ಗಾಲ್ವಾನ್​ ಕಣಿವೆ ಘರ್ಷಣೆ ಬಳಿಕ ಭಾರತದ ಯೋಧರು ಯಾರೂ ಕಾಣೆಯಾಗಿಲ್ಲ

ನವದೆಹಲಿ: ಲಡಾಖ್​ನ ಪೂರ್ವಭಾಗದಲ್ಲಿ ಗಾಲ್ವಾನ್​ ಕಣಿವೆಯಲ್ಲಿ ಚೀನಾ ಯೋಧರೊಂದಿಗಿನ ಸೋಮವಾರದ ಘರ್ಷಣೆಯ ಬಳಿಕ ಭಾರತದ ಯಾವೊಬ್ಬ ಯೋಧರೂ ಕಾಣೆಯಾಗಿಲ್ಲ ಎಂದು ಭಾರತೀಯ ಸೇನಾಪಡೆ ಸ್ಪಷ್ಟಪಡಿಸಿದೆ.

ಸೋಮವಾರದ ಘರ್ಷಣೆಯಲ್ಲಿ ಕರ್ನಲ್​ ಸೇರಿ 20 ಯೋಧರು ಹುತಾತ್ಮರಾಗಿದ್ದಾರೆ. 76ಕ್ಕೂ ಹೆಚ್ಚು ಯೋಧರು ಗಾಯಗೊಂಡಿದ್ದಾರೆ. ಆದರೆ, ಯಾರೊಬ್ಬರೂ ಕಾಣೆಯಾಗಿಲ್ಲ. ಚೀನಾದ ಕರ್ನಲ್​ ಸೇರಿ 43 ಯೋಧರು ಹತರಾಗಿದ್ದಾರೆ ಎಂದು ಹೇಳಿದೆ.

ಬುಧವಾರದಂದು ಅಮೆರಿಕದ ನ್ಯೂಯಾರ್ಕ್​ ಟೈಮ್ಸ್​ನಲ್ಲಿ ಪ್ರಕಟವಾದ In China-India Clash, Two Nationalist Leaders with Little Room to Give ಎಂಬ ಲೇಖನದ ಹಿನ್ನೆಲೆಯಲ್ಲಿ ಸೇನಾಪಡೆ ಈ ಸ್ಪಷ್ಟನೆ ನೀಡಿದೆ.

ನ್ಯೂಯಾರ್ಕ್​ ಟೈಮ್ಸ್​ನ ವರದಿಯನ್ನು ಆಧರಿಸಿ ಭಾರತದ ಮಾಧ್ಯಮಗಳಲ್ಲಿ ಹಲವಾರು ಯೋಧರು ಕಾಣೆಯಾಗಿದ್ದಾರೆ, ಇಲ್ಲವೇ ಲೆಕ್ಕಕ್ಕೆ ಸಿಕ್ಕಿಲ್ಲ ಎಂದು ವರದಿ ಮಾಡಿದ್ದವು.

ಇದನ್ನೂ ಓದಿ: ಸೋಮವಾರದ ಘರ್ಷಣೆ ವೇಳೆ ಭಾರತೀಯ ಯೋಧರ ಬಳಿ ಶಸ್ತ್ರಾಸ್ತ್ರಗಳಿದ್ದವು

ಭಾರತ ಮತ್ತು ಚೀನಾದ ಮಿಲಿಟರಿಯ ಮೇಜರ್​ ಜನರಲ್​ ದರ್ಜೆಯ ಅಧಿಕಾರಿಗಳು ಪೂರ್ವ ಲಡಾಖ್​ನಲ್ಲಿ ಬಿಕ್ಕಟ್ಟು ಪರಿಹಾರದ 7ನೇ ಸುತ್ತಿನ ಮಾತುಕತೆ ಮುಂದುವರಿಸಿರುವಂತೆ ಈ ಸ್ಪಷ್ಟನೆ ಬಂದಿದೆ.

ಕಾರುನಲ್ಲಿರುವ 3ನೇ ಪದಾತಿ ದಳದ ಕಮಾಂಡರ್​ ಮೇಜರ್​ ಜನರಲ್​ ಅಭಿಜಿತ್​ ಬಾಪಟ್​ ಮತ್ತು ಚೀನಾದ ಪೀಪಲ್ಸ್​ ಲಿಬರೇಷನ್​ ಆರ್ಮಿಯ ಮೇಜರ್​ ಜನರಲ್​ ದರ್ಜೆಯ ಅಧಿಕಾರಿ ಮಾತುಕತೆ ನಡೆಸಿದರು. ಆದರೆ, ಈ ಮಾತುಕತೆಯ ವಿವರಗಳು ಇನ್ನೂ ಲಭ್ಯವಾಗಿಲ್ಲ.

https://www.vijayavani.net/how-much-chinese-money-in-indian-economy/