‘ಅಲಾ ವೈಕುಂಠಪುರಂಲೋ’ ಹಿಂದಿ ರಿಮೇಕ್​ನಲ್ಲಿ ಇವರೇ ಹೀರೋ!?

ಟಾಲಿವುಡ್​ನಲ್ಲಿ ಸೂಪರ್ ಹಿಟ್​ ಪಟ್ಟಿಗೆ ಸೇರಿದ್ದ ಅಲ್ಲು ಅರ್ಜುನ್​ ನಟನೆಯ ‘ಅಲಾ ವೈಕುಂಠಪುರಂಲೋ’ ಸಿನಿಮಾ ಇದೀಗ ಮತ್ತೆ ಸದ್ದು ಮಾಡುತ್ತಿದೆ. ಸದ್ದಿಲ್ಲದೆ, ಈ ಸಿನಿಮಾ ಬಾಲಿವುಡ್​ಗೆ ರಿಮೇಕ್​ ಆಗಲು ಸಿದ್ಧತೆ ನಡೆಸುತ್ತಿದೆ. ಬಾಲಿವುಡ್​ಗೆ ರಿಮೇಕ್​ ಆಗಲಿದೆ ಎಂಬ ಸುದ್ದಿ ಲಾಕ್​ಡೌನ್​ಗೂ ಮುನ್ನ ಗೊತ್ತಿರುವ ಸಂಗತಿಯಾದರೂ, ಹಿಂದಿಯಲ್ಲಿ ಹೀರೋ ಯಾರು ಎಂಬಿತ್ಯಾದಿ ವಿವರಗಳು ಹೊರಬಿದ್ದಿರಲಿಲ್ಲ. ಇದೀಗ ಕೆಲ ಮೂಲಗಳ ಪ್ರಕಾರ ಅಲ್ಲು ಅರ್ಜುನ್​ ನಿಭಾಯಿಸಿದ್ದ ಪಾತ್ರವನ್ನು ಬಾಲಿವುಡ್​ನಲ್ಲಿ ರಣವೀರ್​ ಸಿಂಗ್​ ಮಾಡಲಿದ್ದಾರೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ: ಬೋನಿ ಕಪೂರ್​ ಕಡೆಯಿಂದ ಬ್ರೇಕಿಂಗ್​ ನ್ಯೂಸ್​!

ಹೌದು, ಈ ಹಿಂದೆ ಬಾಲಿವುಡ್​ನಲ್ಲಿ ರಿಮೇಕ್ ಆಗಿದ್ದ ‘ಕಬೀರ್​ ಸಿಂಗ್​’ ಚಿತ್ರಕ್ಕೆ ಬಂಡವಾಳ ಹೂಡಿದ್ದ ನಿರ್ಮಾಪಕ ಅಶ್ವಿನ್​ ವರ್ದೆ, ‘ಅಲಾ ವೈಕುಂಠಪುರಂಲೋ’ ಸಿನಿಮಾದ ರಿಮೇಕ್​ ಹಕ್ಕುಗಳನ್ನು ಖರೀದಿಸಿದ್ದಾರೆ. ರಣವೀರ್​ ಸಿಂಗ್​ ಜತೆಗೆ ಮತ್ತೊಬ್ಬ ಯುವ ನಟ ಕಾರ್ತಿಕ್​ ಆರ್ಯನ್​ ಅವರನ್ನು ನಿರ್ಮಾಪಕರು ಗಮನದಲ್ಲಿಟ್ಟುಕೊಂಡಿದ್ದಾರಂತೆ. ಮೊದಲ ಪ್ರಾಶಸ್ತ್ಯವನ್ನು ರಣವೀರ್​ಗೆ ನೀಡಿದ್ದು, ಅವರ ಕಾಲ್​ಶೀಟ್​ ಮತ್ತು ಬೇರೆ ಸಿನಿಮಾಗಳ ಜತೆಗಿನ ಶೂಟಿಂಗ್​, ಕ್ಲ್ಯಾಷ್ ವಿಚಾರಗಳನ್ನು ನೋಡಿಕೊಂಡು ಮುಂದುವರಿಯಲಿದ್ದಾರಂತೆ. ಒಂದು ವೇಳೆ ರಣವೀರ್​ ಸಿಗಲಿಲ್ಲ ಅಂದರೆ, ಕಾರ್ತಿಕ್​ ಆರ್ಯನ್​ ಅವರನ್ನು ಆಯ್ದುಕೊಳ್ಳಲಿದ್ದಾರೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ: ಮುಖಕ್ಕೆ ಕಪ್ಪು ಮಸಿ ಬಳಿದುಕೊಂಡು ತಮನ್ನಾ ಪ್ರತಿಭಟನೆ!; ಕಾರಣ ಏನಿರಬಹುದು?

ಇತ್ತ ಲಾಕ್​ಡೌನ್​ ಹಿನ್ನೆಲೆಯಲ್ಲಿ ಸಿನಿಮಾ ಕೆಲಸಗಳಿಗೆ ಬ್ರೇಕ್​ ಬಿದ್ದಿದೆ. ಚಿತ್ರೀಕರಣೋತ್ತರ ಕೆಲಸಗಳಿಗೆ ಚಾಲನೆ ನೀಡಿದೆಯಾದರೂ, ಹೊಸ ಸಿನಿಮಾಗಳ ಬಗ್ಗೆ ಮುಂದಿನ ದಿನಗಳಲ್ಲಿ ಮಾಹಿತಿ ಹೊರಬೀಳಲಿದೆ. ಅದರಂತೆ ಈ ಸುದ್ದಿ ಒಂದು ವೇಳೆ ನಿಜವೇ ಆದರೆ, ಸಿಂಬಾ ಬಳಿಕ ಮತ್ತೊಂದು ಸೌತ್​ ರಿಮೇಕ್​ನಲ್ಲಿ ರಣವೀರ್​ ನಟಿಸಿದಂತಾಗಲಿದೆ. (ಏಜೆನ್ಸೀಸ್​)

https://www.vijayavani.net/aishwarya-rai-bachchans-lookalike-becomes-a-hit-in-social-media/