ಫೇಸ್​ಬುಕ್​ನಲ್ಲಿ ಜಂಟಲ್​ಮನ್​ ಸಿನಿಮಾ ಅಪ್​ಲೋಡ್​; ಕಿಡಿಗೇಡಿಗಳ ವಿರುದ್ಧ ದೂರು

ಈ ವರ್ಷದ ಸೂಪರ್​ ಹಿಟ್ ಸಿನಿಮಾ ಎಂದೇ ಕರೆಸಿಕೊಂಡಿರುವ ಡೈನಾಮಿಕ್​ ಪ್ರಿನ್ಸ್ ಪ್ರಜ್ವಲ್​ ದೇವರಾಜ್​ ನಟನೆಯ ಜಂಟಲ್​ಮನ್​ ಸಿನಿಮಾ ಪ್ರೇಕ್ಷಕರಿಂದ ಒಳ್ಳೇ ವಿಮರ್ಶೆಯನ್ನೇ ಗಟ್ಟಿಸಿಕೊಂಡಿತ್ತು. ಅದೇ ರೀತಿ, ಒಳ್ಳೇ ಮೊತ್ತಕ್ಕೆ ಟಿವಿ ಹಕ್ಕುಗಳು ಮಾರಾಟವಾಗಿದ್ದವು. ಹೀಗಿರುವಾಗಲೇ ಮೊನ್ನೆಯಷ್ಟೇ ಟಿವಿಯಲ್ಲಿ ಪ್ರಸಾರವಾಗಿದ್ದ ಜಂಟಲ್​ಮನ್​ ಸಿನಿಮಾ ಇದೀಗ ಫೇಸ್​ಬುಕ್​ನಲ್ಲಿ ಹರಿದಾಡುತ್ತಿದೆ!
ಹೌದು, ಅಭಿ ಗೌಡ ಎಂಬುವವರು, ಟಿವಿಯಲ್ಲಿ ಪ್ರಸಾರವಾಗಿದ್ದ ಜಂಟಲ್​ಮನ್​ ಸಿನಿಮಾವನ್ನು ಫೋನ್​ನಲ್ಲಿ ರೆಕಾರ್ಡ್​ ಮಾಡಿ, ಫೇಸ್​ಬುಕ್​ ಖಾತೆ ಮೂಲಕ ಅಪ್​ಲೋಡ್​ ಮಾಡಿದ್ದ. ಈ ವಿಡಿಯೋ ಅಪ್​ಲೋಡ್​ ಆಗುತ್ತಿದ್ದಂತೆ ಸಾಕಷ್ಟು ಮಂದಿ ಅದನ್ನು ಶೇರ್​ ಮಾಡಿಕೊಂಡು, ಅಲ್ಲಿಯೇ ಸಿನಿಮಾ ನೋಡಿದ್ದಾರೆ.

ಇದನ್ನೂ ಓದಿ: ನಂಗೇನು ಕ್ವಾರಂಟೈನ್​ ಹೊಸದಲ್ಲ; ಸುದೀಪ್​ ಎಕ್ಸ್​ಕ್ಲೂಸಿವ್ ಮಾತು

ಈ ಬಗ್ಗೆ ವಿಜಯವಾಣಿ ಜತೆ ಮಾತನಾಡುವ ಚಿತ್ರದ ನಿರ್ಮಾಪಕ ಗುರು ದೇಶಪಾಂಡೆ, ‘ಶನಿವಾರ ಸಂಜೆ ಉದಯ ಟಿವಿಯಲ್ಲಿ ಸಿನಿಮಾ ಪ್ರಸಾರವಾಗಿದೆ. ಅದನ್ನು ರೆಕಾರ್ಡ್ ಮಾಡಿ ಭಾನುವಾರ ಪೋಸ್ಟ್ ಮಾಡಿದ್ದಾರೆ. ಅಪ್ಪು ರಾಜರತ್ನ ಎಂಬ ಫೇಸ್​ಬುಕ್​ ಅಕೌಂಟ್​ನಿಂದ ಈ ಕೆಲಸ ಆಗಿದ್ದೇ ತಡ, ಅವರನ್ನು ಸಂಪರ್ಕಿಸಿ ವಿಡಿಯೋ ಡಿಲಿಟ್​ ಮಾಡಿಸಿದ್ದೇವೆ. ಅಷ್ಟರಲ್ಲಾಗಲೇ 2000 ಬಾರಿ ಶೇರ್​ ಆಗಿತ್ತು, 1ಲಕ್ಷಕ್ಕೂ ಹೆಚ್ಚು ಬಾರೀ ವೀಕ್ಷಣೆ ಪಡೆದುಕೊಂಡಿತ್ತು. ಬಳಿಕ ಅಭಿ ಗೌಡ ಶೇರ್​ ಮಾಡಿಕೊಂಡಿದ್ದಾರೆ. ಹಾಗಾಗಿ ಸಿನಿಮಾದ ಹಕ್ಕುಗಳು ಉದಯ ವಾಹಿನಿ ಕಡೆ ಇರುವುದರಿಂದ, ಅವರ ಗಮನಕ್ಕೆ ತಂದಿದ್ದೇನೆ. ದೂರು ನೀಡಲು ಮುಂದಾಗಿದ್ದೇವೆ’ ಎಂದು ಮಾಹಿತಿ ನೀಡುತ್ತಾರೆ.
ಇನ್ನು ಈ ರೀತಿ ರೆಕಾರ್ಡ್​ ಮಾಡಿ ಸಿನಿಮಾ ಅಪ್​ಲೋಡ್​ ಮಾಡುವುದು ಕಾನೂನು ಬಾಹಿರ. ಒಂದು ವೇಳೆ ಅಂಥ ಪ್ರಕರಣಗಳು ಕಂಡು ಬಂದಲ್ಲಿ. ಆ ಕೆಲಸ ಮಾಡಿದ ವ್ಯಕ್ತಿಯ ವಿರುದ್ಧ ದೂರು ನೀಡಬಹುದು. ಜೈಲು ಶಿಕ್ಷೆಯನ್ನೂ ವಿಧಿಸಲಾಗುತ್ತದೆ.

ಇದನ್ನೂ ಓದಿ: VIDEO| ಹಾರ್ದಿಕ್ ಪಾಂಡ್ಯ ವರ್ಕೌಟ್‌ಗೆ ಬಾಲಿವುಡ್ ನಟಿಯರು ಬೌಲ್ಡ್!

ಅಂದಹಾಗೆ, ಪ್ರಜ್ವಲ್​ ನಾಯಕನಾಗಿ ನಟಿಸಿದರೆ, ನಿಶ್ವಿಕಾ ನಾಯ್ಡು ನಾಯಕಿಯಾಗಿದ್ದರು. ಇನ್ನುಳಿದಂತೆ ಸಂಚಾರಿ ವಿಜಯ್​ ಸಹ ಪೊಲೀಸ್ ಪಾತ್ರ ನಿಭಾಯಿಸಿದ್ದರು. ಜಡೇಶ್ ಕುಮಾರ್ ಹಂಪಿ ನಿರ್ದೇಶನದಲ್ಲಿ ಈ ಸಿನಿಮಾ ಮೂಡಿಬಂದಿತ್ತು.

https://www.vijayavani.net/sonakshi-sinha-de-activate-twitter-account/