ಕ್ಯಾಲಿಪೋರ್ನಿಯಾ: ಯೂಕ್ರೇನ್ ವಿರುದ್ಧ ರಕ್ತಸಿಕ್ತ ದಾಳಿ ಮುಂದುವರಿಸಿರುವ ರಷ್ಯಾಗೆ ಟೆಕ್ ದೈತ್ಯ ಗೂಗಲ್ ಕಂಪನಿ ಬಿಗ್ ಶಾಕ್ ನೀಡಿದೆ. ರಷ್ಯಾ ಒಡೆತನದ ಮಾಧ್ಯಮಗಳು ಮತ್ತು ಇತರೆ ರಷ್ಯಾ ಚಾನೆಲ್ಗಳ ಜಾಹೀರಾತು ಹಣದ ಮೇಲೆ ನಿರ್ಬಂಧ ವಿಧಿಸಿದೆ. ರಷ್ಯಾ ವೆಬ್ಸೈಟ್ಗಳು, ಆ್ಯಪ್ ಮತ್ತು ಯೂಟ್ಯೂಬ್ ವಿಡಿಯೋಗಳ ಮಾನಿಟೈಜೇಷನ್ ಅನ್ನು ಗೂಗಲ್ ಬ್ಯಾನ್ ಮಾಡಿದೆ.
ಯೂಕ್ರೇನ್ ಮೇಲೆ ರಷ್ಯಾ ದಾಳಿಯ ಅಸಾಧಾರಣ ಸನ್ನಿವೇಶವನ್ನು ಉಲ್ಲೇಖಿಸಿರುವ ಗೂಗಲ್ನ ಯೂಟ್ಯೂಬ್ ಘಟಕವು ಯೂಟ್ಯೂಬ್ನಲ್ಲಿ ಹಣಗಳಿಸುವ ಹಲವಾರು ರಷ್ಯಾ ಚಾನಲ್ಗಳ ಮಾನಿಟೈಜೇಷನ್ ಸಾಮರ್ಥ್ಯವನ್ನು ವಿರಾಮಗೊಳಿಸುತ್ತಿರುವುದಾಗಿ ಹೇಳಿದೆ. ರಷ್ಯಾ ಮೇಲೆ ಅಮೆರಿಕ, ಬ್ರಿಟನ್, ಜರ್ಮನಿ ಮತ್ತು ಯುರೋಪಿಯನ್ ಒಕ್ಕೂಟ ಸೇರಿದಂತೆ ಅನೇಕ ರಾಷ್ಟ್ರಗಳು ಈಗಾಗಲೇ ಆರ್ಥಿಕ ನಿರ್ಬಂಧಗಳನ್ನು ಹೇರಿವೆ. ಇದೀಗ ಗೂಗಲ್ ನಿಷೇಧದಿಂದ ರಷ್ಯಾ ಮಾಧ್ಯಮ ಮತ್ತು ಡಿಜಿಟಲ್ ಮಾಧ್ಯಮಗಳ ಮೇಲೆ ಭಾರಿ ಹೊಡೆತ ಬೀಳಲಿದೆ. ಏಕೆಂದರೆ, ಜಾಹಿರಾತು ನಿಯೋಜನೆಯನ್ನು ಹೆಚ್ಚಾಗಿ ಯೂಟ್ಯೂಬ್ ನಿಯಂತ್ರಿಸುತ್ತದೆ.
ಸ್ವಂತ ವೆಬ್ಸೈಟ್ಗಳು ಮತ್ತು ಅಪ್ಲಿಕೇಶನ್ಗಳಲ್ಲಿ ಆದಾಯವನ್ನು ಗಳಿಸಲು ಜಾಹೀರಾತು ತಂತ್ರಜ್ಞಾನವನ್ನು ಬಳಸುವುದರಿಂದ ರಷ್ಯಾದ ಒಡೆತನದ ಮಾಧ್ಯಮಗಳನ್ನು ಸಹ ನಿರ್ಬಂಧಿಸಿರುವುದಾಗಿ ಗೂಗಲ್ ಹೇಳಿದೆ. ಹೀಗಾಗಿ ಯೂಟ್ಯೂಬ್ ಮತ್ತು ಗೂಗಲ್ ಎರಡು ಕಡೆಯಿಂದಲೂ ರಷ್ಯಾ ಮಾಧ್ಯಮಗಳಿಗೆ ಮಾನಿಟೈಜೇಷನ್ ಬ್ಯಾನ್ ಮಾಡಲಾಗಿದೆ.
ಗೂಗಲ್ನ ಈ ನಿರ್ಧಾರದಿಂದ ರಷ್ಯಾದ ಮಾಧ್ಯಮಗಳು ಗೂಗಲ್ ಟೂಲ್ಸ್ ಮೂಲಕ ಜಾಹಿರಾತ ಖರೀದಿಸಲು ಆಗುವುದಿಲ್ಲ ಅಥವಾ ಸರ್ಚಿಂಗ್ ಮತ್ತು ಜಿಮೇಲ್ನಂತಹ ಗೂಗಲ್ ಸೇವೆಗಳಲ್ಲಿ ಜಾಹೀರಾತುಗಳನ್ನು ಇರಿಸಲು ಸಾಧ್ಯವಿಲ್ಲ ಎಂದು ಗುಗಲ್ ವಕ್ತಾರ ಮೈಕೆಲ್ ಅಸಿಮ್ಯಾನ್ ಹೇಳಿದ್ದಾರೆ. ಅಲ್ಲದೆ, ಪ್ರಸ್ತುತ ನಡೆಯುತ್ತಿರುವ ಬೆಳವಣಿಗೆಗಳನ್ನು ಸಕ್ರಿಯವಾಗಿ ಮೇಲ್ವಿಚಾರಣೆ ಮಾಡುತ್ತಿದ್ದೇವೆ ಮತ್ತು ಅಗತ್ಯವಿದ್ದರೆ ಮುಂದಿನ ಕ್ರಮಗಳನ್ನು ತೆಗೆದುಕೊಳ್ಳುತ್ತೇವೆ ಎಂದು ಅಸಿಮನ್ ಹೇಳಿದರು.
ಯುರೋಪಿಯನ್ ಒಕ್ಕೂಟ ಕೂಡ ರಷ್ಯಾ ಮಾಧ್ಯಮಗಳ ಮೇಲೆ ನಿರ್ಬಂಧವನ್ನು ಹೇರಿದೆ. ಕೇವಲ ರಷ್ಯಾದ ತುತ್ತಾರಿಯಾಗಿರುವ ಮಾಧ್ಯಮಗಳ ಮೇಲೆ ನಿರ್ಬಂಧ ಹೇರಲಾಗಿದ್ದು, ಯೂಟ್ಯೂಬ್ನಲ್ಲಿ ಕೂಡ ರಷ್ಯಾದ ವಿಡಿಯೋಗಳು ಕಡಿಮೆ ಶಿಫಾರಸು ಹೊಂದಿರಲಿದೆ ಎಂದು ವಕ್ತಾರ ಫರ್ಶಾದ್ ಶಾಡ್ಲೂ ಹೇಳಿದ್ದಾರೆ. ಯೂಕ್ರೇನಿಯನ್ ಸರ್ಕಾರದ ಮನವಿ ಮೇರೆಗೆ ಅನೇಕ ರಷ್ಯಾ ಚಾನೆಲ್ಗಳು ಇನ್ಮುಂದೆ ಯೂಕ್ರೇನ್ನಲ್ಲಿ ಹೆಚ್ಚು ದಿನ ಇರುವುದಿಲ್ಲ ಎಂದಿದ್ದಾರೆ. (ಏಜೆನ್ಸೀಸ್)
ಜಗನ್ vs ಪವನ್: ಭೀಮ್ಲಾ ನಾಯಕ್ ಚಿತ್ರಕ್ಕೆ ಆಂಧ್ರದಲ್ಲಿ ಉಂಟಾದ ನಷ್ಟದ ಮೊತ್ತ ಹೀಗಿದೆ…
ಕಿಚ್ಚ ಸುದೀಪ್ ಕೈಯಲ್ಲಿದೆ ದುಬಾರಿ ವಾಚ್: ಇದರ ಬೆಲೆ ಕೇಳಿದ್ರೆ ನಿಮ್ಮ ಹುಬ್ಬೇರೋದು ಗ್ಯಾರೆಂಟಿ!
ಬೋಲ್ಡ್ ಅಂಡ್ ಬ್ಯೂಟಿಫುಲ್ ಬೆಡಗಿ…ಇದುವರೆಗೂ ನೀವು ನೋಡಿರದ ನಟಿ ವೇದಿಕಾರ ಹಾಟ್ ಅವತಾರವಿದು!