ಯಾರ್ಕ್​ಶೈರ್​ ಕೌಂಟಿ ತಂಡದ ಒಡೆತನ ಪಡೆಯಲು ಮುಂದಾದ ರಾಜಸ್ಥಾನ ರಾಯಲ್ಸ್​

ಲಂಡನ್​: ಐಪಿಎಲ್​ ಟೂರ್ನಿಯ ಫ್ರಾಂಚೈಸಿಗಳು ಈಗಾಗಲೆ ಭಾರತಕ್ಕೆ ಮಾತ್ರ ಸೀಮಿತವಾಗಿ ಉಳಿದಿಲ್ಲ. ವಿಶ್ವದ ವಿವಿಧೆಡೆ ಟಿ20 ಲೀಗ್​ಗಳಲ್ಲಿ ಕೆಲ ತಂಡಗಳ ಮಾಲೀಕತ್ವ ಪಡೆದುಕೊಂಡಿವೆ. ಇದೀಗ ರಾಜಸ್ಥಾನ ರಾಯಲ್ಸ್​ ಫ್ರಾಂಚೈಸಿ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಇಂಗ್ಲೆಂಡ್​ನ ದೇಶೀಯ ಕ್ರಿಕೆಟ್​ ಟೂರ್ನಿಗಳಲ್ಲಿ ಆಡುವ ಯಾರ್ಕ್​ಶೈರ್​ ಕೌಂಟಿ ಕ್ರಿಕೆಟ್​ ಕ್ಲಬ್​ ತಂಡದ ಒಡೆತನ ಪಡೆದುಕೊಳ್ಳಲು ಮುಂದಾಗಿದೆ. ಆರ್ಥಿಕ ಸಂಕಷ್ಟ ಎದುರಿಸುತ್ತಿರುವ ಯಾರ್ಕ್​ಶೈರ್​ ಕೌಂಟಿ ತಂಡಕ್ಕೆ ರಾಜಸ್ಥಾನ ರಾಯಲ್ಸ್​ ಬರೋಬ್ಬರಿ 260 ಕೋಟಿ ರೂ. ಮೊತ್ತದ ಹೂಡಿಕೆಯ ಆರ್​ ನೀಡಿದೆ. ಒಂದು ವೇಳೆ ಯಾರ್ಕ್​ಶೈರ್​ ಈ ಆರ್​ ಒಪ್ಪಿಕೊಂಡರೆ, ಇಂಗ್ಲೆಂಡ್​ನ ಮೊದಲ ವಿದೇಶಿ ಒಡೆತನದ ಕೌಂಟಿ ಕ್ರಿಕೆಟ್​ ತಂಡವೆನಿಸಲಿದೆ.

ರಾಜಸ್ಥಾನ ರಾಯಲ್ಸ್​ ಫ್ರಾಂಚೈಸಿ ಯಾರ್ಕ್​ಶೈರ್​ನಲ್ಲಿ ಬೃಹತ್​ ಮೊತ್ತದ ಹೂಡಿಕೆ ಮಾಡಿದರೆ, ತಂಡದ ಸಂಪೂರ್ಣ ನಿಯಂತ್ರಣವೂ ಅದರದಾಗಲಿದೆ. ಯಾರ್ಕ್​ಶೈರ್​ ತಂಡ ಸದ್ಯ 155 ಕೋಟಿ ರೂ. (15 ದಶಲಕ್ಷ ಪೌಂಡ್​) ಸಾಲದಲ್ಲಿದ್ದು, ಇದರಿಂದ ಹೊರಬರಲು ಹೂಡಿಕೆದಾರರ ನಿರೀಕ್ಷೆಯಲ್ಲಿದೆ. ಸೌದಿ ರಾಜ ರ್ಹಾನ್​ ಅಲ್​ ಸೌದ್​ ಕೂಡ ಯಾರ್ಕ್​ಶೈರ್​ ಕ್ಲಬ್​ ತಂಡವನ್ನು ಖರೀದಿಸಲು ಆಸಕ್ತಿ ತೋರಿದ್ದಾರೆ ಎನ್ನಲಾಗುತ್ತಿದೆ.

160 ವರ್ಷಗಳ ಇತಿಹಾಸ ಹೊಂದಿರುವ ಯಾರ್ಕ್​ಶೈರ್​ ಕೌಂಟಿ ಕ್ರಿಕೆಟ್​ ಕ್ಲಬ್​ ತಂಡ ಪ್ರಸಕ್ತ ಅದರ ಸದಸ್ಯರ ಒಡೆತನದಲ್ಲೇ ಇದೆ. ಇಂಗ್ಲೆಂಡ್​ನ 18 ಪ್ರಥಮ ದರ್ಜೆ ಕೌಂಟಿ ತಂಡಗಳ ಪೈಕಿ ಸದ್ಯ 15 ತಂಡಗಳಷ್ಟೇ ಈ ರೀತಿ ಸದಸ್ಯರ ಒಡೆತನದಲ್ಲಿವೆ. ಉಳಿದಂತೆ ಹ್ಯಾಂಪ್​ಶೈರ್​, ಡರ್​ಹ್ಯಾಂ ಮತ್ತು ನಾರ್ಥಂಪ್ಟನ್​ಶೈರ್​ ತಂಡಗಳಲ್ಲಿ ಈಗಾಗಲೆ ಇಂಗ್ಲೆಂಡ್​ನ ಕೆಲ ಉದ್ಯಮಿಗಳು ಹೂಡಿಕೆ ಮಾಡಿ ಒಡೆತನ ಪಡೆದುಕೊಂಡಿದ್ದಾರೆ. ರಾಜಸ್ಥಾನ ರಾಯಲ್ಸ್​ ಕೂಡ ಈಗ ಯಾರ್ಕ್​ಶೈರ್​ ತಂಡದಲ್ಲಿ ಇದೇ ರೀತಿಯ ಒಡೆತನ ಬಯಸಿದೆ. ಈ ಬಗ್ಗೆ ಇದೇ ತಿಂಗಳು ನಡೆಯಲಿರುವ ಯಾರ್ಕ್​ಶೈರ್​ ಆಡಳಿತ ಮಂಡಳಿಯ ಸಭೆಯಲ್ಲಿ ಅಂತಿಮ ನಿರ್ಧಾರ ಕೈಗೊಳ್ಳಬೇಕಾಗಿದೆ.

ರಾಜಸ್ಥಾನ ರಾಯಲ್ಸ್​ ತಂಡ ಯಾರ್ಕ್​ಶೈರ್​ ಒಡೆತನ ಪಡೆದುಕೊಂಡರೆ, ಇಂಗ್ಲೆಂಡ್​ನ 'ದಿ ಹಂಡ್ರೆಡ್​' ಕ್ರಿಕೆಟ್​ ಟೂರ್ನಿಯಲ್ಲೂ ತಂಡವೊಂದರ ಒಡೆತನ ಪಡೆದುಕೊಳ್ಳಬಹುದಾಗಿದೆ. ದಿ ಹಂಡ್ರೆಡ್​ ಟೂರ್ನಿಯ ನಾರ್ಥರ್ನ್​ ಸೂಪರ್​ಚಾರ್ಜರ್ಸ್​ ತಂಡದಲ್ಲಿ ಯಾರ್ಕ್​ಶೈರ್​ ಈಗಾಗಲೆ ಬಹುತೇಕ ಷೇರು ಹೊಂದಿದೆ. ಯಾರ್ಕ್​ಶೈರ್​ ತಂಡದ ಲೀಡ್ಸ್​ನ ಹೆಡಿಂಗ್ಲೆ ಕ್ರೀಡಾಂಗಣವೇ ಸೂಪರ್​ಚಾರ್ಜರ್ಸ್​ಗೂ ತವರು ಮೈದಾನವಾಗಿದೆ.

https://www.vijayavani.net/jenni-hermoso-accuses-luis-rubiales-of-sexual-assault-for-fifa-womens-world-cup-2023-kiss