ಅಂದಹಾಗೆ, ತನಿಖಾಧಿಕಾರಿಗಳು ಹೇಳುವಂತೆ ಅರ್ಚನಾ ತಿವಾರಿ ತನ್ನ ಕಾನೂನು ಜ್ಞಾನವನ್ನು ಬಳಸಿಕೊಂಡು ನಾಪತ್ತೆ ನಾಟಕವನ್ನು ರೂಪಿಸಿದ್ದಾರೆ. ರೈಲು ಪ್ರಯಾಣದ ಸಮಯದಲ್ಲಿ ಕಣ್ಮರೆಯಾದರೆ, ಅದರ ತನಿಖೆಯ ಜವಾಬ್ದಾರಿಯನ್ನು GRP ಗೆ ವರ್ಗಾಯಿಸಲಾಗುತ್ತದೆ ಮತ್ತು ಪತ್ತೆಹಚ್ಚುವ ಸಾಧ್ಯತೆ ಕಡಿಮೆಯಾಗುತ್ತದೆ ಎಂದು ಅರ್ಚನಾ ನಂಬಿದ್ದರು. ಆಗಸ್ಟ್ 5ರ ರಾತ್ರಿ ನರ್ಮದಾ ಎಕ್ಸ್ಪ್ರೆಸ್ಗೆ ರಾಖಿಗಳು ಮತ್ತು ಕುಟುಂಬಕ್ಕಾಗಿ ಖರೀದಿ ಮಾಡಿದ ಉಡುಗೊರೆಗಳು ತುಂಬಿದ ಚೀಲದೊಂದಿಗೆ ಅರ್ಚನಾ ಹತ್ತಿದರು. ಇದಾದ ಕೆಲವು ಗಂಟೆಗಳ ನಂತರ, ನರ್ಮದಾಪುರಂ ನಿಲ್ದಾಣದಲ್ಲಿ ಅರ್ಚನಾ ನಾಪತ್ತೆಯಾದರು. ಅಲ್ಲಿ ಆಕೆಯ ಸ್ನೇಹಿತ SUV ಕಾರಿನಲ್ಲಿ ಕಾಯುತ್ತಿದ್ದ. ಈ ವೇಳೆ ಆಕೆ ಅಲ್ಲಿಯೇ ಬಟ್ಟೆ ಬದಲಾಯಿಸಿದ್ದಾರೆ ಮತ್ತು ತನಿಖಾಧಿಕಾರಿಗಳನ್ನು ದಾರಿ ತಪ್ಪಿಸಲು ಅಲ್ಲಿಯೇ ಹತ್ತಿರದ ಕಾಡಿನಲ್ಲಿ ಫೋನ್ ಮತ್ತು ಸ್ಮಾರ್ಟ್ವಾಚ್ ಅನ್ನು ಎಸೆದಿದ್ದಾರೆ. ಮರುದಿನ ಬೆಳಗ್ಗೆ, ಅರ್ಚನಾ ಅವರ ಕುಟುಂಬವು ಕಟ್ನಿ ಸೌತ್ ನಿಲ್ದಾಣದಲ್ಲಿ ಆಕೆಗಾಗಿ ಕಾಯುತ್ತಿತ್ತು. ಆದರೆ, ಅರ್ಚನಾ ಅವರು ಕೈಬಿಟ್ಟ ಚೀಲ ಮಾತ್ರ ರೈಲಿನಲ್ಲಿ ಕಂಡುಬಂದಿತು. ಇದರಿಂದ ಕುಟುಂಬಸ್ಥರಲ್ಲಿ ಭಯ ಉಂಟಾಯಿತು. ಕೂಡಲೇ ಅವರು ದೂರು ದಾಖಲಿಸಿದರು.
