ಮುಂಬೈ: ಬಾಲಿವುಡ್ ನಿರ್ದೇಶಕ ಅನುರಾಗ್ ಕಶ್ಯಪ್ ಮೇಲೆ ನಟಿ ಪಾಯಲ್ ಘೋಶ್ ಮೀಟೂ ಆರೋಪ ಹೊರಿಸಿರುವ ಪ್ರಕರಣ ಈಗ ಇನ್ನೊಂದು ತಿರುವು ಪಡೆದಿದೆ. ಈಗ ಪಾಯಲ್ ವಿರುದ್ಧ ಕಾನೂನು ಕ್ರಮ ತೆಗೆದುಕೊಳ್ಳಲು ಮತ್ತೊಬ್ಬ ನಟಿ ರಿಚಾ ಚಡ್ಢಾ ಮುಂದಾಗಿದ್ದಾರೆ.
ಇದನ್ನೂ ನೋಡಿ: ಮೂರು ಚಿತ್ರಗಳಿಗೆ ಕಾರ್ತಿಕ್ ಆರ್ಯನ್ ಪಡೆದ ಸಂಭಾವನೆ 75 ಕೋಟಿಯಂತೆ!
ಇಷ್ಟಕ್ಕೂ ರಿಚಾಗೂ ಈ ಪ್ರಕರಣಕ್ಕೂ ಏನು ಸಂಬಂಧ ಎಂಬ ಪ್ರಶ್ನೆ ಸಹಜವಾಗಿಯೇ ಬರಬಹುದು. ವಿಷಯ ಏನೆಂದರೆ, ಅನುರಾಗ್ ಕಶ್ಯಪ್ ಜತೆಗೆ ನಟಿಯರಾದ ರಿಚಾ ಚಡ್ಢಾ, ಮಾಹಿ ಗಿಲ್ ಮತ್ತು ಹ್ಯೂಮಾ ಖುರೇಷಿ ಮುಂತಾದವರು ಸಹಕರಿಸಿದ್ದರಂತೆ. ಹಾಗಂತ ಖುದ್ದು ಅನುರಾಗ್ ಕಶ್ಯಪ್ ತಮಗೆ ಹೇಳಿದ್ದರು ಎಂದು ಪಾಯಲ್ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದರು.
ತಮ್ಮ ಹೆಸರನ್ನು ಈ ವಿಷಯದಲ್ಲಿ ಅನಾವಶ್ಯಕವಾಗಿ ಎಳೆದು ತಂದಿರುವ ಪಾಯಲ್ ಮೇಲೆ ಇದೀಗ ಕಾನೂನು ಕ್ರಮ ಕೈಗೊಳ್ಳುವುದಕ್ಕೆ ರಿಚಾ ಚಡ್ಢಾ ಮುಂದಾಗಿದ್ದಾರೆ. ಈ ಕುರಿತು, ಪತ್ರಿಕಾ ಪ್ರಕಟಣೆ ಹೊರಡಿಸಿರುವ ರಿಚಾ, ಅದನ್ನು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದ್ದಾರೆ.
ಇದನ್ನೂ ನೋಡಿ: PHOTOS| ಬಾಡಿ ಬಿಲ್ಡಿಂಗ್ನಲ್ಲಿ ಅಪ್ಪ ಸೋನು ಸೂದ್ರನ್ನೇ ಮೀರಿಸುತ್ತಿದ್ದಾನೆ ಮಗ!
‘ದೌರ್ಜನ್ಯಕ್ಕೆ ಒಳಗಾಗಿರುವ ಮಹಿಳೆಯರಿಗೆ ನ್ಯಾಯ ಸಿಗಬೇಕು ಎನ್ನುವುದು ನಿಜವಾದರೂ, ಹಾಗಂತ ಯಾರೂ ಕಾನೂನುಗಳನ್ನು ದುರಪಯೋಗ ಪಡಿಸಿಕೊಳ್ಳಬಾರದು. ಅದರಿಂದ ಬೇರೆಯವರ ಹೆಸರಿಗೆ ಮಸಿ ಬಳಿಯಬಾರದು. ಈ ಪ್ರಕರಣದಲ್ಲಿ ಅನಾವಶ್ಯಕವಾಗಿ ತಮ್ಮ ಹೆಸರನ್ನು ಎಳೆದು ತಂದಿರುವ ಪಾಯಲ್ ವಿರುದ್ಧ ಕಾನೂನು ರೀತಿಯಲ್ಲಿ ಹೋರಾಟ ನಡೆಸುವುದಕ್ಕೆ ಮುಂದಾಗಬೇಕಾಗುತ್ತದೆ’ ಎಂದು ರಿಚಾ ಪೋಸ್ಟ್ ಮಾಡಿದ್ದಾರೆ.