ಜನರಿಗೆ ಮುಖಗವಸು ಫಜೀತಿ: ಬಿಸಿಲ ಝುಳದಿಂದ ಹಲವರಿಗೆ ಚರ್ಮದ ಸಮಸ್ಯೆ

| ಪಂಕಜ ಕೆ.ಎಂ. ಬೆಂಗಳೂರು

ಕೋವಿಡ್ ಸಾಂಕ್ರಾಮಿಕ ವೇಳೆ ಸೋಂಕಿನಿಂದ ರಕ್ಷಣೆ ಪಡೆಯಲು ಅನಿವಾರ್ಯವಾದ ಮಾಸ್ಕ್ ಇದೀಗ ಜನರಿಗೆ ಕಿರಿಕಿರಿ ತರುತ್ತಿದೆ. ಬೇಸಿಗೆಯ ಬಿಸಿಲ ತಾಪಕ್ಕೆ ಬಸವಳಿದಿರುವ ಮಂದಿಗೆ ಮಾಸ್ಕ್ ನಿಂದ ನಾನಾ ಚರ್ಮದ ಸಮಸ್ಯೆ ಕಾಡಲಾರಂಭಿಸಿದೆ.

ಮಾಸ್ಕ್ ಆದೇಶ ರಾಜ್ಯದಲ್ಲಿ ಹಿಂಪಡೆದಿಲ್ಲ: ದೇಶದಲ್ಲಿ ಕೋವಿಡ್ 3ನೇ ಅಲೆ ಬಹುತೇಕ ಕ್ಷೀಣಿಸಿದೆ. ಇದರಿಂದ ಈಗಾಗಲೆ ಮಹಾರಾಷ್ಟ್ರ ಮತ್ತು ಕೇರಳ ರಾಜ್ಯಗಳಲ್ಲಿ ಕಡ್ಡಾಯ ಮಾಸ್ಕ್ ಧರಿಸುವ ಆದೇಶವನ್ನು ಅಲ್ಲಿನ ಸರ್ಕಾರಗಳು ಹಿಂಪಡೆದಿವೆ. ಆದರೆ, ಕರ್ನಾಟಕದಲ್ಲಿ ಇನ್ನೂ ಆದೇಶ ಹಿಂಪಡೆದಿಲ್ಲ.

ಮಾಸ್ಕ್ ನಿಂದಾಗುತ್ತಿರುವ ಸಮಸ್ಯೆಗಳು: ದೀರ್ಘ ಕಾಲ ಹಾಗೂ ಬಿಸಿಲಿನಲ್ಲಿ ಮಾಸ್ಕ್ ಧರಿಸುವುದರಿಂದ ಮಾಸ್ಕ್​ನಿಂದ ಆವೃತವಾದ ಮುಖದ ಭಾಗದಲ್ಲಿ ಅಲರ್ಜಿ, ತುರಿಕೆ, ಚರ್ಮ ಕೆಂಪಾಗುವಿಕೆ, ಚರ್ಮದ ಉರಿ, ಮೊಡವೆ, ಗುಳ್ಳೆಗಳು, ಕಲೆಗಳು ಉಂಟಾಗುವುದು ಸೇರಿ ನಾನಾ ಸಮಸ್ಯೆ ಕಾಡುತ್ತಿವೆ. ಮಾಸ್ಕ್​ನ ಅಂಚು ಚರ್ಮದ ನಡುವೆ ಸಂಘರ್ಷ ಉಂಟಾದಾಗ ಚರ್ಮದಲ್ಲಿ ಉರಿ ಕಾಣಿಸಿಕೊಳ್ಳುತ್ತದೆ. ಬಿಸಿಲಿನಿಂದಾಗಿ ಬೆರವುದುರಿಂದ ಚರ್ಮಕ್ಕೆ ಹಾನಿ ಉಂಟು ಮಾಡುತ್ತದೆ. ಹಾಗೆಂದು ಮಾಸ್ಕ್ ಧರಿಸಿದ ಎಲ್ಲರಿಗೂ ಈ ಸಮಸ್ಯೆ ಕಾಣಿಸಿಕೊಳ್ಳುವುದಿಲ್ಲ. ಸೂಕ್ಷ್ಮ ಚರ್ಮ ಉಳ್ಳವರಲ್ಲಿ, ಬಿಗಿಯಾದ ಮಾಸ್ಕ್ ಧರಿಸಿದವರಲ್ಲಿ ಸಾಮಾನ್ಯ ಎನ್ನುತ್ತಾರೆ ಇಎಸ್​ಐ ಆಸ್ಪತ್ರೆಯ ಚರ್ಮರೋಗ ತಜ್ಞ ಡಾ. ಗಿರೀಶ್.

38 ಕೋವಿಡ್ ಕೇಸ್, ಒಬ್ಬರ ಸಾವು: ರಾಜ್ಯದಲ್ಲಿ ಸೋಮವಾರ ಕೇವಲ 5,083 ಕೋವಿಡ್ ಪರೀಕ್ಷೆ ನಡೆಸಲಾಗಿದ್ದು, 38 ಕೋವಿಡ್ ಪ್ರಕರಣಗಳು ದೃಢಪಟ್ಟಿವೆ. ಬೆಂಗಳೂರು ನಗರದಲ್ಲಿ ಸೋಂಕಿತ ಮಹಿಳೆಯೊಬ್ಬರು ಸಾವಿಗೀಡಾಗಿದ್ದಾರೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ 1,500ಕ್ಕೆ ಇಳಿಕೆಯಾಗಿದೆ. ಗುಣಮುಖರ ಒಟ್ಟು ಸಂಖ್ಯೆ 39.04 ಲಕ್ಷ ಮೀರಿದೆ. ಈವರೆಗೂ 40,055 ಸೋಂಕಿತರು ಮೃತರಾಗಿದ್ದಾರೆ.

ಎಚ್ಚರಿಕೆ ಕ್ರಮಗಳು

• ಮಾಸ್ಕ್ ಮೂಗು ಮತ್ತು ಬಾಯಿ ಮುಚ್ಚಿರುವುದನ್ನು ಖಾತ್ರಿ ಪಡಿಸಿಕೊಳ್ಳಿ.
• ಮುಖವನ್ನು ದಿನಕ್ಕೆ ಕನಿಷ್ಠ ಎರಡು ಬಾರಿಯಾದರೂ ಸೋಪ್ ಅಥವಾ ಫೇಸ್​ವಾಶ್​ನಿಂದ ತೊಳೆಯಿರಿ.
• ಮನೆಯಿಂದ ಹೊರಗೆ ಹೋಗುವಾಗ ಹೆಚ್ಚುವರಿಯಾಗಿ 2-3 ಮಾಸ್ಕ್ ಕೊಂಡೊಯ್ಯಿರಿ. ಬೆವರು ಅಥವಾ ಯಾವುದೇ ಕಾರಣದಿಂದ ಮಾಸ್ಕ್ ಒದ್ದೆಯಾದಲ್ಲಿ ತಕ್ಷಣ ಬದಲಿಸಿ.
• ಬಟ್ಟೆ ಮಾಸ್ಕ್ ಬಳಸುವವರು ಸೋಪ್ ಹಾಗೂ ಬಿಸಿ ನೀರಿ ನೀರು ಬಳಸಿ ತೊಳೆಯಿರಿ, ಒಣಗಿಸಿ ಇಸ್ತ್ರಿ ಮಾಡಿ ಬಳಸಿ.
• ಮಾಸ್ಕ್ ಧರಿಸುವ ಮುನ್ನ ವೈದ್ಯರ ಸಲಹೆ ಪಡೆದು ಹೈಪೋಅಲರ್ಜಿಕ್ ಕ್ರೀಮ್​ಗಳನ್ನು ಬಳಸಿ.

ಮಾಸ್ಕ್ ನಿಷೇಧದ ಬಗ್ಗೆ ಚರ್ಚಿಸಿ ತೀರ್ಮಾನ

ನೆಲಮಂಗಲ: ಮಾಸ್ಕ್ ಬಳಕೆ ನಿಷೇಧಿಸುವ ಕುರಿತು ಶೀಘ್ರದಲ್ಲೇ ತಾಂತ್ರಿಕ ಸಲಹಾ ಸಮಿತಿ ಸಭೆ ನಡೆಸಲಾಗುವುದು ಎಂದು ಆರೋಗ್ಯ ಸಚಿವ ಡಾ.ಕೆ.ಸುಧಾಕರ್ ಹೇಳಿದರು. ಕರೊನಾ ಹಿನ್ನೆಲೆಯಲ್ಲಿ ಮಾಸ್ಕ್ ಧರಿಸುವುದನ್ನು ಕಡ್ಡಾಯಗೊಳಿಸಲಾಗಿತ್ತು. ಆದರೆ ಬಳಸಿದ ಮಾಸ್ಕ್​ಗಳನ್ನು ಎಲ್ಲೆಂದರಲ್ಲಿ ಎಸೆಯಲಾಗುತ್ತಿದೆೆ. ಈ ಸಮಸ್ಯೆ ಪರಿಹರಿಸಲು ದೇಶದ 4-5 ರಾಜ್ಯಗಳಲ್ಲಿ ಈಗಾಗಲೆ ಮಾಸ್ಕ್ ಬಳಕೆ ನಿಷೇಧಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ರಾಜ್ಯದಲ್ಲೂ ನಿಷೇಧಿಸುವ ಕುರಿತು ತಾಂತ್ರಿಕ ಸಲಹಾ ಸಮಿತಿ ಹಾಗೂ ಮುಖ್ಯಮಂತ್ರಿ ಜತೆ ರ್ಚಚಿಸಿ ಕ್ರಮ ಕೈಗೊಳ್ಳಲಾಗುವುದು ಎಂದು ಸ್ಪಷ್ಟಪಡಿಸಿದರು. ಚೀನಾ ಮತ್ತು ಕೆಲವು ದೇಶದಲ್ಲಿ ಹೊಸ ತಳಿ ಕಾಣಿಸಿಕೊಂಡಿರುವುದು ವರದಿಯಾಗಿದೆ. ಈ ಬಗ್ಗೆ ವಿಶ್ವ ಆರೋಗ್ಯ ಸಂಸ್ಥೆಯ ಅಭಿಪ್ರಾಯವನ್ನು ನಾವು ಗಮನಿಸುತ್ತಿದ್ದೇವೆ. ಜಿನೋಮಿಕ್ ಸಿಕ್ವೆನ್ಸಿಂಗ್ ಈಗಲೂ ನಡೆಯುತ್ತಿದೆ ಎಂದರು.

https://www.vijayavani.net/sorcery-infront-of-government-higher-primary-school/

https://www.vijayavani.net/pramod-muthalik-warning-against-using-mic-in-mosques/