ಚೆನ್ನೈ: ಕೆಜಿಎಫ್ ಚಾಪ್ಟರ್-2ಗೆ ತಮಿಳುನಾಡಿನಲ್ಲಿ ಪೈಪೋಟಿ ನೀಡಲು ಇಳಯದಳಪತಿ ವಿಜಯ್ ಅಭಿನಯದ ಬೀಸ್ಟ್ ಚಿತ್ರ ಸಜ್ಜಾಗಿದೆ. ಕೆಜಿಎಫ್ಗಿಂತ ಒಂದು ದಿನದ ಮುಂಚೆಯೇ ಅಂದರೆ, ಏಪ್ರಿಲ್ 13ರಂದು ಬೀಸ್ಟ್ ಚಿತ್ರ ವಿಶ್ವದಾದ್ಯಂತ ತೆರೆಕಾಣುತ್ತಿದೆ. ಕೆಜಿಎಫ್ ವಿರುದ್ಧ ಸ್ಪರ್ಧೆಗೆ ನಿಂತಿರುವುದರಿಂದ ಸಹಜವಾಗಿಯೇ ಬೀಸ್ಟ್ ಚಿತ್ರದ ಮೇಲೆ ಕುತೂಹಲ ಮೂಡಿದೆ. ಹಾಗಾದರೆ ಈ ಚಿತ್ರ ಹೇಗಿರಬಹುದು ಎಂಬ ಕುತೂಹಲ ನಿಮಗಿದ್ದರೆ ಮುಂದೆ ಓದಿ…
ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಮೂಲದ ಸ್ವಘೋಷಿತ ಸಿನಿಮಾ ವಿಮರ್ಶಕ ಉಮೇರ್ ಸಂಧು ಬೀಸ್ಟ್ ಚಿತ್ರದ ಮೊದಲ ವಿಮರ್ಶೆಯನ್ನು ನೀಡಿದ್ದಾರೆ. ಚಿತ್ರವನ್ನು ಮೆಚ್ಚಿಕೊಂಡಿರುವ ಉಮೇರ್, ಬೀಸ್ಟ್ ಒಂದು ಚತುರ ಅಥವಾ ಜಾಣ್ಮೆಯ ಆ್ಯಕ್ಸನ್ ಥ್ರಿಲ್ಲರ್ ಸಿನಿಮಾ ಎಂದಿದ್ದಾರೆ. ವಿಜಯ್ ಅವರು ಅತ್ಯದ್ಭುತ ನಟನೆಯನ್ನು ಈ ಸಿನಿಮಾದಲ್ಲಿ ನಿರ್ವಹಿಸಿದ್ದಾರೆ. ವಿಜಯ್ ತೆರೆಯ ಮೇಲೆ ಕಂಡಾಗಲೆಲ್ಲ ಬೇಸರದ ಕ್ಷಣ ಎಂಬುದು ಬರುವುದೇ ಇಲ್ಲ ಎನ್ನುವ ಮೂಲಕ ಸಿನಿಮಾವನ್ನು ಮೆಚ್ಚಿಕೊಂಡಿದ್ದಾರೆ.
ವಿಜಯ್ ಇಡೀ ಚಿತ್ರವನ್ನು ಆವರಿಸಿದ್ದಾರೆ. ಈ ಚಿತ್ರವು ನಿಮ್ಮನ್ನು ಕೊನೆಯವರೆಗೂ ಹಿಡಿದಿಡುತ್ತದೆ, ನಿಮ್ಮನ್ನು ಅದರೊಳಗೆ ಸೆಳೆದುಕೊಳ್ಳುತ್ತದೆ ಮತ್ತು ಪರವಶವಾಗುವಂತೆ ಮಾಡುತ್ತದೆ. ಇನ್ನು ಚಿತ್ರದ ಸ್ಕ್ರೀನ್ಪ್ಲೇ ಅಂತೂ ರೇಜರ್ ಶಾರ್ಪ್ ಎಂದಿರುವ ಉಮೇರ್, ಅಂತಿಮವಾಗಿ ವಿಜಯ್ ನಟನೆಯನ್ನು ಕೊಂಡಾಡಿದ್ದು, ಶಾಕಿಂಗ್ ಮತ್ತು ಚಪ್ಪಾಳೆಗೆ ಅರ್ಹವಾಗಿರುವ ಅಮೋಘ ಅಭಿನಯ ಎಂದು ಬಣ್ಣಿಸಿದ್ದಾರೆ.
ಬೀಸ್ಟ್ ಚಿತ್ರದ ಟ್ರೇಲರ್ ಈಗಾಗಲೇ ಯೂಟ್ಯೂಬ್ನಲ್ಲಿ ದಾಖಲೆ ಬರೆದಿದೆ. ಚಿತ್ರದ ಹಾಡುಗಳಂತೂ ಸಿಕ್ಕಾಪಟ್ಟೆ ಕ್ರೇಜ್ ಸೃಷ್ಟಿಸಿದೆ. ಆದರೆ, ಚಿತ್ರದಲ್ಲಿ ಮುಸ್ಲಿಂ ಭಯೋತ್ಪಾದನೆಯ ಬಗ್ಗೆ ನೆಗಿಟಿವ್ ಆಗಿ ತೋರಿಸಲಾಗಿದೆ ಎಂಬ ಕಾರಣಕ್ಕೆ ಕುವೈತ್ ಮತ್ತು ಕತಾರ್ನಲ್ಲಿ ಈ ಚಿತ್ರವನ್ನು ಬ್ಯಾನ್ ಮಾಡಲಾಗಿದೆ. ಆದರೆ, ದುಬೈನಲ್ಲಿ ಈ ಚಿತ್ರಕ್ಕೆ ಹಸಿರು ನಿಶಾನೆ ಸಿಕ್ಕಿರುವುದು ಅಚ್ಚರಿಯ ಸಂಗತಿಯಾಗಿದೆ.
ಇನ್ನು ಚಿತ್ರವನ್ನು ನೆಲ್ಸನ್ ದಿಲೀಪ್ಕುಮಾರ್ ನಿರ್ದೇಶನ ಮಾಡಿದ್ದು, ಅನಿರುದ್ಧ್ ಸಂಗೀತ ನೀಡಿದ್ದಾರೆ. ವಿಜಯ್ ಮತ್ತು ಪೂಜಾ ಹೆಗ್ಡೆ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. (ಏಜೆನ್ಸೀಸ್)
ಮುಸ್ಕಾನ್ ತನಿಖೆ ತಪ್ಪಲ್ಲ: ಉರಿವ ಬೆಂಕಿಗೆ ತುಪ್ಪ ಸುರಿವ ಕೆಲಸ ಆಗಬಾರದೆಂದ ಸಂಸದೆ ಸುಮಲತಾ
ತಾಯಿಯಾಗುತ್ತಿರುವ ಖುಷಿಯಲ್ಲಿ ಪ್ರಣೀತಾ: ವಿಭಿನ್ನವಾಗಿ ಸುದ್ದಿ ಹಂಚಿಕೊಂಡ ದಂಪತಿ
ಮೂರು ಬಾರಿ PSI ಪರೀಕ್ಷೆ ಬರೆದು ಪಾಸ್ ಆಗದೇ 4ನೇ ಬಾರಿ ಅಕ್ರಮ ದಾರಿ ಹಿಡಿದು ಸಿಕ್ಕಿಬಿದ್ದ ಕಾನ್ಸ್ಟೇಬಲ್ ಪುತ್ರ