ಟೋಕಿಯೋ: ಒಲಿಂಪಿಕ್ಸ್ನಲ್ಲಿ ಕುಸ್ತಿ ವಿಭಾಗದ ಸಮಿಫೈನಲ್ ಪಂದ್ಯದಲ್ಲಿ ಕಜಕಸ್ತಾನಿನ ನುರಿಸ್ಲಮ್ ಸನಯೆವ್ ಸೋಲಿಸಿ, ಫೈನಲ್ ತಲುಪಿದ್ದ ಭಾರತದ ಕುಸ್ತಿಪಟು ರವಿಕುಮಾರ್ ದಾಹಿಯ ಅವರು ಫೈನಲ್ನಲ್ಲಿ ರಷ್ಯಾ ಎದುರಾಳಿ ಜೌರ್ ಉಗ್ಯೂವ್ ಎದುರು ಸೋಲಿಗೆ ಶರಣಾಗುವ ಮೂಲಕ ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ.
57 ಕೆಜಿ ಕುಸ್ತಿ ವಿಭಾಗದಲ್ಲಿ ರಷ್ಯಾದ ಜೌರ್ ಉಗ್ಯೂವ್ 7-4 ಅಂತರದಲ್ಲಿ ದಾಹಿಯಾ ಅವರನ್ನು ಸೋಲಿಸಿದರು. ಈ ಮೂಲಕ ಚಿನ್ನದ ಕನಸು ಕಂಡಿದ್ದ ಭಾರತೀಯರಿಗೆ ನಿರಾಸೆ ಆಯಿತು. ಆದರೂ, ದಾಹಿಯಾ ಫೈನಲ್ ಸುತ್ತಿಗೇರಿದ್ದರಿಂದ ಭಾರತಕ್ಕೆ ಮತ್ತೊಂದು ಬೆಳ್ಳಿ ಪದಕ ಒಲಿದು ಬಂದಿದ್ದು, ಒಲಿಂಪಿಕ್ಸ್ನಲ್ಲಿ ಈವರೆಗೂ ಎರಡು ಬೆಳ್ಳಿ ಪದಕ ಸೇರಿದಂತೆ ಒಟ್ಟು 5 ಪದಕಗಳನ್ನು ಜಯಿಸಿದೆ.
ಆರಂಭದಲ್ಲಿ ಜೌರ್ ಉಗ್ಯೂವ್ ಮತ್ತು ದಾಹಿಯ ಉತ್ತಮ ರಕ್ಷಣಾತ್ಮಕ ಆಟವಾಡಿದರು. ಆದರೆ, ಉಗ್ಯೂವ್ ಎರಡು ಬಾರಿ ದಾಹಿಯ ಅವರನ್ನು ಕುಸ್ತಿ ರಿಂಗ್ನಿಂದ ಹೊರ ತಳ್ಳಿದರು. ಈ ಮೂಲಕ ಉಗ್ಯೂವ್ ಮೊದಲ ಸುತ್ತಿನಲ್ಲಿ 2-0ಯಿಂದ ಮುನ್ನಡೆ ಕಾಯ್ದುಕೊಂಡರು.
ಇದಾದ ಬಳಿಕ ದಾಹಿಯ ಕೂಡ ಒಳ್ಳೆಯ ಕಮ್ಬ್ಯಾಕ್ ಮಾಡುವ ಮೂಲಕ 2 ಅಂಕಗಳನ್ನು ಗಳಿಸಿದರು. ಅದರ ಬೆನ್ನಲ್ಲೇ ಉಗ್ಯೂವ್ ಕೂಡ ಮತ್ತೆರೆಡು ಅಂಕಗಳೊಂದಿಗೆ 4-2ರಲ್ಲಿ ಮತ್ತೆ ಮುನ್ನಡೆ ಕಾಯ್ದುಕೊಂಡರು. ರವಿ ಮೊದಲ ಅವಧಿಯಲ್ಲಿ ಪುನರಾಗಮನ ಮಾಡಲು ಪ್ರಯತ್ನಿಸಿದರು ಆದರೆ, ವಿರಾಮದ ವೇಳೆಗೆ ಅಂಕ ಉಗ್ಯೂವ್ 4-2 ಪರವಾಗಿ ಉಳಿಯಿತು.
ಎರಡನೇ ಅವಧಿಯಲ್ಲಿ ಉಗ್ಯೂವ್ ಮತ್ತೊಮ್ಮೆ ದಾಹಿಯರನ್ನು ರಿಂಗ್ನಿಂದ ಹೊರ ತಳ್ಳಿದರು. ದಾಹಿಯಾ ಶ್ರಮಪಟ್ಟರು ಉಗ್ಯೂವ್ ಅಂಕ ಏರಿಸುತ್ತಲೇ 7-2 ಅಂಕದೊಂದಿಗೆ ಹೆಚ್ಚಿನ ಮುನ್ನಡೆ ಗಳಿಸಿದರು. ಇದರ ನಡುವೆ ದಾಹಿಯ ಎರಡು ಅಂಕಗಳಿಸಿದರು. ಕೊನೆಯ ಸುತ್ತಿನಲ್ಲಿ 4-7ರೊಂದಿಗೆ ದಹಿಯಾ ಫೈನಲ್ನಲ್ಲಿ ಉಗ್ಯೂವ್ ಎದುರು ಮಂಡಿಯೂರಿದರು.
ಟೋಕಿಯೊ ಒಲಿಂಪಿಕ್ಸ್: ಕಚ್ಚಿದರೂ ಜಗ್ಗದೇ ಎದುರಾಳಿಯ ಮಣ್ಣು ಮುಕ್ಕಿಸಿದ ರವಿಕುಮಾರ್ ದಾಹಿಯ ಭಾರತದ ಹೆಮ್ಮೆ..!
‘ಮೇಕೆದಾಟು ಯೋಜನೆಗೆ ತಮಿಳುನಾಡಿನ ಅನುಮತಿ ಯಾಕೆ ಬೇಕು?’ ಲೋಕಸಭೆಯಲ್ಲಿ ಪ್ರಜ್ವಲ್ ರೇವಣ್ಣ ಪ್ರಶ್ನೆ
ಕೊನೆಯ ಹಂತದಲ್ಲಿ ತಲೆಕೆಳಗಾಗುತ್ತಾ ಎಲ್ಲರ ಲೆಕ್ಕಾಚಾರ? ದಿವ್ಯಾ ಉರುಡುಗಗೆ ವೈಷ್ಣವಿ ಗೌಡ ಶಾಕ್..!