡ ಸೂಪರ್​ ಸ್ಟಾರ್​. ನಾನು ಬಾಲ್ಯದಿಂದಲೂ ನಿಮ್ಮ ದೊಡ್ಡ ಅಭಿಮಾನಿ. ನಿಮ್ಮಿಂದ ಮೆಚ್ಚುಗೆ ಪಡೆದಿರುವುದು ನನ್ನ ಕನಸು ನನಸಾದಂತಾಗಿದೆ. ಇನ್ನಷ್ಟು ಒಳ್ಳೆಯ ಚಿತ್ರಗಳನ್ನು ಮಾಡುವುದಕ್ಕೆ ನಿಮ್ಮ ಮಾತು ಸ್ಫೂರ್ತಿ ತುಂಬಿದೆ' ಎಂದು ಹೇಳಿಕೊಂಡಿದ್ದರು.

ಈಗ ರಿಷಭ್, ರಜನಿಕಾಂತ್​ ಅವರನ್ನು ಚೆನ್ನೈ ನಿವಾಸದಲ್ಲಿ ಭೇಟಿಯಾಗಿ ಆಶೀರ್ವಾದ ಪಡೆದುಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಚಿತ್ರದ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್​ ಗೌಡ ಮುಂತಾದವರು ಹಾಜರಿದ್ದರು.

ಈ ಭೇಟಿಯ ನಂತರ ಸೋಷಿಯಲ್​ ಮೀಡಿಯಾದಲ್ಲಿ ಫೋಟೋಗಳನ್ನು ಹಂಚಿಕೊಂಡಿರುವ ರಿಷಭ್​, 'ನೀವು ಒಂದ್ ಸಲ ಹೊಗಳಿದ್ರೆ ... ನೂರು ಸಲ ಹೊಗಳ್ದ೦ಗೆ ನಮಗೆ. ನಮ್ಮ 'ಕಾಂತಾರ' ಚಿತ್ರ ನೋಡಿ ನೀವು ಮೆಚ್ಚಿದ್ದಕ್ಕೆ ನಾವು ಸದಾ ಆಭಾರಿ' ಎಂದು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ: ಗರ್ಭಿಣಿಯರು ಆದರೆ ಗರ್ಭಿಣಿಯರಲ್ಲ; ನಿತ್ಯಾ ಮತ್ತು ಪಾರ್ವತಿಯ ಹೊಸ ಕಥೆ

ಕಳೆದ ಸೆ. 30ರಂದು ಬಿಡುಗಡೆಯಾಗಿದ್ದ 'ಕಾಂತಾರ' ಚಿತ್ರವು ನಾಲ್ಕು ವಾರಗಳ ನಂತರವೂ ಒಳ್ಳೆಯ ಪ್ರದರ್ಶನ ಕಾಣುತ್ತಿದ್ದು, ಇದುವರೆಗೂ ಬಾಕ್ಸ್​-ಆಫೀಸ್​ನಲ್ಲಿ 200 ಕೋಟಿ ರೂ.ಗಳಿಗೂ ಹೆಚ್ಚು ಕಲೆಕ್ಷನ್​ ಮಾಡಿದೆ.

https://www.vijayavani.net/ashwini-puneeth-rajkumar-pooja-at-mysore-temple/