ರಾಜ್ಯ ಒಕ್ಕಲಿಗರ ಸಂಘದ ಕಾರ್ಯಕಾರಿಣಿ ಸಮಿತಿ ಚುನಾವಣೆ: ಹನುಮಂತರಾಯಪ್ಪ, ಲೋಕೇಶ್‌ಗೆ ಗೆಲುವು

ತುಮಕೂರು: ತೀವ್ರ ಹಣಾಹಣಿಯಿಂದ ಕೂಡಿದ್ದ ರಾಜ್ಯ ಒಕ್ಕಲಿಗರ ಸಂಘದ ಕಾರ್ಯಕಾರಿಣಿ ಸಮಿತಿಯ ಜಿಲ್ಲಾ ಸದಸ್ಯತ್ವ ಸ್ಥಾನಕ್ಕೆ ಆರ್.ಹನುಮಂತರಾಯಪ್ಪ, ಲೋಕೇಶ್ ಡಿ.ನಾಗರಾಜಯ್ಯ ಚುನಾಯಿತರಾಗಿದ್ದಾರೆ.

ಡಿ.12 ರಂದು ಚುನಾವಣೆ ನಡೆದಿದ್ದು, 2 ಸ್ಥಾನಕ್ಕೆ 7 ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು. ಈ ಬಾರಿ ಸಂಘದ 31181 ಸದಸ್ಯರು ಮತದಾನದ ಹಕ್ಕು ಹೊಂದಿದ್ದು 24193 ಮಂದಿ ಹಕ್ಕು ಚಲಾಯಿಸಿದ್ದರು. ಜಿಲ್ಲೆಯಲ್ಲಿ ಶೇ.77.59 ಮತದಾನವಾಗಿತ್ತು. ಬುಧವಾರ ಕಾಳಿದಾಸ ಪಿಯು ಕಾಲೇಜಿನಲ್ಲಿ ಮತ ಎಣಿಕೆ ನಡೆಯಿತು.

ಡಿ.ನಾಗರಾಜಯ್ಯ ಪುತ್ರನಿಗೆ ಗೆಲುವು: ಮಾಜಿ ಸಚಿವ ಡಿ.ನಾಗರಾಜಯ್ಯ ಪುತ್ರ ಡಿ.ಎನ್.ಲೋಕೇಶ್ 11027 ಮತ ಹಾಗೂ ಆರ್.ಹನುಮಂತರಾಯಪ್ಪ 14901 ಮತ ಪಡೆದು ಗೆಲುವು ಸಾಧಿಸಿದರು. ಇನ್ನುಳಿದಂತೆ ಬೆಳ್ಳಿ ಲೋಕೇಶ್ 8022 ಮತ, ಸುಜಾತಾ ನಂಜೇಗೌಡ 6261 ಮತ, ಡಾ.ಸಿ.ಕೆ.ಎಂ.ಗೌಡ 4042 ಮತ, ಕಪನಿಗೌಡ 211 ಮತ, ಶಿವರಾಮಯ್ಯ 137 ಮತ ಪಡೆದರು.

ಹನುಮಂತರಾಯಪ್ಪ ಕಳೆದ ಬಾರಿ 54 ಮತಗಳ ಅಂತರದಿಂದ ಸೋಲನುಭವಿಸಿದ್ದರು. ಅನುಕಂಪ ಈ ಬಾರಿ ಕೈಹಿಡಿದಿದೆ. ಕೊರಟಗೆರೆ ತಾಲೂಕಿನ ಕೋಳಾಲದ ಹನುಮಂತರಾಯಪ್ಪ ಈ ಬಾರಿ ಅತಿಹೆಚ್ಚು ಮತ ಪಡೆದು ಚುನಾಯಿತರಾದರು. ಹೆಚ್ಚು ಸದಸ್ಯರನ್ನು ಹೊಂದಿರುವ ಕುಣಿಗಲ್ ತಾಲೂಕಿನ ಲೋಕೇಶ್‌ಗೆ ತಂದೆ ಮಾಜಿ ಸಚಿವ ಡಿ.ನಾಗರಾಜಯ್ಯ ನಾಮಬಲ ಕೈಹಿಡಿದಿದೆ. ಬೆಳ್ಳಿಲೋಕೇಶ್, ಸುಜಾತಾ ನಂಜೇಗೌಡ, ಡಾ.ಸಿ.ಕೆ.ಎಂ.ಗೌಡ ಉತ್ತಮ ಸ್ಪರ್ಧೆ ನೀಡಿದ್ದರಾದರೂ ಉತ್ತಮ ಪೈಪೋಟಿ ನೀಡಿದ ಬೆಳ್ಳಿಲೋಕೇಶ್ 3005 ಮತಗಳ ಅಂತರದಿಂದ ಶರಣಾದರು.

ಒಕ್ಕಲಿಗರ ಸಂಘದ ನಿರ್ದೇಶಕರಾಗಿ ಚುನಾಯಿತರಾದ ಆರ್.ಹನುಮಂತರಾಯಪ್ಪ ಹಾಗೂ ಡಿ.ಎನ್.ಲೋಕೇಶ್ ಅವರನ್ನು ಸಮಾಜದ ಮುಖಂಡರು ಸನ್ಮಾನಿಸಿದರು.