"ಟೋಬಿ' ಪಾತ್ರವೇ ಅತ್ಯಂತ ವಿಲಕ್ಷಣ, ವಿಕೃತ, ಕ್ರೂರಿ. ತನ್ನನ್ನು ದ್ವೇಷಿಸುವವರನ್ನು ಮಾತ್ರವಲ್ಲ ಜತೆಗಿರುವವರನ್ನೂ ಡಿಸ್ಟರ್ಬ್ ಮಾಡುವಂತಹ ವ್ಯಕ್ತಿ. ಕಥೆ ಸಾಗಿದಂತೆ ಪ್ರೇಕ್ಷಕರೂ ಆತನೊಂದಿಗೆ ನಗುತ್ತಾರೆ, ಅಳುತ್ತಾರೆ, ಅವನನ್ನು ಕಂಡು ಮರುಕಡುತ್ತಾರೆ, ಆತನನ್ನು ಹಿಡಿದು ಬಡಿಯಬೇಕು ಎಂದು ಕೋಪಿಸಿಕೊಳ್ಳುತ್ತಾರೆ. ಹೀಗೆ ಎಲ್ಲ ಭಾವನೆಗಳನ್ನೂ ಉತ್ತುಂಗಕ್ಕೆ ಕೊಂಡೊಯ್ಯುತ್ತಾನೆ. ಅಂತಹ ಒಂದು ಅತ್ಯಂತ ಗೊಂದಲಮಯ ಪಾತ್ರದಲ್ಲಿ ರಾಜ್ ಬಿ.ಶೆಟ್ಟಿ ಮಿಂಚಿದ್ದಾರೆ. ಅವರನ್ನು "ಟೋಬಿ'ಯಾಗಿ ನೋಡುವುದೇ ಹಬ್ಬ. ಚೈತ್ರಾ ಜೆ. ಆಚಾರ್ ಮತ್ತು ರಾಜ್ ನಡುವಿನ ಜುಗಲ್ಬಂದಿ ಚಿತ್ರದ ಹೈಲೈಟ್ಗಳಲ್ಲೊಂದು. ಟೋಬಿಯ ಎಲ್ಲ ದುಃಖಗಳಿಗೂ ಮೂಲವಾದ ಆನಂದನ ಪಾತ್ರದಲ್ಲಿ ದೀಪಕ್, ಶವಾಗಾರದಲ್ಲಿ ಕೆಲಸ ಮಾಡುವ ದಾಮೋದರನಾಗಿ ಗೋಪಾಲಕೃಷ್ಣ ದೇಶಪಾಂಡೆ ನೈಜ ಅಭಿನಯ, ಸಾವಿತ್ರಿ ಎಂಬ ಸವಾಲಿನ ಪಾತ್ರದಲ್ಲಿ ಸಂಯುಕ್ತಾ ಹೊರನಾಡು… ಹೀಗೆ ಎಲ್ಲರ ಅಭಿನಯ ಸಿನಿಮಾವನ್ನು ಸರಾಗವಾಗಿ ನೋಡಿಸಿಕೊಂಡು ಹೋಗುತ್ತದೆ.
