ಭಾರತದಲ್ಲಿ 2047ರ ವೇಳೆಗೆ ಇಸ್ಲಾಮಿಕ್ ಆಳ್ವಿಕೆ ಜಾರಿಗೆ ತರಬೇಕೆಂಬ ಅಜೆಂಡಾದೊಂದಿಗೆ ಉಗ್ರ ಸಂಘಟನೆಗಳನ್ನು ಬಲಪಡಿಸಲು ‘ಆನ್ಲೈನ್ ಟೆರರಿಸಂ’ ಜಾಲಗಳು ಸಕ್ರಿಯವಾಗಿರುವ ಆತಂಕಕಾರಿ ವಿಚಾರ ಬೆಳಕಿಗೆ ಬಂದಿದೆ. ಇದರಿಂದ ಎಚ್ಚೆತ್ತಿರುವ ರಾಷ್ಟ್ರೀಯ ತನಿಖಾ ದಳ(ಎನ್ಐಎ) ಸಾಮಾಜಿಕ ಜಾಲತಾಣಗಳ ಮೂಲಕ ಉಗ್ರವಾದ ಪ್ರಚಾರ ಮಾಡಿ, ಯುವಕರ ನೇಮಕಾತಿ ನಡೆಸುತ್ತಿರುವವರನ್ನು ಬಲೆಗೆ ಕೆಡವುವ ಕಾರ್ಯಾಚರಣೆ ಆರಂಭಿಸಿದೆ. ಎನ್ಕ್ರಿಪ್ಟೆಡ್ ವಾಟ್ಸ್ಆಪ್ ಜತೆಗೆ ಸಂದೇಶ ಕಳುಹಿಸಲು ಅತಿಸುರಕ್ಷಿತ ಅಪ್ಲಿಕೇಷನ್ಗಳೆನ್ನಲಾದ ಸಿಗ್ನಲ್, ಟೆಲಿಗ್ರಾಂ, ವೈಬರ್ ಹಾಗೂ ಡಾರ್ಕ್ವೆಬ್ಗಳನ್ನು ಉಗ್ರವಾದ ಪ್ರಚಾರ ಹಾಗೂ ಸಮಾನ ಮನಸ್ಕರ ಸಂಪರ್ಕಕ್ಕೆ ಬಳಸಲಾಗುತ್ತಿದೆ. ಇದನ್ನು ಪತ್ತೆಹಚ್ಚುವುದೇ ಭದ್ರತಾ ಸಂಸ್ಥೆಗಳಿಗೆ ಸವಾಲಾಗಿದೆ. ಅಮಾಯಕರು, ಖಿನ್ನತೆಗೆ ಒಳಗಾದವರು ಹಾಗೂ ಕುಟುಂಬಗಳಿಂದ ದೂರಾಗಿರುವ ಯುವಕರನ್ನೇ ಟಾರ್ಗೆಟ್ ಮಾಡಿ, ಅವರ ಮನಃಪರಿವರ್ತಿಸಿ ಉಗ್ರ ಸಂಘಟನೆಗಳಿಗೆ ಸೇರ್ಪಡೆ ಮಾಡಿಕೊಳ್ಳುವ ಪ್ರಕರಣ ಹೆಚ್ಚಿವೆ.
