ಜನವರಿಯಿಂದ ಜಿಎಸ್​ಟಿ, ಕೆಲ ನಿಯಮ ಬದಲು: ಪಾದರಕ್ಷೆ, ಜವಳಿಗೆ ಶೇ. 12 ತೆರಿಗೆ; ಇ-ಟ್ಯಾಕ್ಸಿ, ಆಹಾರ ವಿತರಣೆ ಸೇವೆಗೂ ಕರ

ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ)ಯಲ್ಲಿ ಪರಿಷ್ಕರಣೆ ಆಗಿರುವ ದರ ಮತ್ತು ಕೆಲವು ಪ್ರಕ್ರಿಯಾ ನಿಯಮಗಳು ಜನವರಿ 1ರಿಂದ ಜಾರಿಗೆ ಬರಲಿವೆ. ಪಾದರಕ್ಷೆ ಮತ್ತು ಜವಳಿ ವಲಯದ ತೆರಿಗೆಯಲ್ಲಿ ಆಗಿರುವ ಪರಿಷ್ಕರಣೆಯೂ ಮುಂದಿನ ಶನಿವಾರದಿಂದ ಚಾಲನೆಗೊಳ್ಳಲಿದೆ. ಸಾವಿರ ರೂ.ಗಿಂತ ಕಡಿಮೆ ಬೆಲೆಯ ಚಪ್ಪಲಿಗೆ ಮತ್ತು ಹತ್ತಿ ಬಟ್ಟೆ ಬಿಟ್ಟು ಉಳಿದ ಜವಳಿ ಉತ್ಪನ್ನಗಳಿಗೆ ಹಾಗೂ ಸಿದ್ಧ ಉಡುಪುಗಳಿಗೆ ಶೇ. 12 ಜಿಎಸ್​ಟಿ ಆಕರವಾಗಲಿದೆ. ಚಪ್ಪಲಿ ಮತ್ತು ಜವಳಿ ಉದ್ಯಮಗಳು ಈ ತೆರಿಗೆ ಏರಿಕೆಯನ್ನು ಕೈಬಿಡುವಂತೆ ಕೇಂದ್ರ ಸರ್ಕಾರದ ಮೇಲೆ ಒತ್ತಡ ತರುತ್ತಿವೆ. ಆದರೆ, ಈ ಬಗ್ಗೆ ಜಿಎಸ್​ಟಿ ಮಂಡಳಿಯಲ್ಲಿ ಇನ್ನೂ ಯಾವುದೇ ನಿರ್ಧಾರ ಅಗಿಲ್ಲ.

ಇ-ಕಾಮರ್ಸ್ ಸಂಸ್ಥೆಗಳು ಒದಗಿಸುವ ಸೇವೆಗಳಿಗೂ ತೆರಿಗೆ ಚಾಲ್ತಿಗೆ ಬರಲಿದೆ. ಅಂದರೆ, ಆಪ್​ಗಳ ಬುಕ್ ಮಾಡುವ ಕಾರು ಅಥವಾ ಆಟೊರಿಕ್ಷಾ ಸೇವೆಗೆ ಶೇ. 5ರಷ್ಟು ತೆರಿಗೆ ಕಟ್ಟುಬೇಕು. ಈ ಮೊದಲು ಇಂಥ ಸೇವೆಗೆ ಜಿಎಸ್​ಟಿಯಿಂದ ವಿನಾಯಿತಿ ನೀಡಲಾಗಿತ್ತು. ಇದರಿಂದ ಓಲಾ, ಉಬರ್​ನಂತಹ ಇ-ಟ್ಯಾಕ್ಸಿ ಸೇವೆಗಳು ದುಬಾರಿ ಆಗಲಿವೆ. ಜತೆಗೆ ಆಪ್​ಗಳ ಮೂಲಕ ತರಿಸಿಕೊಳ್ಳುವ ಆಹಾರಕ್ಕೂ ಶೇ. 5 ಸೇವಾ ತೆರಿಗೆ ವಿಧಿಸಲಾಗುತ್ತದೆ. ಇದರಿಂದ ಆಹಾರ ವಿತರಣಾ ಆಪ್​ಗಳಾದ ಸ್ವಿಗ್ಗಿ, ಜೊಮ್ಯಾಟೊಗಳು ಗ್ರಾಹಕರಿಂದ ತೆರಿಗೆ ವಸೂಲು ಮಾಡಬೇಕಾಗುತ್ತದೆ ಮತ್ತು ಇದಕ್ಕೆ ರಸೀದಿ ನೀಡುವುದು ಕಡ್ಡಾಯವಾಗಲಿದೆ.

ಐಟಿ ರಿಟರ್ನ್ಸ್​ಗೆ 31 ಕಡೆಯ ದಿನ: 2021-22ನೇ ಸಾಲಿನ ಆದಾಯ ತೆರಿಗೆ ವಿವರ (ಐಟಿ ರಿಟರ್ನ್ಸ್) ಸಲ್ಲಿಸಲು ಡಿಸೆಂಬರ್ 31 ಕಡೆಯ ದಿನವಾಗಿದೆ. ಗಡುವಿನ ನಂತರ ಸಲ್ಲಿಸುವ ಐಟಿ ರಿಟರ್ನ್ಸ್​ಗೆ ದಂಡಶುಲ್ಕ ಬೀಳಲಿದೆ. ಹೀಗಾಗಿ ಐಟಿ ರಿಟರ್ನ್ಸ್ ಸಲ್ಲಿಸುವಂತೆ ಆದಾಯ ತೆರಿಗೆ ಇಲಾಖೆಯು ತೆರಿಗೆದಾರರಿಗೆ ಎಸ್​ಎಂಎಸ್ ಮೂಲಕ ಮಾಹಿತಿ ನೀಡುವುದನ್ನು ಚುರುಕುಗೊಳಿಸಿದೆ. ಆನ್​ಲೈನ್​ನಲ್ಲಿ ಕಡೆಯ ದಿನದ ದಟ್ಟಣೆ ತಪ್ಪಿಸಲು ಕೂಡಲೇ ರಿಟರ್ನ್ಸ್ ಸಲ್ಲಿಸಿ ಎಂಬ ಒಕ್ಕಣೆಯನ್ನು ಈ ಸಂದೇಶ ಒಳಗೊಂಡಿದೆ.

ಪ್ರಕ್ರಿಯಾ ನಿಯಮದಲ್ಲಿ ಬದಲಾವಣೆ: ಪ್ರಕ್ರಿಯಾ ನಿಯಮದಲ್ಲಿ ಜಿಎಸ್​ಟಿ ಮರುಪಾವತಿಗೆ ಆಧಾರ್ ದೃಢೀಕರಣ ಕಡ್ಡಾಯವಾಗಲಿದೆ. ಇದರಿಂದ ವಂಚನೆಗೆ ಕಡಿವಾಣ ಬೀಳಲಿದೆ. ವ್ಯಾಪಾರಿಗಳು ಹಿಂದಿನ ತಿಂಗಳ ತೆರಿಗೆ ಪಾವತಿಸದೆ ಜಿಎಸ್​ಟಿಆರ್-3ಬಿ ಸಲ್ಲಿಸಿದರೆ ಮರುಕ್ಷಣದಲ್ಲೇ ಜಿಎಸ್​ಟಿಆರ್-1 ಸಲ್ಲಿಕೆಗೆ ತಡೆ ಬೀಳಲಿದೆ. ಪ್ರಸ್ತುತ ವ್ಯಾಪಾರಿಗಳು ಎರಡು ತಿಂಗಳು ಜಿಎಸ್​ಟಿಆರ್-3ಬಿ ಸಲ್ಲಿಸದಿದ್ದಲ್ಲಿ ಜಿಎಸ್​ಟಿಆರ್-1 ಸಲ್ಲಿಸುವುದಕ್ಕೆ ನಿರ್ಬಂಧ ಇದೆ. ಪರಿಷ್ಕೃತ ನಿಯಮದಿಂದ ನಕಲಿ ಬಿಲ್ ಸೃಷ್ಟಿಗೆ ತಡೆ ಆಗಲಿದೆ. ಇನ್​ಪುಟ್ ಟ್ಯಾಕ್ಸ್ ಕ್ರೆಡಿಟ್ ಕ್ಲೇಮ್ ಮಾಡಲು ಜಿಎಸ್​ಟಿಆರ್-1ರಲ್ಲಿ ಅಧಿಕ ವಹಿವಾಟು ನಡೆದಿರುವುದನ್ನು ತೋರಿಸುವುದಕ್ಕೂ ಕಡಿವಾಣ ಬೀಳಲಿದೆ.

https://www.vijayavani.net/person-shot-himself-with-pistol-and-lost-life/

https://www.vijayavani.net/twist-to-rti-activist-arrest-case-talk-with-woman-officer-went-viral/