ವಡೋದರ: ದಿಟ್ಟ ಬ್ಯಾಟಿಂಗ್ ನಿರ್ವಹಣೆಯ ಮೂಲಕ ಬೃಹತ್ ಮೊತ್ತದ ಸವಾಲನ್ನು ಬೆನ್ನಟ್ಟಿದ ಆರ್ಸಿಬಿ ತಂಡ “ಮಹಿಳೆಯರ ಐಪಿಎಲ್’ ಖ್ಯಾತಿಯ ವುಮೆನ್ಸ್ ಪ್ರೀಮಿಯರ್ ಲೀಗ್ (ಡಬ್ಲುಪಿಎಲ್) ಮೂರನೇ ಆವೃತ್ತಿಯಲ್ಲಿ ಗೆಲುವಿನ ಆರಂಭ ಕಂಡಿದೆ. ಎಲ್ಲಿಸ್ ಪೆರ್ರಿ (57 ರನ್, 34 ಎಸೆತ, 6 ಬೌಂಡರಿ, 2 ಸಿಕ್ಸರ್) ಮತ್ತು ರಿಚಾ ಘೋಷ್ (64*ರನ್, 27 ಎಸೆತ, 7 ಬೌಂಡರಿ, 4 ಸಿಕ್ಸರ್) ಸ್ಫೋಟಕ ಅರ್ಧಶತಕದ ಬಲದಿಂದ ಹಾಲಿ ಚಾಂಪಿಯನ್ ಆರ್ಸಿಬಿ ತಂಡ, ಗುಜರಾತ್ ಜೈಂಟ್ಸ್ ವಿರುದ್ಧ ಶುಕ್ರವಾರ ನಡೆದ ಉದ್ಘಾಟನಾ ಪಂದ್ಯದಲ್ಲಿ 4 ವಿಕೆಟ್ಗಳಿಂದ ಗೆದ್ದು ಬೀಗಿತು. ಈ ಮೂಲಕ ಟೂರ್ನಿಯಲ್ಲಿ ಗರಿಷ್ಠ ಮೊತ್ತದ ಚೇಸಿಂಗ್ ದಾಖಲೆ ಬರೆಯಿತು.
ನೂತನ ಕೋಟಂಬಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ಗುಜರಾತ್ ಜೈಂಟ್ಸ್, ಎಡಗೈ ಬ್ಯಾಟುಗಾರ್ತಿ ಬೆಥ್ ಮೂನಿ (56 ರನ್, 42 ಎಸೆತ, 8 ಬೌಂಡರಿ), ನಾಯಕಿ ಆಶ್ಲೇ ಗಾರ್ಡ್ನರ್ (79* ರನ್, 37 ಎಸೆತ, 3 ಬೌಂಡರಿ, 8 ಸಿಕ್ಸರ್) ಬಿರುಸಿನ ಬ್ಯಾಟಿಂಗ್ ನೆರವಿನಿಂದ 5 ವಿಕೆಟ್ಗೆ 201 ರನ್ ಪೇರಿಸಿತು. ಪ್ರತಿಯಾಗಿ ಆರ್ಸಿಬಿ 18.3 ಓವರ್ಗಳಲ್ಲಿ 4 ವಿಕೆಟ್ಗೆ 202 ರನ್ ಗಳಿಸಿ ಜಯಿಸಿತು. ರಿಚಾ ಘೋಷ್ ಮತ್ತು ಕನಿಕಾ ಅಹುಜಾ (30*ರನ್, 13 ಎಸೆತ, 4 ಬೌಂಡರಿ) ಮುರಿಯದ 5ನೇ ವಿಕೆಟ್ಗೆ 37 ಎಸೆತಗಳಲ್ಲೇ 93 ರನ್ ಕಸಿಯುವ ಮೂಲಕ ಆರ್ಸಿಬಿಯನ್ನು ಗೆಲುವಿನ ದಡ ಸೇರಿಸಿದರು.
ಪೆರ್ರಿ, ರಿಚಾ ದಿಟ್ಟ ಹೋರಾಟ: ಬ್ಯಾಟಿಂಗ್ ಬಳಿಕ ಬೌಲಿಂಗ್ನಲ್ಲೂ ಆರ್ಸಿಬಿ ತಂಡವನ್ನು ಕಾಡಿದ ಗಾರ್ಡ್ನರ್, ಆರಂಭಿಕರಾದ ನಾಯಕಿ ಸ್ಮೃತಿ ಮಂದನಾ (9) ಮತ್ತು ಡ್ಯಾನಿ ವ್ಯಾಟ್ (4) ವಿಕೆಟ್ಗಳನ್ನು ಬೇಗನೆ ಕಬಳಿಸಿದರು. ಆಗ ಆರ್ಸಿಬಿಗೆ ಆಧಾರವಾದ ಎಲ್ಲಿಸ್ ಪೆರ್ರಿ 3ನೇ ವಿಕೆಟ್ಗೆ ರಾವಿ ಬಿಷ್ಟ್ (25) ಜತೆಗೂಡಿ 55 ಎಸೆತಗಳಲ್ಲಿ 86 ರನ್ ಕಸಿದು ಗೆಲುವಿನಾಸೆಗೆ ಬಲ ತುಂಬಿದರು. ನಂತರ ಇವರಿಬ್ಬರು 9 ರನ್ ಅಂತರದಲ್ಲಿ ಔಟಾದರು. ನಂತರ 46 ಎಸೆತಗಳಲ್ಲಿ 93 ರನ್ ಬೇಕಿದ್ದಾಗ ಜತೆಗೂಡಿದ ರಿಚಾ&ಅಹುಜಾ ಇನ್ನೂ 9 ಎಸೆತ ಬಾಕಿ ಇರುವಂತೆಯೇ ಜಯ ತಂದರು. ಗಾರ್ಡ್ನರ್ ಎಸೆದ ಇನಿಂಗ್ಸ್ನ 16ನೇ ಓವರ್ನಲ್ಲಿ ರಿಚಾ 4 ಬೌಂಡರಿ, 1 ಸಿಕ್ಸರ್ ಸಹಿತ 23 ರನ್ ಕಸಿದರು.
ಪಂದ್ಯದಲ್ಲಿ ಆರ್ಸಿಬಿ ಹಾಗೂ ಗುಜರಾತ್ ಪರ ಒಟ್ಟಾರೆ ಎಂಟು ಆಟಗಾರ್ತಿಯರು ಡಬ್ಲುಪಿಎಲ್ಗೆ ಪದಾರ್ಪಣೆ ಮಾಡಿದರು.
ಗುಜರಾತ್ ಜೈಂಟ್ಸ್: 5 ವಿಕೆಟ್ಗೆ 201 (ಬೆಥ್ ಮೂನಿ 56, ವೊಲ್ವಾರ್ಡ್ 6, ಡಿ. ಹೇಮಲತಾ 4, ಗಾರ್ಡ್ನರ್ 79*, ಡಾಟಿನ್ 25, ಸಿಮ್ರನ್ 11, ಹರ್ಲೀನ್ 9*, ರೇಣುಕಾ ಸಿಂಗ್ 25ಕ್ಕೆ 2, ಪ್ರೇಮಾ 26ಕ್ಕೆ 1). ಆರ್ಸಿಬಿ: 18.3 ಓವರ್ಗಳಲ್ಲಿ 4 ವಿಕೆಟ್ಗೆ 202 (ಸ್ಮೃತಿ 9, ವ್ಯಾಟ್ 4, ಪೆರ್ರಿ 57, ರಾವಿ 25, ರಿಚಾ 64*, ಕನಿಕಾ 30*, ಗಾರ್ಡ್ನರ್ 33ಕ್ಕೆ 2)..