ಬೆಳೆ ಮತ್ತು ಬೆಲೆ ಗಂಡಾಂತರದಿಂದ ಅನ್ನದಾತರನ್ನು ಪಾರು ಮಾಡಿ ಬದುಕು ಹಸನಾಗಿಸುವುದು ಸರ್ಕಾರಕ್ಕೆ ಮಾತ್ರವಲ್ಲ, ರೈತ ಸಮುದಾಯದ ಮುಂದಿರುವ ದೊಡ್ಡ ಸವಾಲು ಕೂಡ. ಸರ್ಕಾರಕ್ಕೆ ಶಿಫಾರಸು ಸಹಿತ ರಾಜ್ಯ ಕೃಷಿ ಬೆಲೆ ಆಯೋಗ ಸಲ್ಲಿಸಿದ ವರದಿಯು ಸರ್ಕಾರದ ನೀತಿ-ನಿರ್ಧಾರಗಳ ಬದಲಾವಣೆ ಜತೆಗೆ ರೈತರ ಲೆಕ್ಕವಿಟ್ಟು ಬೆಳೆಯುವ ಪರಿಪಾಠ ರೂಢಿಸಿಕೊಳ್ಳಬೇಕಾದ ಅಗತ್ಯತೆ ಸಾರಿದೆ. ಐದು ವಿವಿಗಳ ಜತೆಗೆ ವಿಚಾರ ವಿಮರ್ಶೆ, 2,000 ರೈತರ ಅಭಿಪ್ರಾಯ ಹಾಗೂ 27 ಬೆಳೆಗಳಿಗೆ ದತ್ತಾಂಶ ಸಂಗ್ರಹಿಸಿ, ಹೊಸ ಆಲೋಚನೆಯೊಂದಿಗೆ ಕೃಷಿ ಬಿಕ್ಕಟ್ಟಿಗೆ ಶಾಶ್ವತ ಪರಿಹಾರ ಒದಗಿಸುವ ನಿಟ್ಟಿನಲ್ಲಿ ಕೇಂದ್ರ, ರಾಜ್ಯ ಸರ್ಕಾರಗಳ ಪ್ರಯತ್ನಗಳೇನಿರಬೇಕು ಎಂದು ತಿಳಿಸಿದೆ. ಹಾಗೆಯೇ ‘ನಮ್ಮದೇ ಮಾರುಕಟ್ಟೆ’ ಕಾರ್ಯತಂತ್ರವನ್ನು ರೈತರು ಅನುಸರಿಸಿ ಸ್ವಾವಲಂಬಿ, ಘನತೆ-ಗೌರವದ ಬದುಕು ಕಟ್ಟಿಕೊಳ್ಳುವುದಕ್ಕೂ ಸಾಧ್ಯವಿದೆ ಎಂಬ ಕಾರ್ಯಸಾಧು ಸೂತ್ರಗಳನ್ನು ರೂಪಿಸಿ ಕೊಟ್ಟಿದೆ. ಬೆಲೆ ಖಾತರಿ, ಸಮಗ್ರ ಕೃಷಿ ಪದ್ಧತಿಗೆ ಒತ್ತು, ಎಲ್ಲ ಬೆಳೆಗಳಿಗೆ ವಿಮೆ ವಿಸ್ತರಿಸಿ ಕಡ್ಡಾಯಗೊಳಿಸುವುದು, ಬೆಳೆ ವಿಮೆ ಯೋಜನೆ ಅನುಷ್ಠಾನ ಹಂತದಲ್ಲಿನ ಲೋಪ-ದೋಷ ನಿವಾರಣೆ, ಮಾರ್ಗಸೂಚಿ ಪರಿಷ್ಕರಣೆ, ಬೆಲೆ ಮುನ್ನಂದಾಜು ಮಾಹಿತಿ ನೀಡಿ ರೈತರಲ್ಲಿ ಜಾಗೃತಿ, ಕೃಷಿ ಯಂತ್ರೋಪಕರಗಳ ಸಬ್ಸಿಡಿ ಅತಿ ಸಣ್ಣ ಮತ್ತು ಸಣ್ಣ ರೈತರಿಗೆ ವಿಸ್ತರಣೆ, ಬೇಡಿಕೆ ಹಾಗೂ ಪೂರೈಕೆ ನಡುವಿನ ವ್ಯತ್ಯಾಸ ಸರಿದೂಗಿಸುವುದು ಮುಂತಾದ ಪರಿಹಾರ ಸೂತ್ರಗಳು ಸರ್ಕಾರಕ್ಕೆ ಸಲ್ಲಿಸಿದ ವರದಿಯಲ್ಲಿದೆ.
