ಆಸ್ಟ್ರೇಲಿಯಾದ ಕ್ವೀನ್ಸ್​ಲ್ಯಾಂಡ್​ನಲ್ಲಿ ಕರೊನಾ ವೈರಸ್​ನ ಹೊಸ ತಳಿ ಪತ್ತೆ

ಸಿಡ್ನಿ/ನವದೆಹಲಿ: ಮಾರಕ ಡೆಲ್ಟಾ ಪ್ರಭೇದದ ನಂತರ, ಹೊಸ ರೂಪಾಂತರಿ ಒಮಿಕ್ರಾನ್ ಮೇಲೆ ವಿಶ್ವದ ಗಮನ ಕೇಂದ್ರೀಕೃತವಾಗಿರುವ ಸದ್ಯದ ಸನ್ನಿವೇಶದಲ್ಲಿ ಆಸ್ಟ್ರೇಲಿಯಾದ ಕ್ವೀನ್ಸ್ ಲ್ಯಾಂಡ್ ರಾಜ್ಯದಲ್ಲಿ ಹೊಸದೊಂದು ಪ್ರಭೇದ ಪತ್ತೆಯಾಗಿದೆ. ಹೊಸ ವೈರಾಣುವಿನ ಮೂಲ ಮತ್ತಿತರ ಅಂಶಗಳು ಇನ್ನಷ್ಟೇ ದೃಢಪಡಬೇಕಿದೆ ಎಂದು ಕ್ವೀನ್ಸ್​ಲ್ಯಾಂಡ್​ನ ಹಿರಿಯ ಆರೋಗ್ಯ ಅಧಿಕಾರಿ ಪೀಟರ್ ಏಟ್ಕೆನ್ ಹೇಳಿದ್ದಾರೆ. ದಕ್ಷಿಣ ಆಫ್ರಿಕಾದಿಂದ ಆಗಮಿಸಿದ್ದ ಒಬ್ಬ ಪ್ರಯಾಣಿಕನಲ್ಲಿ ಒಮಿಕ್ರಾನ್ ವಂಶಾವಳಿಯನ್ನೇ (ಲೈನೇಜ್) ಹೋಲುವಂಥ ಹೊಸ ವೈರಸ್ ಕಂಡುಬಂದಿದೆ. ಮೂಲ ಒಮಿಕ್ರಾನ್​ನಲ್ಲಿರುವ ಅರ್ಧದಷ್ಟು ರೂಪಾಂತರಿಗಳು ಹೊಸ ತಳಿಯಲ್ಲಿವೆ ಎಂದೂ ಏಟ್ಕನ್ ವಿವರಿಸಿದ್ದಾರೆ.

ಒಮಿಕ್ರಾನ್ ಗುಂಪಿಗೇ ಸೇರಿಸಬಹುದಾದ ಲಕ್ಷಣಗಳನ್ನು ಇದು ಹೊಂದಿದೆ. ಆದರೆ ಇನ್ನೂ ಯಾವುದೇ ಸ್ಪಷ್ಟತೆ ಸಿಕ್ಕಿಲ್ಲ. ಹೀಗಾಗಿ ಈಗ ‘ಒಮಿಕ್ರಾನ್’ ಮತ್ತು ‘ಒಮಿಕ್ರಾನ್​ನಂಥ’ ಪ್ರಭೇದ ಹೊಂದಿದ್ದೇವೆ ಎಂದು ಅವರು ಹೇಳಿದ್ದಾರೆ.

ರಾಜ್ಯಗಳಿಗೆ ಕೇಂದ್ರ ಸೂಚನೆ: ಒಮಿಕ್ರಾನ್ ತಳಿಯ ಭೀತಿ ಹಿನ್ನೆಲೆಯಲ್ಲಿ ಸೋಂಕನ್ನು ನಿಭಾಯಿಸಲು ಅನುಕೂಲವಾಗುವಂತೆ ಕೋವಿಡ್-19 ಚಿಕಿತ್ಸೆಗೆ ಬಳಸುವ ಎಂಟು ಮಹತ್ವದ ಔಷಧಿಗಳ ಸಾಕಷ್ಟು ಕಾಪು ದಾಸ್ತಾನು ಖಾತರಿಪಡಿಸುವಂತೆ ಕೇಂದ್ರ ಸರ್ಕಾರ ಗುರುವಾರ ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ನಿರ್ದೇಶನ ನೀಡಿದೆ. ಆಸ್ಪತ್ರೆಗಳ ಸನ್ನದ್ಧತೆಯನ್ನು ಪರಿಶೀಲಿಸುವಂತೆಯೂ ಕೇಂದ್ರ ಸೂಚಿಸಿದೆ.

•  ಒಮಿಕ್ರಾನ್ ಪ್ರಭೇದವು ಹಿಂದಿನ ತಳಿಗಳಿಗಿಂತ ಹೆಚ್ಚು ತೀವ್ರ ವ್ಯಾಧಿ ಸೃಷ್ಟಿಸುವುದಿಲ್ಲ. ಅದು ವ್ಯಾಕ್ಸಿನ್ ರಕ್ಷಣೆಯಿಂದ ಪೂರ್ತಿಯಾಗಿ ತಪ್ಪಿಸಿಕೊಳ್ಳುವ ಸಂಭವವೂ ಕಡಿಮೆ ಎಂದು ಡಬ್ಲ್ಯುಎಚ್​ಒ ಅಭಿಪ್ರಾಯಪಟ್ಟಿದೆ.

ಜನವರಿ 31ರ ವರೆಗೆ ವಿಮಾನ ರದ್ದು: ಒಮಿಕ್ರಾನ್ ಆತಂಕದ ಕಾರಣ, ನಿಯೋಜಿತ ಅಂತಾರಾಷ್ಟ್ರೀಯ ಪ್ರಯಾಣಿಕ ವಿಮಾನಗಳ ಹಾರಾಟ ನಿಷೇಧವನ್ನು 2022ರ ಜನವರಿ 31ರವರೆಗೆ ವಿಸ್ತರಿಸಲಾಗುವುದೆಂದು ನಾಗರಿಕ ವಿಮಾನಯನ ಮಹಾ ನಿರ್ದೇಶನಾಲಯ (ಡಿಜಿಸಿಎ) ಗುರುವಾರ ತಿಳಿಸಿದೆ.

https://www.vijayavani.net/manuranjan-ravichandran-agreed-to-celebrate-birthday-with-fans/

https://www.vijayavani.net/ambulance-accident-it-was-carrying-deadbody-of-helicopter-disaster-martyrdom-body/