ಸತತ 5 ಪಂದ್ಯಗಳನ್ನು ಗೆಲ್ಲಲು ಆತನೇ ಕಾರಣ! ಆರ್​ಸಿಬಿ ನಾಯಕನ ಇಂಟೆರೆಸ್ಟಿಂಗ್​ ಹೇಳಿಕೆ ವೈರಲ್​

ಬೆಂಗಳೂರು: ನಿನ್ನೆ (ಮೇ 12) ಡೆಲ್ಲಿ ಕ್ಯಾಪಿಟಲ್ಸ್​ ವಿರುದ್ಧ ನಡೆದ ಐಪಿಎಲ್​ ಪಂದ್ಯದಲ್ಲಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (ಆರ್​ಸಿಬಿ) ತಂಡ 47 ರನ್‌ಗಳ ಬೃಹತ್​ ಅಂತರದಿಂದ ಗೆಲುವು ಸಾಧಿಸಿತು. ಈ ಮೂಲಕ ಪ್ಲೇ ಆಫ್‌ ಭರವಸೆಯನ್ನು ಆರ್​ಸಿಬಿ ಜೀವಂತವಾಗಿ ಇರಿಸಿಕೊಂಡಿದೆ. ಈ ಸೀಸನ್​ನಲ್ಲಿ ಸತತ ಐದು ಗೆಲುವು ದಾಖಲಿಸುವ ಮೂಲಕ ಆರ್​ಸಿಬಿ ಹೊಸ ದಾಖಲೆಯನ್ನು ನಿರ್ಮಿಸಿದೆ. ಡೆಲ್ಲಿ ಕ್ಯಾಪಿಟಲ್ಸ್​ ವಿರುದ್ಧದ ಅದ್ಭುತ ಗೆಲುವಿನ ನಂತರ ಆರ್​ಸಿಬಿ ನಾಯಕ ಫಾಪ್ ಡುಪ್ಲೆಸಿಸ್ ಆಸಕ್ತಿದಾಯಕ ಕಾಮೆಂಟ್​ಗಳನ್ನು ಮಾಡಿದ್ದಾರೆ. ಆ ಓರ್ವ ಆಟಗಾರ ತಂಡಕ್ಕೆ ಸೇರಿದ ಬಳಿಕ ಆರ್‌ಸಿಬಿ ಆಟದ ಶೈಲಿಯೇ ಬದಲಾಗಿದೆ ಎಂದು ಡುಪ್ಲೆಸಿಸ್​ ಹೇಳಿದರು. ಹಾಗಾದರೆ ಆ ಆರ್​ಸಿಬಿ ಆಟಗಾರ ಯಾರು ಎಂಬುದನ್ನು ನಾವೀಗ ತಿಳಿಯೋಣ.

ಡೆಲ್ಲಿ ಕ್ಯಾಪಿಟಲ್ಸ್​ ವಿರುದ್ಧದ ಗೆಲುವು ನಮಗೆ ಅದ್ಭುತವಾಗಿದೆ. ಇದು ನಮಗೆ ಸಂತೋಷವನ್ನು ನೀಡಿದೆ. ಆದರೆ, ಮೊದಲಾರ್ಧದಲ್ಲಿ ನಾವು ಉತ್ತಮ ಪ್ರದರ್ಶನ ನೀಡಲಿಲ್ಲ. ನಾವು ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡೂ ವಿಭಾಗಗಳಲ್ಲಿ ದಯನೀಯವಾಗಿ ವಿಫಲರಾದೆವು. ಆದರೆ ಒಬ್ಬ ಆಟಗಾರನ ಆಗಮನದಿಂದ ನಮ್ಮ ತಂಡದ ಪ್ರದರ್ಶನ ಸಂಪೂರ್ಣ ಬದಲಾಯಿತು. ಅವರೇ ಸ್ವಪ್ನಿಲ್ ಸಿಂಗ್. ಸ್ವಪ್ನಿಲ್ ಆಗಮನದಿಂದ ನಮ್ಮ ಬೌಲಿಂಗ್ ಶಕ್ತಿ ಹೆಚ್ಚಿದೆ. ಅವರ ಸ್ಪಿನ್ ತಂಡಕ್ಕೆ ತುಂಬಾ ಉಪಯುಕ್ತವಾಗಿದೆ. ಸ್ವಪ್ನಿಲ್ ಸಿಕ್ಕಿರುವುದು ನಮ್ಮ ಅದೃಷ್ಟ ಎಂದು ಡುಪ್ಲೆಸಿಸ್​ ಹೊಗಳಿದರು.

ಇದೇ ಸಂದರ್ಭದಲ್ಲಿ ಕಳೆದ ಎರಡ್ಮೂರು ಪಂದ್ಯಗಳಲ್ಲಿ ಯಶ್ ದಯಾಳ್​ ಮತ್ತು ಲಾಕಿ ಫರ್ಗ್ಯೂಸನ್ ಅದ್ಭುತ ಪ್ರದರ್ಶನ ನೀಡಿದ್ದಾರೆ ಎಂದು ಡುಪ್ಲೆಸಿಸ್ ಹೇಳಿದರು.

ಅಂದಹಾಗೆ 33 ವರ್ಷದ ಸ್ವಪ್ನಿಲ್ ಸಿಂಗ್ ಈ ಸೀಸನ್​ನ ಮಧ್ಯದಲ್ಲಿ ಆರ್​ಸಿಬಿ ತಂಡವನ್ನು ಸೇರಿಕೊಂಡರು. ಈವರೆಗೂ ಐದು ಪಂದ್ಯಗಳನ್ನಾಡಿದ್ದು, 6 ವಿಕೆಟ್​ಗಳನ್ನು ಪಡೆದಿದ್ದಾರೆ. ಸ್ವಪ್ನಿಲ್ ಸಿಂಗ್ ಆಗಮನದಿಂದ ಆರ್​ಸಿಬಿ ಆಟದ ಶೈಲಿ ಬದಲಾಗಿದೆ ಎಂಬ ಡುಪ್ಲೆಸಿಸ್ ಅವರ ಕಾಮೆಂಟ್‌ಗಳ ಕುರಿತು ನಿಮ್ಮ ಅಭಿಪ್ರಾಯಗಳನ್ನು ಕಾಮೆಂಟ್‌ಗಳ ರೂಪದಲ್ಲಿ ಹಂಚಿಕೊಳ್ಳಿ.

ಪಂದ್ಯದ ವಿಚಾರಕ್ಕೆ ಬರುವುದಾದರೆ, ಭಾನುವಾರ ಸಂಜೆ ಉದ್ಯಾನನಗರಿಯಲ್ಲಿ ತುಂತುರು ಮಳೆ ಸುರಿದ ಬಳಿಕ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ರಾತ್ರಿ ತವರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ರನ್​ಮಳೆ ಹರಿಸಿ ಸತತ 5ನೇ ಗೆಲುವಿನ ಸಂಭ್ರಮ ಕಂಡಿದೆ. ರಜತ್​ ಪಾಟೀದಾರ್​ (52 ರನ್​, 32 ಎಸೆತ, 3 ಬೌಂಡರಿ, 3 ಸಿಕ್ಸರ್​) ಅರ್ಧಶತಕದಾಸರೆ ಮತ್ತು ಸಂಘಟಿತ ಬೌಲಿಂಗ್​ ಬಲದಿಂದ ಆರ್​ಸಿಬಿ ತಂಡ ಐಪಿಎಲ್​-17ರ ತನ್ನ 13ನೇ ಲೀಗ್​ ಪಂದ್ಯದಲ್ಲಿ ಪ್ರವಾಸಿ ಡೆಲ್ಲಿ ಕ್ಯಾಪಿಟಲ್ಸ್​ ಎದುರು 47 ರನ್​ಗಳಿಂದ ಗೆಲುವು ಸಾಧಿಸಿದೆ.

ಮಾಡು ಇಲ್ಲವೆ ಮಡಿ ಕಾದಾಟದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಆರ್​ಸಿಬಿ, 9 ವಿಕೆಟ್​ಗೆ 187 ರನ್​ಗಳ ಸವಾಲಿನ ಮೊತ್ತ ಕಲೆಹಾಕಿತು. ಪ್ರತಿಯಾಗಿ ಪವರ್​ಪ್ಲೇನಲ್ಲೇ 4 ವಿಕೆಟ್​ ಕಳೆದುಕೊಂಡು ಚೇಸಿಂಗ್​ನಲ್ಲಿ ಲಯ ತಪ್ಪಿದ ಡೆಲ್ಲಿ, ಹಂಗಾಮಿ ನಾಯಕ ಅಕ್ಷರ್​ ಪಟೇಲ್​ (57 ರನ್​, 39 ಎಸೆತ, 5 ಬೌಂಡರಿ, 3 ಸಿಕ್ಸರ್​) ಹೋರಾಟದ ಹೊರತಾಗಿಯೂ 19.1 ಓವರ್​ಗಳಲ್ಲಿ 140 ರನ್​ಗಳಿಗೆ ಸರ್ವಪತನ ಕಂಡಿತು. ಆರಂಭಿಕ 8 ಪಂದ್ಯಗಳಲ್ಲಿ 1ರಲ್ಲಿ ಮಾತ್ರ ಗೆದ್ದಿದ್ದ ಆರ್​ಸಿಬಿ, ನಂತರ ಸತತ 5 ಜಯ ಸಾಧಿಸಿ ಪುಟಿದೇಳುವ ಮೂಲಕ ಅಭಿಮಾನಿಗಳಿಗೆ ಪುಳಕ ನೀಡಿದೆ. (ಏಜೆನ್ಸೀಸ್​)

https://www.vijayavani.net/this-has-to-happen-if-rcb-is-to-reach-the-playoffs-that-is-the-only-obstacle

https://www.vijayavani.net/if-you-criticize-virat-kohli-he-will-become-very-dangerous-aussie-legend-warned