ಹಿಮಾಚಲ ಪ್ರದೇಶದಲ್ಲಿ ಭಾರೀ ಮಳೆ: ಭೂಕುಸಿತದಿಂದ ಶಿಮ್ಲಾದಲ್ಲಿ ಶಿವ ದೇವಾಲಯ ಕುಸಿತ, 30 ಭಕ್ತರು ಸಿಲುಕಿರುವ ಭೀತಿ

ಹಿಮಾಚಲ ಪ್ರದೇಶ: ಹಿಮಾಚಲ ಪ್ರದೇಶದಲ್ಲಿ ಭಾರೀ ಮಳೆಯಿಂದಾಗಿ ಅನೇಕ ಪ್ರದೇಶಗಳಲ್ಲಿ ಪ್ರವಾಹ ಮತ್ತು ಭೂಕುಸಿತದಂತಹ ಪರಿಸ್ಥಿತಿ ಉದ್ಭವಿಸಿದೆ. ರಾಜ್ಯದಲ್ಲಿ ಬಿಯಾಸ್ ನದಿ ಉಕ್ಕಿ ಹರಿಯುತ್ತಿದೆ. ಸೋಲನ್‌ನ ಜಾಡೋನ್ ಗ್ರಾಮದಲ್ಲಿ ಮೇಘಸ್ಫೋಟದಿಂದಾಗಿ ಏಳು ಜನರು ಸಾವನ್ನಪ್ಪಿದ್ದು, ಮೂವರು ನಾಪತ್ತೆಯಾಗಿದ್ದಾರೆ. ಪ್ರವಾಹದಿಂದಾಗಿ ಜಿಲ್ಲೆಯಲ್ಲಿ ಗೋಶಾಲೆ ಹಾಗೂ ಎರಡು ಮನೆಗಳು ಕೊಚ್ಚಿ ಹೋಗಿವೆ.

ಕುಸಿದ ದೇವಾಲಯ
ಮಂಡಿ ಜಿಲ್ಲೆಯಲ್ಲಿ ಕಳೆದ 3 ದಿನಗಳಿಂದ 13 ಮಂದಿ ಸಾವನ್ನಪ್ಪಿದ್ದಾರೆ. ಇದರ ನಂತರ, ಸೋಲನ್ ಜಿಲ್ಲೆಯಲ್ಲಿ ಏಳು ಸಾವುಗಳು ವರದಿಯಾಗಿವೆ. ರಾಜ್ಯದಲ್ಲಿ ಇದೇ ಪರಿಸ್ಥಿತಿ ಮುಂದುವರಿದಿದೆ. ಶಿಮ್ಲಾದಲ್ಲಿ ಭೂಕುಸಿತದಿಂದ ಶಿವ ದೇವಾಲಯವೊಂದು ಕುಸಿದಿದೆ. ದೇವಸ್ಥಾನದಲ್ಲಿ ಕನಿಷ್ಠ 25-30 ಮಂದಿ ಸಿಲುಕಿರುವ ಬಗ್ಗೆ ವರದಿಯಾಗಿದೆ.

ಚುರುಕಾದ ಮುಂಗಾರು
ಹವಾಮಾನ ಇಲಾಖೆಯಿಂದ ಬಂದಿರುವ ಮಾಹಿತಿ ಪ್ರಕಾರ, ಮುಂದಿನ 24 ಗಂಟೆಗಳ ಕಾಲ ಮುಂಗಾರು ಚುರುಕಾಗಿರಲಿದೆ. ರಾಜ್ಯದ ಬಹುತೇಕ ಭಾಗಗಳಲ್ಲಿ ಭಾರೀ ಮಳೆಯಾಗುತ್ತಿರುವ ಕಾರಣ ನದಿಗಳು, ಚರಂಡಿಗಳು ಮತ್ತು ಗುಂಡಿಗಳು ಧಾರಾಕಾರವಾಗಿ ಉಕ್ಕಿ ಹರಿಯಲಿವೆ. ಚಂಡಿಗಢ-ಶಿಮ್ಲಾ ಚತುಷ್ಪಥ ರಸ್ತೆಯಲ್ಲಿ ಚಕ್ಕಿ ಮೋಡ್‌ನಲ್ಲಿ ವಾಹನಗಳಿಗೆ ನಿರ್ಬಂಧಿಸಲಾಗಿದೆ.

ಮನೆಗಳಿಗೆ ನುಗ್ಗಿದ ಅವಶೇಷಗಳು
ಧರಂಪುರದ ತಾನ್ಯಹಾದ್ ಪಂಚಾಯತ್ ನ ನಲ್ಯಾನದಲ್ಲಿ ಚರಂಡಿ ನೀರು ಮನೆಗೆ ನುಗ್ಗಿ ಮೂವರು ಸಮಾಧಿಯಾಗಿರುವ ಬಗ್ಗೆ ಮಾಹಿತಿ ಲಭ್ಯವಾಗಿದೆ. ಇದೇ ಸಂದರ್ಭದಲ್ಲಿ ನಹಾನ್‌ನ ಕಂಡೈವಾಲಾದಲ್ಲಿ, ಭಾನುವಾರ ತಡರಾತ್ರಿ ಮೇಘಸ್ಫೋಟದಿಂದಾಗಿ 50 ಮನೆಗಳು ಅವಶೇಷಗಳಿಂದ ಕೂಡಿವೆ.

ಮಂಜಿನಿಂದ ಆವೃತವಾದ ಪ್ರದೇಶಗಳು
ಚುರಾ, ಸಲೋನಿ ಸೇರಿದಂತೆ ಜಿಲ್ಲೆಯ ಗುಡ್ಡಗಾಡು ಪ್ರದೇಶ ಸಂಪೂರ್ಣ ಮಬ್ಬು ಮಬ್ಬಾಗಿದೆ. ಮತ್ತೊಂದೆಡೆ, ಈ ವಾತಾವರಣದಲ್ಲಿ ಜನರು ಮನೆಯಿಂದ ಹೊರಗೆ ಹೋಗದಂತೆ ಜಿಲ್ಲಾಡಳಿತ ಸೂಚಿಸಿದೆ. ಇದರೊಂದಿಗೆ ಚಾಲಕರು ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ವಾಹನವನ್ನು ಕೊಂಡೊಯ್ಯದಂತೆ ತಿಳಿಸಲಾಗಿದೆ.

https://www.vijayavani.net/5-killed-in-uttarakhands-rudraprayag-as-car-gets-buried-under-landslide