ಸಂಬಳ ಇಲ್ಲದೆ 3ನೇ ತಿಂಗಳಾದರೂ ಈವರೆಗೆ ಸರ್ಕಾರದ ಯಾವುದೇ ಸ್ಪಂದನೆ ಸಿಗದೇ ಇರುವುದಕ್ಕೆ ಆತಂಕಿತರಾಗಿದ್ದಾರೆ. ರಾಜ್ಯದಲ್ಲಿ 61,876 ಮಂದಿ ಅಂಗನವಾಡಿ ಕಾರ್ಯಕರ್ತೆಯರಿದ್ದು, ಜುಲೈ, ಆಗಸ್ಟ್ ತಿಂಗಳ ಸಂಬಳ ಆಗಿಲ್ಲ. ಜೂನ್ ತಿಂಗಳಿನಲ್ಲಿ ಕೆಲವು ಮಂದಿ ಅಂಗನವಾಡಿ ಕಾರ್ಯಕರ್ತೆಯರ ಸಂಬಳ ಆಗಿದ್ದರೆ, ಇನ್ನೂ ಹಲವರಿಗೆ ಜೂನ್ ತಿಂಗಳ ಸಂಬಳ ಇನ್ನೂ ದೊರೆತಿಲ್ಲ. ಪ್ರತಿ ತಿಂಗಳ 25ನೇ ತಾರೀಕಿಗೆ ಅಲಾಟ್ಮೆಂಟ್ ಆಗುತ್ತಿದ್ದು, ಆದರೆ ಅಂಗನವಾಡಿ ಕಾರ್ಯಕರ್ತರ ಸಂಬಳ ಬಿಡುಗಡೆಗೆ ಈವರೆಗೆ ಯಾವುದೇ ಅಲಾಟ್ಮೆಂಟ್ ಕೂಡ ಆಗಿಲ್ಲ. ಹೀಗಾಗಿ ಸೆಪ್ಟೆಂಬರ್ ತಿಂಗಳ ಸಂಬಳ ಕೈ ಸೇರುವುದೂ ಕಷ್ಟ ಎಂಬ ಅಭಿಪ್ರಾಯ ಮೂಡಿದೆ. ಗೌರವಧನದೊಂದಿಗೆ ಪುಟಾಣಿಗಳ ಶೈಕ್ಷಣಿಕ ಸೇವೆ ನೀಡುತ್ತಿರುವ ನೌಕರರು ಇತರೆ ಇಲಾಖೆಗಳ ಸೇವೆಗಳಲ್ಲಿಯೂ ಸಹಕರಿಸುತ್ತಿದ್ದಾರೆ. ಎರಡು ತಿಂಗಳಿನಿಂದ ಸಂಬಳ ಇಲ್ಲದ ಕಾರಣಕ್ಕೆ ದೈನಂದಿನ ಜೀವನ ನಿರ್ವಹಣೆಗೆ ಭಾರಿ ತೊಡಕು ಎದುರಾಗಿದೆ.
