ವೃತ್ತಿಜೀವನದಲ್ಲಿ ಒಂದೇ ಒಂದು ವಿಕೆಟ್​ ಪಡೆದಿರುವವರನ್ನು ಬೌಲಿಂಗ್​ ಕೋಚ್​ ಆಗಿ ನೇಮಿಸಿದ RCB; ಇವರ ಬ್ಯಾಗ್ರೌಂಡ್​ ಮಾತ್ರ...

ಬೆಂಗಳೂರು: 18ನೇ ಆವೃತ್ತಿಯ ಐಪಿಎಲ್​ಗೆ (IPL) ಸಂಬಂಧಿಸಿದ ಕೆಲಸಗಳು ಈಗಾಗಲೇ ಬಿರುಸುಗೊಂಡಿದ್ದು, ನವೆಂಬರ್​ 24-25ರಂದು ನಡೆಯಲಿರುವ ಮೆಗಾ ಹರಾಜು ಪ್ರಕ್ರಿಯೆ ಮೇಲೆ ಎಲ್ಲರು ಕಣ್ಣು ನೆಟ್ಟಿದ್ದಾರೆ. ರಿಟೇನ್​ಗೆ (Retain) ಸಂಬಂಧಿಸಿದಂತೆ ತಂಡಗಳು ಈಗಾಗಲೇ ಪಟ್ಟಿಯನ್ನು ಬಿಡುಗಡೆ ಮಾಡಿದ್ದು, ಆರ್​ಸಿಬಿ (RCB) ತಂಡ ಮೂವರು ಆಟಗಾರರನ್ನು ಉಳಿಸಿಕೊಂಡಿದೆ. ಇನ್ನೂ ಈ ಬಾರಿ ಕಪ್​ ಗೆಲ್ಲಲೇಬೇಕೆಂದು ಪಣ ತೊಟ್ಟಿರುವ ಆರ್​ಸಿಬಿ (RCB) ಹೊಸ ಯೋಜನೆಗಳೊಂದಿಗೆ ಕಣ್ಕಕಿಳಿಯುತ್ತಿದ್ದು, ಇದೀಗ ತಂಡಕ್ಕೆ ನೂತನ ಬೌಲಿಂಗ್​ ಕೋಚ್​ಅನ್ನು ನೇಮಕ ಮಾಡಿದೆ.

ಮುಂಬೈ ತಂಡದ ಸೀನಿಯರ್​ ಕೋಚ್​ ಓಂಕಾರ್​ ಸಾಲ್ವಿ (Omkar Salvi) ಅವರನ್ನು ಫ್ರಾಂಚೈಸಿ ನೇಮಕ ಮಾಡಿದೆ. ಪ್ರಸ್ತುತ ಮುಂಬೈ ರಣಜಿ ತಂಡದ ಮುಖ್ಯ ಕೋಚ್​ ಆಗಿ ಕಾರ್ಯನಿರ್ವಹಿಸುತ್ತಿರುವ ಓಂಕಾರ್​ ಅವರು ಎಂಸಿಎ (MCA) ಜತೆ ಮಾಡಿಕೊಂಡಿರುವ ಒಪ್ಪಂದ ಕೆಲವೇ ತಿಂಗಳುಗಳಲ್ಲಿ ಕೊನೆಗೊಳ್ಳಲಿದ್ದು, ಆ ನಂತರ ಅವರು ಆರ್​ಸಿಬಿ (RCB) ಬೌಲಿಂಗ್​ ಕೋಚ್​ ಆಗಿ ಅದಿಕಾರ ವಹಿಸಿಕೊಳ್ಳಲಿದ್ದಾರೆ.

2023-24 ರ ರಣಜಿ ಟ್ರೋಫಿಗೆ ಮುನ್ನ ಓಂಕಾರ್ ಸಾಲ್ವಿ ಮುಂಬೈ ಮುಖ್ಯ ಕೋಚ್ ಆಗಿ ಅಧಿಕಾರ ವಹಿಸಿಕೊಂಡಿದ್ದರು. ಅವರ ಮುಂದಾಳತ್ವದಲ್ಲೇ, ಮುಂಬೈ 2023-24 ರಣಜಿ ಟ್ರೋಫಿ ಗೆಲ್ಲುವ ಮೂಲಕ 8 ವರ್ಷಗಳ ಸುದೀರ್ಘ ಕಾಯುವಿಕೆಗೆ ಅಂತ್ಯವಾಡಿತ್ತು. ಅಷ್ಟೇ ಅಲ್ಲ, ಮುಂಬೈ ತಂಡ 27 ವರ್ಷಗಳ ನಂತರ ಪ್ರತಿಷ್ಠಿತ ಇರಾನಿ ಕಪ್ ಕೂಡ ಗೆದ್ದಿತ್ತು. ಈ ಎರಡು ಗೆಲುವಿನಿಂದ ಓಂಕಾರ್ ಸಾಲ್ವಿ ಹೆಸರು ದೇಶಿ ಕ್ರಿಕೆಟ್​ ವಲಯದಲ್ಲಿ ಸಖತ್ ಸದ್ದು ಮಾಡಿತ್ತು. ಮುಂಬೈ ರಣಜಿ ತಂಡದ ಮುಖ್ಯ ಕೋಚ್ ಆಗಿರುವ ಸಾಲ್ವಿ ಅವರ ಒಪ್ಪಂದ ಮುಂದಿನ ವರ್ಷ ಮಾರ್ಚ್‌ನಲ್ಲಿ ಕೊನೆಗೊಳ್ಳಲಿದೆ.

2005ರಲ್ಲಿ ರೈಲ್ವೇಸ್​ ಪರ ಒಂದು ಪಂದ್ಯ ಆಡಿರುವ ಓಂಕಾರ್​ ಅವರು ಕೇವಲ 1 ವಿಕೆಟ್​ಅನ್ನು ಪಡೆದಿದ್ದಾರೆ. ಆ ನಂತರ ಅವರು ಕೋಚ್​ ಆಗಿ ಹೆಚ್ಚು ಖ್ಯಾತಿ ಪಡೆದರು. ಓಂಕಾರ್ ಅವರ ತರಬೇತಿಯಲ್ಲಿ ಮುಂಬೈ ತಂಡವು ರಣಜಿ ಪ್ರಶಸ್ತಿಯನ್ನು ಗೆದ್ದುಕೊಂಡರೆ, ಪಂಜಾಬ್ ತಂಡವು ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯನ್ನು ಗೆದ್ದಿತ್ತು. ಇದಲ್ಲದೆ ಐಪಿಎಲ್​ನಲ್ಲಿ (IPL) ಕಲ್ಕತ್ತಾ ನೈಟ್​ರೈಡರ್ಸ್​ ತಂಡದ ಸಹಾಯಕ ಬೌಲಿಂಗ್​ ಕೋಚ್​ ಆಗಿ ಕೆಲಸ ಮಾಡಿರುವ ಅನುಭವ ಹೊಂದಿರುವ ಓಂಕಾರ್​ (Omkar Salvi) ಅವರು ಇದೀಗ ಆರ್​ಸಿಬಿ ತಂಡದ ಮುಖ್ಯ ಬೌಲಿಂಗ್​ ಕೋಚ್​ ಆಗಿ ನೇಮಕಗೊಂಡಿದ್ದಾರೆ.

ಕಳೆದ ಸೀಸನ್‌ವರೆಗೂ ತಂಡದ ಫಿನಿಶರ್‌ನ ಪಾತ್ರ ನಿರ್ವಹಿಸುತ್ತಿದ್ದ ದಿನೇಶ್ ಕಾರ್ತಿಕ್ ತಂಡದ ಬ್ಯಾಟಿಂಗ್ ಕೋಚ್ ಹಾಗೂ ಮೆಂಟರ್​ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ಆಂಡಿ ಫ್ಲವರ್ ತಂಡದ ಮುಖ್ಯ ಕೋಚ್ ಆಗಿ ಮುಂದುವರಿಯಲಿದ್ದಾರೆ. ಇನ್ನೂ ರಿಟೇನ್​ ಪಟ್ಟಿಗೆ ಬರುವುದಾದರೆ ವಿರಾಟ್​ ಕೊಹ್ಲಿ, ರಜತ್​ ಪಾಟಿದಾರ್​ ಹಾಗೂ ಯಶ್​ ದಯಾಳ್​ರನ್ನು ತಂಡ ಉಳಿಸಿಕೊಂಡಿದೆ.

https://www.vijayavani.net/dr-g-parameshwar-reacts-to-naxalite-vikram-gowda-encounter

https://www.vijayavani.net/jagadish-to-re-enter-bigg-boss-house-but-heres-a-twist