ಸಂಗೀತಗಾರನ ಎದುರಲ್ಲೇ ವಾದ್ಯವನ್ನು ಸುಟ್ಟ ತಾಲಿಬಾನಿಗಳು: ಕಲಾವಿದನ ಕಣ್ಣೀರು ನೋಡಿ ರಕ್ಕಸರ ನಗು

ಕಾಬುಲ್​: ತಾಲಿಬಾನಿಗಳ ಕಪಿಮುಷ್ಠಿಯಲ್ಲಿ ಸಿಲುಕಿರುವ ಅಫ್ಘಾನಿಸ್ತಾನ ನಿತ್ಯವೂ ನರಕ ಅನುಭವಿಸುತ್ತಿದೆ. ಯಾವುದಕ್ಕೂ ಸ್ವಾಂತಂತ್ರ್ಯ ಇಲ್ಲವೆಂಬಂತಾಗಿದೆ. ಅದಕ್ಕೆ ಉದಾಹರಣೆಯಾಗಿ ಆಫ್ಘಾನ್​ ಪಕ್ತಿಯಾ ಪ್ರಾಂತ್ಯದಲ್ಲಿ ಘಟನೆಯೊಂದು ನಡೆದಿದ್ದು, ಸಂಗೀತಗಾರರೊಬ್ಬರ ಸಂಗೀತ ಸಾಧನವನ್ನು ಆತನ ಕಣ್ಣ ಮುಂದೆಯೇ ತಾಲಿಬಾನಿಗಳು ಸುಟ್ಟು ಹಾಕಿದ್ದಾರೆ.

ಈ ಘಟನೆಗೆ ಸಂಬಂಧಿಸಿದ ವಿಡಿಯೋವನ್ನು ಅಬ್ದುಲಖ್​ ಒಮೇರಿ ಎಂಬ ಆಫ್ಘಾನ್​ನ ಪತ್ರಕರ್ತರೊಬ್ಬರು ಶೇರ್​ ಮಾಡಿಕೊಂಡಿದ್ದಾರೆ. ವಿಡಿಯೋದಲ್ಲಿ ತಾಲಿಬಾನಿಗಳು ಸಂಗೀತ ಸಾಧನಕ್ಕೆ ಬೆಂಕಿ ಹಚ್ಚಿದ್ದು, ಅದರ ಮುಂದೆಯೇ ನಿಂತಿರುವ ಸಂಗೀತಗಾರ ಕಣ್ಣೀರು ಹಾಕುತ್ತಿದ್ದಾರೆ. ಅಲ್ಲದೆ, ಆತನನ್ನು ನೋಡಿ ಶಸ್ತ್ರಾಸ್ತ್ರ ಹಿಡಿದಿರುವ ತಾಲಿಬಾನಿಗಳು ನಗುತ್ತಿರುವ ದೃಶ್ಯ ವಿಡಿಯೋದಲ್ಲಿದೆ.

ಈ ಘಟನೆ ಪಕ್ತಿಯಾ ಪ್ರಾಂತ್ಯದ ಜಜೈಅರುಬ್​ ಜಿಲ್ಲೆಯಲ್ಲಿ ನಡೆದಿದೆ ಎಂದು ಒಮೇರಿ ಟ್ವೀಟ್​ ಮೂಲಕ ತಿಳಿಸಿದ್ದಾರೆ. ಈಗಾಗಲೇ ತಾಲಿಬಾನಿಗಳು ವಾಹನಗಳಲ್ಲಿ ಮ್ಯೂಸಿಕ್​ ಬಳಸುವುದನ್ನು ನಿಷೇಧಿಸಿದ್ದಾರೆ. ಅಲ್ಲದೆ, ಮದುವೆ ಮಂಟಪ ಸೇರಿದಂತೆ ಅನೇಕ ಕಾರ್ಯಕ್ರಮಗಳಲ್ಲೂ ಮ್ಯೂಸಿಕ್​ ಬ್ಯಾನ್​ ಮಾಡಲಾಗಿದೆ.

ಇತ್ತೀಚೆಗಷ್ಟೇ ಬಟ್ಟೆ ಅಂಗಡಿಗಳ ಮುಂದೆ ಇಡಲಾಗಿದ್ದ ಹೆಣ್ಣಿನ ಗೊಂಬೆಗಳನ್ನು ತಲೆಯನ್ನು ತೆಗೆಯುವಂತೆ ತಾಲಿಬಾನ್​ ಆದೇಶಿಸಿತ್ತು. ಹೆರಾತ್​ ಪ್ರಾಂತ್ಯದಲ್ಲಿ ಗೊಂಬೆಗಳ ತಲೆ ತೆಗೆಯುವ ವಿಡಿಯೋ ಕೂಡ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿತ್ತು. ಇದು ಷರಿಯಾ ಕಾನೂನಿಗೆ ವಿರುದ್ಧ ಎಂದು ತಾಲಿಬಾನ್​ ಸಮರ್ಥಿಸಿಕೊಂಡಿದೆ. ಇನ್ನು ಆಫ್ಘಾನ್​ನಲ್ಲಿ ಹೆಣ್ಣು ಮಕ್ಕಳು ಪುರುಷರ ಜತೆಯಿಲ್ಲದೇ ಒಬ್ಬಂಟಿಯಾಗಿ ಓಡಾಡುವಂತಿಲ್ಲ. ಬುರ್ಖಾವನ್ನು ಕಡ್ಡಾಯವಾಗಿ ಧರಿಸಲೇಬೇಕು. ಹೀಗೆ ಸಾಕಷ್ಟು ನಿಯಮಗಳನ್ನು ಷರಿಯಾ ಕಾನೂನಿನ ಅಡಿ ತಾಲಿಬಾನಿಗಳು ಜಾರಿ ಮಾಡಿದ್ದು, ಆಫ್ಘಾನ್​ ಅಕ್ಷರಶಃ ಕಟ್ಟುಪಾಡುಗಳಿಂದ ನಲುಗಿ ಹೋಗಿದೆ.

20 ವರ್ಷಗಳ ನಂತರ ತಾಲಿಬಾನ್ ಮತ್ತೊಮ್ಮೆ ಅಫ್ಘಾನಿಸ್ತಾನದ ಮೇಲೆ ಹಿಡಿತ ಸಾಧಿಸಿರುವುದರಿಂದ, ಭಯೋತ್ಪಾದಕ ಗುಂಪಿನ ಆಡಳಿತದಲ್ಲಿ ಅಫ್ಘಾನ್ ಮಹಿಳೆಯರು ಅನಿಶ್ಚಿತ ಭವಿಷ್ಯವನ್ನು ಎದುರಿಸುವ ಸಾಧ್ಯತೆಯಿದೆ ಎಂದು ತಜ್ಞರು ನಂಬಿದ್ದಾರೆ. (ಏಜೆನ್ಸೀಸ್​)

https://www.vijayavani.net/s-indian-armys-new-combat-uniform-unveiled/

https://www.vijayavani.net/r-luxury-cars-are-his-target-avery-car-king/

https://www.vijayavani.net/s-woman-drives-bus-for-10-km-saved-life/