ಅರಮನೆ ಮೈದಾನ ಮಂಗಳವಾರ ಅಕ್ಷರಶಃ ‘ಅಪ್ಪು’ಮಯವಾಗಿತ್ತು. ಡಾ. ರಾಜ್ ಕುಟುಂಬ ಆಯೋಜಿಸಿದ್ದ ಬೃಹತ್ ಅನ್ನಸಂತರ್ಪಣೆಯಲ್ಲಿ ಸಹಸ್ರಾರು ಸಂಖ್ಯೆಯಲ್ಲಿ ‘ಅಭಿಮಾನಿ ದೇವರು’ಗಳು ಭಾಗವಹಿಸಿ, ದುಃಖದಲ್ಲಿಯೇ ಭೋಜನ ಸವಿದು ‘ಪುನೀತ’ರಾದರು. ಅಪ್ಪು ಅಮರ, ಪವರ್ಸ್ಟಾರ್ಗೆ ಜೈ ಎಂಬಿತ್ಯಾದಿ ಜೈಕಾರಗಳೂ ಅಲ್ಲಿ ಮೊಳಗುತ್ತಿದ್ದವು. ಮಂಗಳವಾರಕ್ಕೆ ಅಪು್ಪ ಇಲ್ಲವಾಗಿ 12 ದಿನಗಳು ಕಳೆದಿವೆ. ಸೋಮವಾರವಷ್ಟೇ ಕುಟುಂಬದವರೆಲ್ಲ ಸೇರಿ ಕಂಠೀರವ ಸ್ಟುಡಿಯೋದಲ್ಲಿನ ಸಮಾಧಿಗೆ ನೈವೇದ್ಯ ಅರ್ಪಿಸಿ ತಿಥಿ ಕಾರ್ಯ ನೆರವೇರಿಸಿದ್ದಾರೆ. ಆದರೆ, ಅಭಿಮಾನಿಗಳಿಗೆ ಮಾತ್ರ ಪ್ರವೇಶವಿರಲಿಲ್ಲ. ಹಾಗಾಗಿ, ಅಭಿಮಾನಿಗಳಿಗಾಗಿಯೇ ಸದಾಶಿವನಗರದ ಬಳಿಕ ಅರಮನೆ ಮೈದಾನದಲ್ಲಿ ಅನ್ನಸಂತರ್ಪಣೆಯನ್ನು ಡಾ. ರಾಜ್ ಕುಟುಂಬ ಆಯೋಜಿಸಿತ್ತು. ಬರೋಬ್ಬರಿ 30 ಸಾವಿರಕ್ಕೂ ಅಧಿಕ ಅಭಿಮಾನಿಗಳು ಆಗಮಿಸಿ, ನೆಚ್ಚಿನ ನಟನ ನೆನಪಲ್ಲಿ ಊಟ ಸವಿದು ಮರಳಿದರು. ಈ ಅಭಿಮಾನದ ಕಾರ್ಯಕ್ರಮದಲ್ಲಿ ಶಿವರಾಜಕುಮಾರ್, ರಾಘವೇಂದ್ರ ರಾಜಕುಮಾರ್, ಪುನೀತ್ ಪತ್ನಿ ಅಶ್ವಿನಿ, ಶ್ರೀಮುರಳಿ, ವಿನಯ್ ರಾಜಕುಮಾರ್, ಯುವ ಸೇರಿ ಇಡೀ ರಾಜ್ ಕುಟುಂಬ ಭಾಗವಹಿಸಿತ್ತು.
