ಪ್ಯಾರಾಲಿಂಪಿಕ್ಸ್​: ವಿನೋದ್​ಕುಮಾರ್​ ಕೈತಪ್ಪಿದ ಕಂಚಿನ ಪದಕ

ಟೋಕಿಯೋ: ನಿನ್ನೆ ಪುರುಷರ ಡಿಸ್ಕಸ್ ಥ್ರೋ ಎಫ್-52 ವಿಭಾಗದಲ್ಲಿ 19.91 ಮೀಟರ್ ದಾಖಲೆ ದೂರ ಎಸೆದು, ಮೂರನೇ ಸ್ಥಾನ ಗಳಿಸಿದ್ದ ಭಾರತದ ವಿನೋದ್ ಕುಮಾರ್ ಅವರು ಅಂಗವೈಕಲ್ಯ ವಿಂಗಡನೆಯ ತಾಂತ್ರಿಕ ಮರುವಿಶ್ಲೇಷಣೆಯಲ್ಲಿ ಅನರ್ಹಗೊಳಿಸಲ್ಪಟ್ಟಿದ್ದಾರೆ. ಹೀಗಾಗಿ ಅವರಿಗೆ ಕಂಚಿನ ಪದಕ ನೀಡಲಾಗುವುದಿಲ್ಲ ಎಂದು ಟೋಕಿಯೋದಲ್ಲಿ ನಡೆಯುತ್ತಿರುವ ಪ್ಯಾರಾಲಿಂಪಿಕ್ಸ್​ 2020ರ ಆಯೋಜಕ ಮಂಡಳಿ ತಿಳಿಸಿದೆ.

41 ವರ್ಷದ ವಿನೋದ್ ಕುಮಾರ್ 6 ಯತ್ನಗಳಲ್ಲೂ ಉತ್ತಮ ನಿರ್ವಹಣೆ ತೋರಲು ಯಶಸ್ವಿಯಾಗಿದ್ದರು. ಅಂಗವೈಕಲ್ಯ ವಿಂಗಡನೆ ಕುರಿತು ಕೆಲವು ಪ್ರತಿಸ್ಪರ್ಧಿಗಳು ತೋರಿದ ಪ್ರತಿಭಟನೆಯಿಂದಾಗಿ ಪದಕ ಪ್ರದಾನವನ್ನು ಮುಂದೂಡಲಾಗಿತ್ತು. ಇದೀಗ ಪ್ಯಾರಾಅಥ್ಲೀಟ್​ಗಳನ್ನು ವಿಂಗಡಿಸಲಾಗುವ ವರ್ಗಕ್ಕೆ ಅವರನ್ನು ಸೇರಿಸಲಾಗದ ಕಾರಣಕ್ಕೆ 'ಕ್ಲಾಸಿಫಿಕೇಶನ್​ ನಾಟ್​ ಕಂಪ್ಲೀಟೆಡ್'​ ಎಂದು ತೀರ್ಮಾನಿಸಲಾಗಿದೆ. ಹೀಗಾಗಿ ಅವರ ಗೆಲುವಿನ ಫಲಿತಾಂಶವನ್ನು ಅನೂರ್ಜಿತಗೊಳಿಸಲಾಗಿದೆ ಎಂದು ಆಯೋಜಕರು ಹೇಳಿದ್ದಾರೆ.

ಇದನ್ನೂ ಓದಿ: ಕರೊನಾ ಟೆಸ್ಟ್​ ನಿರ್ಲಕ್ಷ್ಯ: 19 ವೈದ್ಯಾಧಿಕಾರಿಗಳ ವಿರುದ್ಧ ಶಿಸ್ತು ಕ್ರಮ

ಭಾರತೀಯ ಸೇನೆಯಲ್ಲಿ ಕಾರ್ಯನಿರ್ವಹಿಸಿರುವ ವಿನೋದ್ ಕುಮಾರ್, ಲಡಾಕ್ ಪ್ರದೇಶದ ಲೆಹ್​ನಲ್ಲಿ ಪ್ರಪಾತದಿಂದ ಆಯತಪ್ಪಿ ಬಿದ್ದು ಗಾಯಗೊಂಡಿದ್ದರು. ಹಲವು ವರ್ಷಗಳ ಚಿಕಿತ್ಸೆಯ ನಂತರ ಚೇತರಿಸಿಕೊಂಡಿದ್ದ ಅವರು ವೀಲ್​​ಚೇರ್​ನಲ್ಲೇ ತರಬೇತಿ ಪಡೆದು ಪ್ಯಾರಾಅಥ್ಲೀಟ್​ ಆಗಿ ಗುರುತಿಸಿಕೊಂಡರು.​ 2019ರಲ್ಲಿ ನಡೆದ ವಿಶ್ವ ಪ್ಯಾರಾಥ್ಲೀಟ್ಸ್ ಗ್ರಾನ್ ಪ್ರೀಯಲ್ಲಿ ಈ ಹಿಂದೆ ಪದಕ ಜಯಿಸಿದ್ದಾರೆ. (ಏಜೆನ್ಸೀಸ್)

https://www.vijayavani.net/maruti-car-prices-to-rise-from-september/

https://www.vijayavani.net/kengeri-metro-terminal-starts-operations-train-details-here/