ಕಾರವಾರ: ಕಾಂಗ್ರೆಸ್ ಪಕ್ಷವನ್ನು ಕಟ್ಟಲು ಶ್ರಮಿಸಿದ ನಾಮಧಾರಿ ನಾಯಕರನ್ನು ಮುಗಿಸಲು ಪಕ್ಷದ ರಾಜ್ಯಮಟ್ಟದ ನಾಯಕರು ಹುನ್ನಾರ ನಡೆಸಿದ್ದಾರೆ ಎಂದು ರಾಷ್ಟ್ರೀಯ ಈಡಿಗ ಮಹಾ ಮಂಡಲದ ಅಧ್ಯಕ್ಷ, ಬ್ರಹ್ಮಶ್ರೀ ನಾರಾಯಣಗುರು ಶಕ್ತಿ ಪೀಠದ ಪ್ರಣವಾನಂದ ಸ್ವಾಮೀಜಿ ಆರೋಪಿಸಿದರು.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಅಹಿಂದ ಸಂಘಟನೆಯನ್ನು ಕಟ್ಟಿ ಸಿದ್ದರಾಮಯ್ಯ ಅವರು ಬೆಳೆಯಲು ಆರ್.ಎಲ್.ಜಾಲಪ್ಪ ಸೇರಿ ಹಲವು ಈಡಿಗ ನಾಯಕರು ಬೆಂಬಲವಾಗಿ ನಿಂತರು. ಆದರೆ, ಅಽಕಾರಕ್ಕೆ ಬಂದ ನಂತರ ಸಿದ್ದರಾಮಯ್ಯ ಅವರು ಈಡಿಗ ನಾಯಕರನ್ನು ಮೂಲೆಗುಂಪು ಮಾಡುತ್ತಿದ್ದಾರೆ.
ಮೂರು ವರ್ಷಗಳ ಹಿಂದೆ ಪಕ್ಷಕ್ಕೆ ಬಂದ ಮಧು ಅವರನ್ನು ಬಿಟ್ಟು ಬೇರೆ ಯಾರಿಗೂ ಸಚಿವ ಸ್ಥಾನ ನೀಡಿಲ್ಲ. ಕಾಂಗ್ರೆಸ್ ಹಿರಿಯ ನಾಯಕ ಬಿ.ಕೆ.ಹರಿಪ್ರಸಾದ ಅವರಿಗೆ ಅಧಿಕಾರ ನೀಡದೇ ವಂಚಿಸಲಾಗಿದೆ. ಬೇಳೂರು ಗೋಪಾಲಕೃಷ್ಣ ಅವರಿಗೆ ಯಾರಿಗೂ ಬೇಡದ ಒಂದು ನಿಗಮವನ್ನು ನೀಡಲಾಗಿದೆ. ಹಿಂದೆ ಬಿಜೆಪಿ ಸರ್ಕಾರದಲ್ಲಿ ಇಬ್ಬರು ಸಚಿವರು ಹಾಗೂ ನಾಲ್ಕು ನಿಗಮ ಮಂಡಳಿಗಳ ಅಧ್ಯಕ್ಷ ಸ್ಥಾನ ನೀಡಲಾಗಿತ್ತು. ಅಷ್ಟು ಸ್ಥಾನಗಳನ್ನೂ ನೀಡದೇ ಕಾಂಗ್ರೆಸ್ ಸಮುದಾಯವನ್ನು ಕಡೆಗಣಿಸುತ್ತಿದೆ. ಕಳೆದ ಲೋಕಸಭಾ ಚುನಾವಣೆಯಲ್ಲಿಯೂ ನಮ್ಮನ್ನು ಟಿಕೆಟ್‌ನಿಂದ ವಂಚಿತರನ್ನಾಗಿ ಮಾಡಲಾಗಿದೆ. ಇದರಿಂದ ಈಗ 9 ಎಂಎಲ್‌ಸಿ ಸೀಟುಗಳಿಗೆ ಚುನಾವಣೆ ನಡೆದಿದ್ದು, ಈಡಿಗ ಸಮುದಾಯದ ಎ.ರವೀಂದ್ರನಾಥ ನಾಯ್ಕ ಅಥವಾ ಸಿ.ಎಫ್.ನಾಯ್ಕ ಮುಂತಾದ ಪಕ್ಷಕ್ಕೆ ದುಡಿದ ಹಿರಿಯರಿಗೆ ಟಿಕೆಟ್ ನೀಡಬೇಕು ಎಂದು ಒತ್ತಾಯಿಸಿದರು.
ಸಿದ್ದರಾಮಯ್ಯ ಅವರು ಅಧಿಕಾರಕ್ಕೆ ಬಂದ ನಂತರ ಮೇಲ್ವರ್ಗದ ನಿಗಮಗಳಿಗೆ 240 ಕೋಟಿ ರೂ. ಅನುದಾನ ಕೊಟ್ಟರು. ಆದರೆ, ಹಿಂದಿನ ಸರ್ಕಾರ ಘೋಷಿಸಿದ ನಾರಾಯಣಗುರು ನಿಗಮಕ್ಕೆ ನಯಾ ಪೈಸೆ ಹಣ ನೀಡಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.
ರಾಜಕೀಯಕ್ಕಂಟಿದ ಹೊಲಸು
ಸಿಡಿ, ಪೆನ್‌ಡ್ರೈವ್‌ ಪ್ರಕರಣ ಕರ್ನಾಟಕ ರಾಜಕಾರಣಕ್ಕಂಟಿದ ಕೊಳಕು ಎಂದು ಪ್ರಣವಾನಂದ ಸ್ವಾಮೀಜಿ ವಿಶ್ಲೇಷಿಸಿದರು. ಯಾರು ಅಪರಾಧ ಮಾಡಿದ್ದಾರೋ ಅವರಿಗೆ ಶಿಕ್ಷೆಯಾಗಬೇಕು ಎಂಬುದು ನಿರ್ವಿವಾದ. ಆದರೆ, ವೈಯಕ್ತಿಕ ವಿಚಾರಗಳನ್ನು ತಂದು ಕರ್ನಾಟಕದ ಮಾನ ಕಳೆಯಲಾಗುತ್ತಿದೆ. ದೇವೆಗೌಡರಂಥ ಹಿರಿಯರನ್ನು ಅಪಮಾನ ಮಾಡುತ್ತಿರುವುದು ಖಂಡನೀಯ ಎಂದರು.
……
