ಕಸಬಾ ಹೋಬಳಿ ಬಾಳೆಕೊಪ್ಪದ ಸರ್ವೇ ನಂ.19ರಲ್ಲಿ 1984-85ರಲ್ಲಿ ದರಕಾಸ್ತು ಮೂಲಕ ತಲಾ 2 ಎಕರೆಯಂತೆ ಒಟ್ಟು 12 ಎಕರೆ ಮಂಜೂರಾಗಿದೆ. ಮಂಜೂರಾದ ಅವಧಿಯಿಂದ ಇಲ್ಲಿಯವರೆಗೂ ಖಾತೆ, ಪಹಣಿ ಹಾಗೂ ಚೆಕ್ಬಂಧಿ, ಕಲ್ಲುಬಾಂದು ಹಾಕಿಲ್ಲ. ಮರ ಮಾಲ್ಕಿ ಮಾಡಿಲ್ಲ. ಈ ಜಮೀನು ಪರಿಶಿಷ್ಟ ಜಾತಿಯವರಿಗೆ ಮಂಜೂರು ಮಾಡಲಾಗಿದೆ. ಆದರೆ ಕೆಲವರು ಜಮೀನನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ. ಪ.ಜಾತಿಗೆ ಮಂಜೂರಾದ ಜಮೀನನ್ನು ಬೇರೆಯವರಿಗೆ ಮತ್ತೆ ಮಂಜೂರು ಮಾಡಿದರೆ ಪಿಟಿಸಿಎಲ್ ಕಾಯ್ದೆ ವ್ಯಾಪ್ತಿಗೆ ಬರುತ್ತದೆ. ಈ ಕಾಯ್ದೆ ಉಲ್ಲಂಘನೆ ಮಾಡಿದರೆ ಅಧಿಕಾರಿಗಳು, ನೌಕರರ ವಿರುದ್ಧ ಕಾನೂನು ರೀತಿ ಕ್ರಮ ಕೈಗೊಳ್ಳಬೇಕು. ಒತ್ತುವರಿ ಮಾಡಿದ ಜಮೀನನ್ನು ಖುಲ್ಲಾಪಡಿಸಿ ಪ.ಜಾತಿಯವರಿಗೆ 12 ಎಕರೆ ಜಮೀನನ್ನು ನೀಡಬೇಕು. ಇಲ್ಲದಿದ್ದಲ್ಲಿ ಅ.15ರ ನಂತರ ಆಮರಣಾಂತ ಚಳವಳಿ ಹಮ್ಮಿಕೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಲಾಗಿದೆ.
