ಮುಂಬೈ : ವಿವಾಹೇತರ ಸಂಬಂಧ ಹೊಂದಿದ ಕಾರಣಕ್ಕೆ ಪೊಲೀಸ್ ಅಧಿಕಾರಿಯೊಬ್ಬರ ಇನ್ಕ್ರಿಮೆಂಟ್ಅನ್ನು ಒಂದು ವರ್ಷದ ಮಟ್ಟಿಗೆ ಸಸ್ಪೆಂಡ್ ಮಾಡಲಾಗಿದೆ. ಮುಂಬೈ ನಗರದ ನಾಗಪಡ ಪೊಲೀಸ್ ಠಾಣೆಯಲ್ಲಿ ಸಹಾಯಕ ಪೊಲೀಸ್ ಇನ್ಸ್ಪೆಕ್ಟರ್(ಎಪಿಐ) ಆಗಿರುವ ಧನರಾಜ್ ಪ್ರಭಾಲೆ ಎಂಬುವರು ಈ ಶಿಕ್ಷೆಗೆ ಒಳಗಾದ ಅಧಿಕಾರಿ.
ಮುಂಬೈ ಹೆಚ್ಚುವರಿ ಪೊಲೀಸ್ ಕಮಿಷನರ್ ಧ್ಯಾನೇಶ್ವರ್ ಚವನ್ ಹೊರಡಿಸಿರುವ ಆದೇಶದಲ್ಲಿ, ಕಳೆದ ಫೆಬ್ರವರಿಯಲ್ಲಿ, ವಿವಾಹಿತನಾದ ಎಪಿಐ ಪ್ರಭಾಲೆ ಫೇಸ್ಬುಕ್ನಲ್ಲಿ ಒಬ್ಬ ಮಹಿಳೆಯೊಂದಿಗೆ ಪರಿಚಯ ಬೆಳೆಸಿಕೊಂಡು, ತದನಂತರ ಅವಳೊಂದಿಗೆ ಅನೈತಿಕ ಸಂಬಂಧ ಬೆಳೆಸಿದ ಎಂದು ತಿಳಿಸಲಾಗಿದೆ.
ಇದನ್ನೂ ಓದಿ: ವಯಸ್ಸಾದರೂ ಮದುವೆಯಾಗಿಲ್ಲವೆಂದು ಹೆತ್ತವರಿಂದಲೇ ಸಿನಿಮಾ ನಿರ್ದೇಶಕನ ಬರ್ಬರ ಹತ್ಯೆ- ದೇಹ ಪೀಸ್ ಪೀಸ್!
ಮಹಿಳೆಯು ಫೇಸ್ಬುಕ್ನಲ್ಲಿ ತನ್ನ ಕೇಟರಿಂಗ್ ಬಿಸಿನೆಸ್ ಬಗ್ಗೆ ಜಾಹೀರಾತು ಪ್ರಕಟಿಸಿದ್ದಳು. ಪ್ರಭಾಲೆ ಅವಳಿಗೆ ಬಿಸಿನೆಸ್ ಸೆಟ್ ಮಾಡಲು ಸಹಾಯ ಮಾಡುವುದಾಗಿ ತಿಳಿಸಿದ. ಇಬ್ಬರೂ ಭೇಟಿಯಾಗಲು ಆರಂಭಿಸಿದರು. ಈ ರೀತಿ ಬೆಳೆದ ಅವರ ಸಂಬಂಧ ಸ್ವಲ್ಪ ಸಮಯದ ನಂತರ ಕೆಟ್ಟಿದ್ದು, ಆ ಮಹಿಳೆ ಮೇಲಧಿಕಾರಿಗಳಿಗೆ ತನ್ನನ್ನು ಶೋಷಿಸಲಾಗಿದೆ ಎಂದು ದೂರು ನೀಡಿದಳು ಎನ್ನಲಾಗಿದೆ.
ಇಲಾಖಾ ತನಿಖೆಯಲ್ಲಿ, ಎಪಿಐ ಪ್ರಭಾಲೆ ಅಶಿಸ್ತಿನಿಂದ ವರ್ತಿಸಿದ್ದು, ಪೊಲೀಸ್ ಇಲಾಖೆಯ ವರ್ಚಸ್ಸನ್ನು ಹಾಳು ಮಾಡುವಂತೆ ನಡೆದುಕೊಂಡಿದ್ದಾನೆಂದು ನಿರ್ಣಯ ಮಾಡಲಾಗಿದೆ. ಇದಕ್ಕೆ ಶಿಕ್ಷೆಯಾಗಿ ಒಂದು ವರ್ಷ ಆತನ ಇನ್ಕ್ರಿಮೆಂಟ್ಅನ್ನು ಸಸ್ಪೆಂಡ್ ಮಾಡಲಾಗಿದೆ. ಪೊಲೀಸ್ ಮೂಲಗಳ ಪ್ರಕಾರ, ಈ ರೀತಿಯ ಶಿಕ್ಷೆಯು ಪೊಲೀಸ್ ಸಿಬ್ಬಂದಿಯ ಬಡ್ತಿ ಮತ್ತು ಪದಕಗಳನ್ನು ಪಡೆಯುವ ಅರ್ಹತೆಯ ಮೇಲೆ ಪ್ರಭಾವ ಬೀರುವುದರಿಂದ ಭಾರೀ ಪ್ರಮಾಣದ್ದಾಗಿದೆ. (ಏಜೆನ್ಸೀಸ್)