ಬಾಂಗ್ಲಾದೇಶದ ಕಾಳಿ ಮಂದಿರದಲ್ಲಿ ಮೋದಿ ಪ್ರಾರ್ಥನೆ

ಢಾಕಾ : ಹಿಂದೂ ಮಾನ್ಯತೆಯ ಪ್ರಕಾರ 51 ಶಕ್ತಿ ಪೀಠಗಳಲ್ಲಿ ಒಂದಾದ ಜೇಶೋರೇಶ್ವರಿ ಕಾಳಿ ಮಂದಿರದಲ್ಲಿ ಇಂದು ಪ್ರಧಾನಿ ನರೇಂದ್ರ ಮೋದಿ ಪೂಜೆ ಸಲ್ಲಿಸಿದರು. ಈಗ ಬಾಂಗ್ಲಾದೇಶದ ಗಡಿ ಜಿಲ್ಲೆಯಾದ ಸತ್ಖೀರಾದ ಈಶ್ವರೀಪುರ ಗ್ರಾಮದಲ್ಲಿರುವ ಈ ದೇವಾಲಯಕ್ಕೆ ತಮ್ಮ ಬಾಂಗ್ಲಾ ಪ್ರವಾಸದ ಎರಡನೇ ದಿನ ಮೋದಿ ಭೇಟಿ ನೀಡಿದರು.

16ನೇ ಶತಮಾನದಲ್ಲಿ ಹಿಂದೂ ರಾಜನೊಬ್ಬ ಕಟ್ಟಿಸಿದ ಎನ್ನಲಾದ ಈ ದೇವಾಲಯಕ್ಕೆ, ಪೂರ್ವನಿಯೋಜಿತ ಕಾರ್ಯಕ್ರಮದ ಅಂಗವಾಗಿ ಭೇಟಿ ನೀಡಿದ ಮೋದಿ, ಕಾಳಿ ಮಾತೆಗೆ ಮುಕುಟವೊಂದನ್ನು ಅರ್ಪಿಸಿದರು. ಈ ಮುಕುಟವನ್ನು ಮೂರು ವಾರಗಳ ಅವಧಿಯಲ್ಲಿ ಪಾರಂಪರಿಕ ಕಲಾಕರನೊಬ್ಬ ಚಿನ್ನದ ಪ್ಲೇಟಿಂಗ್​ನೊಂದಿಗೆ ಬೆಳ್ಳಿಯಿಂದ ತಯಾರಿಸಿದ್ದಾರೆಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಅರಿಂದಂ ಬಾಗ್ಚಿ ಟ್ವೀಟ್ ಮಾಡಿದ್ದಾರೆ.

ಇದನ್ನೂ ಓದಿ: “10 ಮಿಲಿಯನ್ ಬಾಂಗ್ಲಾದೇಶೀಯರಿಗೆ ಭಾರತ ಆಶ್ರಯ ನೀಡಿದೆ”

ದೇವಾಲಯದ ಅರ್ಚಕರು ಮಂತ್ರ ಹೇಳುತ್ತಿರುವಾಗ ಕೆಳಗೆ ಕೂತು ಕೈಮುಗಿದು ಪ್ರಾರ್ಥನೆ ಸಲ್ಲಿಸುತ್ತಿರುವ ತಮ್ಮ ವಿಡಿಯೋ ಒಂದನ್ನು ಮೋದಿ ಅವರು ಟ್ವಿಟರ್​ನಲ್ಲಿ ಶೇರ್ ಮಾಡಿದ್ದಾರೆ.

ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಮೋದಿ, "ಕೆಲವೇ ವಾರಗಳಲ್ಲಿ ಚೈತ್ರೀ ನವರಾತ್ರಿ ಆರಂಭವಾಗಲಿದೆ. ಈ ಪವಿತ್ರ ಸಮಯಕ್ಕೆ ಮುಂಚೆ 51 ಶಕ್ತಿ ಪೀಠಗಳಲ್ಲಿ ಒಂದಾಗಿರುವ ಈ ಪುಣ್ಯ ಸ್ಥಳದಲ್ಲಿ ನನಗೆ ಮಾ ಕಾಳಿಯ ದರ್ಶನ ಭಾಗ್ಯ ಲಭಿಸಿದೆ. ಮಾನವರು ಸಂಕಷ್ಟ ಎದುರಿಸುತ್ತಿರುವ ಈ ಸಮಯದಲ್ಲಿ ಕಾಳಿಮಾತೆಯ ವರದಹಸ್ತ ನಮ್ಮ ಮೇಲಿರಬೇಕು. ಹಾಗಾಗಿ ಕಾಳಿಮಾತೆಯಲ್ಲಿ ಮಾನವ ಜನಾಂಗವನ್ನು ಆದಷ್ಟು ಬೇಗ ಕೋವಿಡ್-19 ರಿಂದ ಮುಕ್ತಗೊಳಿಸುವಂತೆ ಪ್ರಾರ್ಥಿಸಿದ್ದೇನೆ" ಎಂದು ಹೇಳಿದರು.

ಈ ದೇವಾಲಯದಲ್ಲಿ ನಡೆಯುವ 'ಮಾ ಕಾಳಿ ಮೇಳ'ದಲ್ಲಿ ಭಾರತದ ಮತ್ತು ಬಾಂಗ್ಲಾದೇಶದ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸುತ್ತಾರೆ. ಈ ಭಕ್ತರ ಉಪಯೋಗಕ್ಕಾಗಿ ಬಹೂಪಯೋಗಿ ಸಮುದಾಯ ಭವನವೊಂದನ್ನು ಭಾರತ ನಿರ್ಮಿಸುವುದಾಗಿ ಘೋಷಿಸಿದರು. "ಸ್ಥಳೀಯರಿಗೆ ಸಾಮಾಜಿಕ, ಧಾರ್ಮಿಕ ಮತ್ತು ಶೈಕ್ಷಣಿಕ ಕಾರ್ಯಕ್ರಮಗಳಿಗೆ ಬಳಕೆಯಾಗುವಂತಿರಬೇಕು. ಮುಖ್ಯವಾಗಿ ಸೈಕ್ಲೋನ್​ನಂಥ ನೈಸರ್ಗಿಕ ವಿಪತ್ತಿನ ಸಮಯದಲ್ಲಿ ಪ್ರತಿಯೊಬ್ಬರಿಗೂ ಆಶ್ರಯವಾಗಿರಬೇಕು. ಅಂತಹ ಭವನದ ನಿರ್ಮಾಣ ಕಾರ್ಯವನ್ನು ಭಾರತ ಮಾಡಲಿದೆ. ಈ ಕಾರ್ಯಕ್ಕೆ ನಮಗೆ ಶುಭ ಕೋರಿರುವ ಬಾಂಗ್ಲಾದೇಶ ಸರ್ಕಾರಕ್ಕೆ ನಾನು ಋಣಿಯಾಗಿದ್ದೇನೆ" ಎಂದು ಮೋದಿ ಹೇಳಿದರು. (ಏಜೆನ್ಸೀಸ್)

https://www.vijayavani.net/lover-paints-i-love-you-on-road-in-maharashtra/

https://www.vijayavani.net/show-cause-notice-to-candidate-promising-free-ayodhya-trip/