ಸ್ಪೇಸ್ಎಕ್ಸ್ ಸಂಸ್ಥೆಯು 2023ರಲ್ಲಿ ಸಾಮಾನ್ಯ ಜನರನ್ನು ಚಂದ್ರನಲ್ಲಿಗೆ ಕರೆದುಕೊಂಡು ಹೋಗುವುದಾಗಿ 2018ರಲ್ಲಿ ಘೋಷಿಸಿತ್ತು. ಆ ಘೋಷಣೆ ಆದ ತಕ್ಷಣವೇ ಜಪಾನ್ನ ಆನ್ಲೈನ್ ಫ್ಯಾಶನ್ ಉದ್ಯಮಿ ಯುಸಾಕು ಮೇಜಾವಾ, ತನ್ನ ಸೀಟನ್ನು ಕಾಯ್ದಿರಿಸಿಕೊಂಡಿದ್ದಾರೆ. ಇದೀಗ ಆ ಕುರಿತಾಗಿ ವಿಡಿಯೋವೊಂದನ್ನು ಬಿಡುಗಡೆ ಮಾಡಿದ್ದಾರೆ. ನಾನು ಒಂಬತ್ತು ಸೀಟುಗಳನ್ನು ಕಾಯ್ದರಿಸಿದ್ದೇನೆ. ಕಲಾವಿದರನ್ನು ಕರೆದುಕೊಂಡು ಹೋಗೋಣ ಎಂದು ಮೊದಲು ನಿರ್ಧರಿಸಿದ್ದೆ. ಆದರೆ ಸೃಜನಾತ್ಮಕವಾಗಿ ಏನನ್ನಾದರೂ ಮಾಡುವ ಪ್ರತಿಯೊಬ್ಬ ವ್ಯಕ್ತಿಯನ್ನೂ ಕಲಾವಿದ ಎಂದು ಕರೆಯಬಹುದು ಎನ್ನುವುದು ಈಗ ನನ್ನ ಅರಿವಿಗೆ ಬಂದಿದೆ. ಹಾಗಾಗಿ ಪ್ರಪಂಚದ ಯಾವುದೇ ಮೂಲೆಯಲ್ಲಿರುವ ಜನರು ಇದಕ್ಕೆ ಅರ್ಜಿ ಹಾಕಬಹುದು ಎಂದು ಅವರು ಹೇಳಿಕೊಂಡಿದ್ದಾರೆ. ಇದೊಂದು ಖಾಸಗಿ ಪ್ರಯಾಣವಾಗಿರಲಿದೆ ಎಂದು ಅವರು ತಿಳಿಸಿದ್ದಾರೆ.
