ಬೈಕ್​ ಸವಾರನನ್ನು ಬಲಿ ಪಡೆದ ರಸ್ತೆಗುಂಡಿ; ಎಚ್ಚೆತ್ತುಕೊಂಡಿತು ಮಹಾನಗರ ಪಾಲಿಕೆ!

ಚೆನ್ನೈ: ರಸ್ತೆಗುಂಡಿಗಳು ಯಮಗುಂಡಿಗಳಾಗಿ ಬೈಕ್​ ಸವಾರರ ಪ್ರಾಣ ತೆಗೆದ ಹತ್ತು ಹಲವು ಪ್ರಕರಣಗಳು ಇತ್ತೀಚೆಗೆ ವರದಿಯಾಗಿವೆ. ಇದೇ ರೀತಿಯಾಗಿ ಚೆನ್ನೈ ನಗರದ ಹೆದ್ದಾರಿಯೊಂದರಲ್ಲಿ ರಸ್ತೆಗುಂಡಿಯಿಂದಾಗಿ ನಿಯಂತ್ರಣ ತಪ್ಪಿದ ಬೈಕ್​ ಸವಾರನ ಮೇಲೆ ಸಾರಿಗೆ ಬಸ್​ ಹಾದುಹೋದ ಘಟನೆ ನಡೆದಿದೆ. ಈ ಘಟನೆಯಿಂದ ಎಚ್ಚೆತ್ತುಕೊಂಡಿರುವ ಚೆನ್ನೈ ಮಹಾನಗರ ಪಾಲಿಕೆ, ನಗರದಾದ್ಯಂತದ ಅಪಾಯಕಾರಿ ರಸ್ತೆಗುಂಡಿಗಳನ್ನು ಮುಚ್ಚುವ ಕಾರ್ಯ ಕೈಗೊಳ್ಳಲು ಮುಂದಾಗಿದೆ.

ಚೆನ್ನೈನ ಅಣ್ಣಾ ಸಲೈ ರಸ್ತೆಯಲ್ಲಿ ನ.1 ರ ಸೋಮವಾರ 32 ವರ್ಷ ವಯಸ್ಸಿನ ಸಾಫ್ಟ್​ವೇರ್​ ಇಂಜಿನಿಯರ್​ ಮೊಹಮ್ಮದ್​ ಯೂನುಸ್​​ರ​ ಬೈಕ್​ ರಸ್ತೆಗುಂಡಿಗೆ ಇಳಿದ ಪರಿಣಾಮ ಅವರು ರಸ್ತೆಯ ಮೇಲೆ ಬಿದ್ದರು. ಪಕ್ಕದಲ್ಲೇ ಚಲಿಸುತ್ತಿದ್ದ ಸರ್ಕಾರಿ ಸಾರಿಗೆ ಬಸ್​ ಅವರ ಮೇಲೆ ಸಾಗಿದ್ದು, ಸ್ಥಳದಲ್ಲೇ ಸಾವಪ್ಪಿದರು. ಈ ಘಟನೆಯ ಸಿಸಿಟಿವಿ ಫೂಟೇಜ್​ ವೈರಲ್​ ಆಗಿದ್ದು, ಸಾರ್ವಜನಿಕರು ಮಳೆಗಾಲದ ಸಂದರ್ಭದಲ್ಲಿ ರಸ್ತೆಗುಂಡಿಗಳನ್ನು ಮುಚ್ಚದಿರುವ ಬಗ್ಗೆ ನಗರಪಾಲಿಕೆ ಮತ್ತು ರಾಜ್ಯ ಸರ್ಕಾರದ ವಿರುದ್ಧ ಆಕ್ರೋಶ ಹೊರಹಾಕಿದ್ದರು.

ಇದನ್ನೂ ಓದಿ: ರಸ್ತೆ ಗುಂಡಿಗಳ ವಿರುದ್ಧ ಎಎಪಿ ಕಾರ್ಯಪಡೆ, ವಾಟ್ಸಾಪ್ ಸಹಾಯವಾಣಿ

ಈ ಹಿನ್ನೆಲೆಯಲ್ಲಿ ಗ್ರೇಟರ್​ ಚೆನ್ನೈ ಕಾರ್ಪೋರೇಷನ್​ (ಜಿಸಿಸಿ) ವ್ಯಾಪ್ತಿಯಲ್ಲಿ ಬರುವ ರಸ್ತೆಗಳಲ್ಲಿ ಉಂಟಾಗಿರುವ 40 ಮಿಲಿಮೀಟರ್​ಗೂ ಹೆಚ್ಚು ದೊಡ್ಡದಾದ ಗುಂಡಿಗಳನ್ನು ಮುಚ್ಚಲು ತಕ್ಷಣವೇ ಕ್ರಮ ಕೈಗೊಳ್ಳಲು ನಿರ್ಧರಿಸಲಾಗಿದೆ. ಈ ಕೆಲಸಕ್ಕಾಗಿ ಜಿಸಿಸಿಯು 1,000 ಕಾರ್ಮಿಕರನ್ನು ನಿಯೋಜನೆಗೊಳಿಸಲಿದ್ದು, 15 ವಲಯಗಳಿಗೆ ತಲಾ 10 ಲಕ್ಷ ರೂ. ಬಿಡುಗಡೆ ಮಾಡಲಾಗುವುದು ಎನ್ನಲಾಗಿದೆ. (ಏಜೆನ್ಸೀಸ್)

https://www.vijayavani.net/former-mla-slaps-police-during-protests/

https://www.vijayavani.net/2-year-old-child-sexually-abused-police-arrest-the-accused/