ದ್ರಾವಿಡ್​ ಭವಿಷ್ಯ ಇನ್ನೂ ಅನಿರ್ಧರಿತ! ವಿಶ್ವಕಪ್​ ನಂತರವೂ ಕೋಚ್​ ಆಗಿ ಮುಂದುವರಿಸಲು ಬಿಸಿಸಿಐ ಒಲವು

ನವದೆಹಲಿ: ಟೀಮ್​ ಇಂಡಿಯಾದ ದಿಗ್ಗಜ ಬ್ಯಾಟರ್​ ರಾಹುಲ್​ ದ್ರಾವಿಡ್​ 1999&2003ರಲ್ಲಿ ಆಟಗಾರ ಮತ್ತು 2007ರಲ್ಲಿ ನಾಯಕನಾಗಿ ಸಾಧ್ಯವಾಗದ ಏಕದಿನ ವಿಶ್ವಕಪ್​ ಗೆಲುವನ್ನು 2023ರಲ್ಲಿ ಕೋಚ್​ ಆಗಿ ಸಾಧಿಸುವ ಸನಿಹದಲ್ಲಿದ್ದಾರೆ. ಆದರೆ, ಗ್ಯಾರಿ ಕರ್ಸ್ಟನ್​ರಂತೆ (2011) ವಿಶ್ವಕಪ್​ ಗೆಲುವಿನೊಂದಿಗೆ ಹುದ್ದೆಯಿಂದ ನಿರ್ಗಮಿಸುವರೇ ಅಥವಾ ವಿಶ್ವಕಪ್​ ಫೈನಲ್​ ಫಲಿತಾಂಶ ಏನೇ ಇದ್ದರೂ ತರಬೇತುದಾರನಾಗಿ ಮುಂದುವರಿಯುವರೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ವಿಶ್ವಕಪ್​ ನಂತರವೂ ಹುದ್ದೆಯಲ್ಲಿ ಮುಂದುವರಿಯುವ ಅಥವಾ ಪದತ್ಯಾಗ ಮಾಡುವ ಕುರಿತು ದ್ರಾವಿಡ್​ ಇನ್ನೂ ಯಾವುದೇ ನಿರ್ಧಾರ ತೆಗೆದುಕೊಂಡಿಲ್ಲ ಎನ್ನಲಾಗುತ್ತಿದೆ.

2021ರ ನವೆಂಬರ್​ನಲ್ಲಿ ಭಾರತ ತಂಡದ ಕೋಚ್​ ಆಗಿ ಅಧಿಕಾರ ಸ್ವೀಕರಿಸಿದ್ದ ದ್ರಾವಿಡ್​, ಹಿಂದಿನ 2 ಐಸಿಸಿ ಟೂರ್ನಿಗಳಲ್ಲಿ ನಿರಾಸೆ ಮೂಡಿಸಿದ್ದರು. 2022ರ ಟಿ20 ವಿಶ್ವಕಪ್​ ಸೆಮಿಫೈನಲ್​ ಮತ್ತು 2023ರ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಫೈನಲ್​ನಲ್ಲಿ ಭಾರತ ಎಡವಿತ್ತು. ಆದರೆ ತವರಿನ ವಿಶ್ವಕಪ್​ನಲ್ಲಿ ಭಾರತ ಸಂಪೂರ್ಣ ಬದಲಾದ ತಂಡದಂತೆ ಪ್ರಾಬಲ್ಯ ಮೆರೆಯುತ್ತಿದೆ. ದ್ವಿಪಕ್ಷೀಯ ಸರಣಿಗಳ ಯಶಸ್ಸನ್ನು ಐಸಿಸಿ ಟೂರ್ನಿಯಲ್ಲೂ ಮರುಕಳಿಸಿದೆ. ಆದರೆ ದ್ರಾವಿಡ್​ ಹುದ್ದೆಯಲ್ಲಿ ಮುಂದುವರಿಯುವುದು ಅಥವಾ ಹೊರನಡೆಯುವುದು ಈಗ ಅವರ ನಿರ್ಧಾರವನ್ನೇ ಅವಲಂಬಿಸಿದೆ ಎನ್ನಲಾಗಿದೆ.

ವಿಶ್ವಕಪ್​ ಬೆನ್ನಲ್ಲೇ ನಡೆಯಲಿರುವ ಆಸೀಸ್​ ವಿರುದ್ಧದ ಟಿ20 ಸರಣಿಯಲ್ಲಿ ಎನ್​ಸಿಎ ಮುಖ್ಯಸ್ಥ ವಿವಿಎಸ್​ ಲಕ್ಷ್ಮಣ್​ ಹಂಗಾಮಿ ಕೋಚ್​ ಆಗಿ ಕಾರ್ಯನಿರ್ವಹಿಸಿದ್ದು, ವರ್ಷಾಂತ್ಯದ ದಕ್ಷಿಣ ಆಫ್ರಿಕಾ ಪ್ರವಾಸಕ್ಕೆ ಮುನ್ನ ದ್ರಾವಿಡ್​ ಭವಿಷ್ಯದ ಬಗ್ಗೆ ಬಿಸಿಸಿಐ ಸ್ಪಷ್ಟ ಚಿತ್ರಣ ಕಂಡುಕೊಳ್ಳಬೇಕಾಗಿದೆ.

ಬಿಸಿಸಿಐ ಮನಗೆದ್ದ ವಿಶ್ವಕಪ್​ ಯಶಸ್ಸು

ದ್ರಾವಿಡ್​ ಮತ್ತು ಇತರ ತರಬೇತಿ ಸಿಬ್ಬಂದಿಯ ಗುತ್ತಿಗೆ ಅವಧಿ ಹಾಲಿ ವಿಶ್ವಕಪ್​ಗೆ ಕೊನೆಗೊಳ್ಳಲಿದೆ. ವಿಶ್ವಕಪ್​ ಶುರುವಾಗುವವರೆಗೂ ಬಿಸಿಸಿಐ ವಲಯದಲ್ಲಿ ದ್ರಾವಿಡ್​ರನ್ನು ಮುಂದುವರಿಸುವ ಬಗ್ಗೆ ಒಲವು ಇರಲಿಲ್ಲ. ಯಾಕೆಂದರೆ ಅವರ ಕೋಚಿಂಗ್​ ಸ್ಟೈಲ್​ ಅವರಿಗೆ ಇಷ್ಟವಾಗಿರಲಿಲ್ಲ. ಆದರೆ ವಿಶ್ವಕಪ್​ನಲ್ಲಿ ಭಾರತ ತಂಡದ ಪ್ರಾಬಲ್ಯವನ್ನು ಕಂಡ ಬಳಿಕ ಬಿಸಿಸಿಐ ಅಧಿಕಾರಿಗಳ ನಿರ್ಧಾರ ಬದಲಾಗಿದ್ದು, ಅವರನ್ನು ವಿಶ್ವಕಪ್​ ನಂತರವೂ ಮುಂದುವರಿಸುವತ್ತ ಒಲವು ಮೂಡಿದೆ ಎನ್ನಲಾಗಿದೆ. ದ್ರಾವಿಡ್​ ಹುದ್ದೆಯಲ್ಲಿ ಮುಂದುವರಿಯಲು ನಿರಾಕರಿಸಿದರೂ, ತಂಡದ ಇತರ ತರಬೇತಿ ಸಿಬ್ಬಂದಿಯನ್ನಾದರೂ ಉಳಿಸಿಕೊಳ್ಳಲು ಬಿಸಿಸಿಐ ಒಲವು ತೋರಿದೆ ಎನ್ನಲಾಗಿದೆ.

https://www.vijayavani.net/rangoli-unveiled-at-orayan-mall-for-special-encouragement-for-indian-cricket-team